ਸਿਆਸੀ ਡਰਾਮਾ ; ਕਾਂਗਰਸੀ ਕੌਂਸਲਰ ਨੇ 12 ਘੰਟਿਆਂ ''ਚ 3 ਵਾਰ ਬਦਲ ਲਈ ਪਾਰਟੀ

Friday, Dec 27, 2024 - 03:55 AM (IST)

ਲੁਧਿਆਣਾ (ਹਿਤੇਸ਼)- ਭਾਜਪਾ ਵੱਲੋਂ ਕਾਂਗਰਸ ਨੂੰ ਸਮਰਥਨ ਦੇਣ ਤੋਂ ਮਨ੍ਹਾਂ ਕਰਨ ਤੋਂ ਬਾਅਦ ਆਮ ਆਦਮੀ ਪਾਰਟੀ ਵੱਲੋਂ ਲੁਧਿਆਣਾ ’ਚ ਮੇਅਰ ਬਣਾਉਣ ਲਈ ਜੋ ਜੋੜ-ਤੋੜ ਦੀ ਰਾਜਨੀਤੀ ਸ਼ੁਰੂ ਕੀਤੀ ਗਈ ਹੈ, ਉਸ ਦੌਰਾਨ ਵੀਰਵਾਰ ਨੂੰ ਜੰਮ ਕੇ ਸਿਆਸੀ ਡਰਾਮੇਬਾਜ਼ੀ ਹੋਈ। ਇਸ ਦੇ ਤਹਿਤ ਇਕ ਕਾਂਗਰਸੀ ਕੌਂਸਲਰ ਨੇ 12 ਘੰਟੇ ਤੋਂ ਵੀ ਘੱਟ ਸਮੇਂ ਅੰਦਰ ਤੀਜੀ ਵਾਰ ਪਾਰਟੀ ਬਦਲਣ ਦਾ ਮਾਮਲਾ ਸਾਹਮਣੇ ਆਇਆ ਹੈ।

ਜ਼ਿਕਰਯੋਗ ਹੈ ਕਿ ਕੈਬਨਿਟ ਮੰਤਰੀ ਲਾਲਜੀਤ ਭੁੱਲਰ ਵੀਰਵਾਰ ਨੂੰ ਸ਼ਾਮ ਨੂੰ ਕਾਂਗਰਸ ਦੇ ਵਾਰਡ ਨੰ. 6 ਤੋਂ ਕੌਂਸਲਰ ਜਗਦੀਸ਼ ਦੀਸ਼ਾ ਨੂੰ ਆਮ ਆਦਮੀ ਪਾਰਟੀ ’ਚ ਸ਼ਾਮਲ ਕਰਨ ਦੀ ਫੋਟੋ ਜਾਰੀ ਕੀਤੀ ਗਈ, ਜਿਸ ਤੋਂ ਕੁਝ ਦੇਰ ਬਾਅਦ ਜ਼ਿਲਾ ਕਾਂਗਰਸ ਦੇ ਪ੍ਰਧਾਨ ਸੰਜੇ ਤਲਵਾੜ ਵੱਲੋਂ ਹਲਕਾ ਪੂਰਬੀ ਦੇ ਕਾਂਗਰਸੀ ਕੌਂਸਲਰਾਂ ਨਾਲ ਦੀਸ਼ਾ ਦੇ ਘਰ ਪੁੱਜ ਕੇ ਉਨ੍ਹਾਂ ਦੇ ਕਾਂਗਰਸ ’ਚ ਵਾਪਸ ਆਉਣ ਦਾ ਦਾਅਵਾ ਕਰ ਦਿੱਤਾ ਗਿਆ।

ਇਹ ਵੀ ਪੜ੍ਹੋ- ਡਾ. ਮਨਮੋਹਨ ਸਿੰਘ ਦੇ ਦਿਹਾਂਤ ਮਗਰੋਂ ਸਰਕਾਰੀ ਬੈਠਕਾਂ ਹੋਈਆਂ ਰੱਦ, 7 ਦਿਨਾਂ ਲਈ ਰਾਸ਼ਟਰੀ ਸੋਗ ਦਾ ਐਲਾਨ

ਇਸ ਸਬੰਧ ’ਚ ਫੋਟੋ ਅਤੇ ਵੀਡੀਓ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋਣੀ ਸ਼ੁਰੂ ਹੋਈ ਸੀ ਤਾਂ ਕੁਝ ਦੇਰ ਬਾਅਦ ਸਟੋਰੀ ’ਚ ਫਿਰ ਟਵਿਸਟ ਆ ਗਿਆ। ਜਦ ਦੇਰ ਸ਼ਾਮ ਨੂੰ ਮੰਤਰੀ ਭੁੱਲਰ ਵੱਲੋਂ ਇਕ ਵਾਰ ਫਿਰ ਦੀਸ਼ਾ ਨੂੰ ਆਮ ਆਦਮੀ ਪਾਰਟੀ ’ਚ ਸ਼ਾਮਲ ਕਰਨ ਦੀ ਫੋਟੋ ਜਾਰੀ ਕਰ ਦਿੱਤੀ ਗਈ।

ਇਸ ਦੌਰਾਨ ਦੀਸ਼ਾ ਵੱਲੋਂ ਕਦੇ ਖੁਦ ਨੂੰ ‘ਆਪ’ ਦਾ ਤੇ ਕਦੇ ਕਾਂਗਰਸ ਦਾ ਸਿਪਾਹੀ ਦੱਸਿਆ ਗਿਆ ਅਤੇ ਆਖਰੀ ਵਾਰ ਵਾਰਡ ਦੇ ਵਿਕਾਸ ਲਈ ਸਰਕਾਰ ਨੂੰ ਸਮਰਥਨ ਦੇਣ ਦੀ ਗੱਲ ਕਹੀ। ਇਸ ਨਾਟਕੀ ਘਟਨਾਚੱਕਰ ਨੂੰ ਲੈ ਕੇ ਲੁਧਿਆਣਾ ਤੋਂ ਲੈ ਕੇ ਪੰਜਾਬ ਦੇ ਸਿਆਸੀ ਗਲਿਆਰਿਆਂ ’ਚ ਖੂਬ ਚਰਚਾ ਹੋ ਰਹੀ ਹੈ।

PunjabKesari