2 ਮਾਸੂਮਾਂ ਵੱਲੋਂ ਗਲਤੀ ਨਾਲ ਕੀਟਨਾਸ਼ਕ ਦਵਾਈ ਨਿਗਲਣ ''ਤੇ ਮਚੀ ਤਰਥੱਲੀ

ਹੁਸ਼ਿਆਰਪੁਰ, (ਜ.ਬ.)- ਥਾਣਾ ਚੱਬੇਵਾਲ ਅਧੀਨ ਪਿੰਡ ਜੇਜੋਂ ਦੇ ਕੇ.ਐੱਲ.ਐੱਮ. ਸ਼ਿਵਾਲਿਕ ਪਬਲਿਕ ਸਕੂਲ 'ਚ ਅੱਜ ਸਵੇਰੇ 9 ਵਜੇ ਦੇ ਕਰੀਬ ਉਸ ਸਮੇਂ ਤਰਥੱਲੀ ਮਚ ਗਈ ਜਦੋਂ ਪ੍ਰਾਰਥਨਾ ਸਭਾ ਤੋਂ ਬਾਅਦ 2 ਬੱਚੇ ਬੇਹੋਸ਼ ਹੋ ਗਏ। ਜਾਂਚ ਕਰਨ 'ਤੇ ਪਤਾ ਲੱਗਾ ਕਿ ਸੱਤਵੀਂ ਜਮਾਤ 'ਚ ਪੜ੍ਹਨ ਵਾਲੇ ਹਰਸ਼ ਨੇ ਆਪ ਪੀਣ ਉਪਰੰਤ ਪੰਜਵੀਂ ਕਲਾਸ 'ਚ ਪੜ੍ਹਨ ਵਾਲੇ ਦਿਨੇਸ਼ ਨੂੰ ਵੀ ਕੋਈ ਦਵਾਈ ਪਿਆ ਦਿੱਤੀ ਹੈ, ਜਿਸ ਕਾਰਨ ਦੋਵੇਂਂ ਬੇਹੋਸ਼ ਹੋ ਗਏ। ਦੋਵਾਂ ਦੇ ਮੂੰਹ ਵਿਚੋਂ ਝੱਗ ਨਿਕਲਦੀ ਦੇਖ ਜਦੋਂ ਅਧਿਆਪਕਾਂ ਨੇ ਹਰਸ਼ ਦੇ ਬੈਗ ਦੀ ਜਾਂਚ ਕੀਤੀ ਤਾਂ ਉਸ 'ਚ ਕੀਟਨਾਸ਼ਕ ਦਵਾਈ ਕਲੋਰੋਪੈਰੋਫਾਸ ਦੇਖ ਕੇ ਸਕੂਲ ਪ੍ਰਬੰਧਨ ਨੇ ਤੁਰੰਤ ਦੋਵਾਂ ਬੱਚਿਆਂ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਮਾਹਿਲਪੁਰ ਪਹੁੰਚਾਇਆ। ਹਾਲਤ ਵਿਗੜਦੀ ਦੇਖ ਡਾਕਟਰਾਂ ਨੇ ਉਨ੍ਹਾਂ ਨੂੰ ਸਿਵਲ ਹਸਪਤਾਲ ਹੁਸ਼ਿਆਰਪੁਰ ਰੈਫ਼ਰ ਕਰ ਦਿੱਤਾ, ਜਿੱਥੇ ਖ਼ਬਰ ਲਿਖੇ ਜਾਣ ਤੱਕ ਉਨ੍ਹਾਂ ਦੀ ਹਾਲਤ 'ਚ ਸੁਧਾਰ ਹੋ ਰਿਹਾ ਸੀ।
ਕੀ ਹੈ ਮਾਮਲਾ
ਉਕਤ ਸਕੂਲ 'ਚ ਰੋਜ਼ਾਨਾ ਵਾਂਗ ਅੱਜ ਸਵੇਰ ਦੀ ਪ੍ਰਾਰਥਨਾ ਸਭਾ ਉਪਰੰਤ ਸਾਰੇ ਬੱਚੇ ਆਪਣੀਆਂ ਜਮਾਤਾਂ 'ਚ ਜਾਣ ਲੱਗੇ ਤਾਂ ਇਸੇ ਦੌਰਾਨ ਸੱਤਵੀਂ ਜਮਾਤ 'ਚ ਪੜ੍ਹਨ ਵਾਲਾ ਹਰਸ਼ ਪੁੱਤਰ ਤਿਲਕ ਰਾਜ ਵਾਸੀ ਪਿੰਡ ਖੰਨੀ ਆਪਣੇ ਬੈਗ 'ਚੋਂ ਇਕ ਸ਼ੀਸ਼ੀ ਕੱਢ ਕੇ ਦਵਾਈ ਪੀਣ ਲੱਗਾ। ਇਹ ਦੇਖ ਕੇ ਪੰਜਵੀਂ ਜਮਾਤ ਵਿਚ ਪੜ੍ਹਨ ਵਾਲੇ ਦਿਨੇਸ਼ ਪੁੱਤਰ ਜੀਤਾ ਰਾਮ ਵਾਸੀ ਜੇਜੋਂ ਨੇ ਪੁੱਛਿਆ ਤਾਂ ਹਰਸ਼ ਨੇ ਕਿਹਾ ਕਿ ਖੰਘ ਦੀ ਦਵਾਈ ਪੀ ਰਿਹਾ ਹਾਂ। ਇੰਨਾ ਸੁਣਦੇ ਹੀ ਦਿਨੇਸ਼ ਨੇ ਕਿਹਾ ਕਿ ਮੈਨੂੰ ਵੀ ਖੰਘ ਆ ਰਹੀ ਹੈ, ਮੈਨੂੰ ਵੀ ਪਿਆ ਦੇ। ਦਵਾਈ ਪੀਂਦੇ ਹੀ ਦੋਵੇਂ ਬੇਹੋਸ਼ ਹੋ ਗਏ।
ਹਰਸ਼ ਨੇ ਗਲਤੀ ਨਾਲ ਬੈਗ 'ਚ ਰੱਖ ਲਈ ਸੀ ਕੀਟਨਾਸ਼ਕ ਦਵਾਈ 
ਸਿਵਲ ਹਸਪਤਾਲ 'ਚ ਹਰਸ਼ ਦੇ ਪਿਤਾ ਤਿਲਕ ਰਾਜ ਨੇ ਦੱਸਿਆ ਕਿ ਘਰ ਵਿਚ ਕੀਟਨਾਸ਼ਕ ਦਵਾਈ ਦੀ ਸ਼ੀਸ਼ੀ ਮੇਜ਼ 'ਤੇ ਪਈ ਸੀ, ਜੋ ਹਰਸ਼ ਨੇ ਖੰਘ ਦੀ ਦਵਾਈ ਸਮਝ ਕੇ ਬੈਗ 'ਚ ਪਾ ਲਈ ਸੀ।
ਕੀ ਕਹਿੰਦੇ ਹਨ ਡਾਕਟਰ
ਸਿਵਲ ਹਸਪਤਾਲ 'ਚ ਦੋਵਾਂ ਬੱਚਿਆਂ ਦਾ ਇਲਾਜ ਕਰ ਰਹੇ ਡਾ. ਪ੍ਰਦੀਪ ਭਾਟੀਆ ਅਤੇ ਡਾ. ਖੁਸ਼ਬੀਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਕੀਟਨਾਸ਼ਕ ਦਵਾਈ ਦੀ ਹਲਕੀ ਮਾਤਰਾ ਨਿਗਲੀ ਸੀ। 
ਉਨ੍ਹਾਂ ਨੂੰ 48 ਘੰਟੇ ਡਾਕਟਰਾਂ ਦੀ ਨਿਗਰਾਨੀ ਵਿਚ ਰੱਖਣ ਤੋਂ ਬਾਅਦ ਵਾਰਡ 'ਚ ਸ਼ਿਫ਼ਟ ਕਰ ਦਿੱਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਹਾਲਾਤ 'ਚ ਤੇਜ਼ੀ ਨਾਲ ਸੁਧਾਰ ਹੋ ਰਿਹਾ ਹੈ।
ਕੀ ਕਹਿੰਦੇ ਹਨ ਸਕੂਲ ਪ੍ਰਿੰਸੀਪਲ
ਦੋਵਾਂ ਬੱਚਿਆਂ ਨਾਲ ਸਿਵਲ ਹਸਪਤਾਲ ਪਹੁੰਚੇ ਪ੍ਰਿੰ. ਜਗਦੀਸ਼ ਕੁਮਾਰ ਨੇ ਦੱਸਿਆ ਕਿ ਦੋਵਾਂ ਬੱਚਿਆਂ ਦੇ ਮੂੰਹ 'ਚੋਂ ਬਦਬੂ ਆਉਂਦੀ ਦੇਖ ਸਾਨੂੰ ਸ਼ੱਕ ਹੋਇਆ ਕਿ ਦੋਵਾਂ ਨੇ ਗਲਤੀ ਨਾਲ ਕੋਈ ਜ਼ਹਿਰੀਲੀ ਦਵਾਈ ਨਿਗਲ ਲਈ ਹੈ। ਜਦੋਂ ਹਰਸ਼ ਦੇ ਬੈਗ 'ਚੋਂ ਕੀਟਨਾਸ਼ਕ ਦੀ ਸ਼ੀਸ਼ੀ ਮਿਲੀ ਤਾਂ ਤੁਰੰਤ ਦੋਵਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ ਸੂਚਨਾ ਦੇ ਕੇ ਕਾਰ 'ਚ ਦੋਵਾਂ ਨੂੰ ਹਸਪਤਾਲ ਪਹੁੰਚਾ ਕੇ ਇਲਾਜ ਸ਼ੁਰੂ ਕਰਵਾ ਦਿੱਤਾ ਹੈ।
ਕੀ ਕਹਿੰਦੀ ਹੈ ਪੁਲਸ
ਇਸ ਸਬੰਧੀ ਜੇਜੋਂ ਪੁਲਸ ਚੌਕੀ ਦੇ ਇੰਚਾਰਜ ਏ.ਐੱਸ.ਆਈ. ਵਿਜਯੰਤ ਕੁਮਾਰ ਤੋਂ ਪੁੱਛਿਆ ਤਾਂ ਉਨ੍ਹਾਂ ਕਿਹਾ ਕਿ ਸੂਚਨਾ ਮਿਲਦੇ ਹੀ ਪੁਲਸ ਦੀ ਟੀਮ ਹਰਸ਼ ਦੇ ਘਰ ਪਹੁੰਚੀ ਤਾਂ ਪਤਾ ਲੱਗਾ ਕਿ ਹਰਸ਼ ਨੂੰ ਖੰਘ ਲੱਗੀ ਹੋਈ ਸੀ। ਉਹ  ਖੰਘ ਦੀ ਦਵਾਈ ਭੁਲੇਖੇ ਕੀਟਨਾਸ਼ਕ ਦਵਾਈ ਬੈਗ 'ਚ ਪਾ ਕੇ ਸਕੂਲ ਚਲਾ ਗਿਆ ਸੀ। ਦੋਵਾਂ ਬੱਚਿਆਂ ਨੇ ਖੰਘ ਦੀ ਦਵਾਈ ਸਮਝ ਕੇ ਹੀ ਕੀਟਨਾਸ਼ਕ ਦਵਾਈ ਨਿਗਲ ਲਈ ਸੀ।