ਪੰਜਾਬ ’ਚ ਮੈਰਿਜ ਪੈਲੇਸਾਂ ਅਤੇ ਰਿਜ਼ੋਰਟਾਂ ਦਾ ਭਵਿੱਖ ਅੱਧ-ਵਿਚਾਲੇ ਲਟਕਿਆ

ਲੁਧਿਆਣਾ (ਜੋਸ਼ੀ)-ਪੰਜਾਬ, ਖ਼ਾਸ ਕਰ ਕੇ ਲੁਧਿਆਣਾ ਵੱਡੇ ਅਤੇ ਸ਼ਾਨਦਾਰ ਵਿਆਹ ਸਮਾਗਮਾਂ ਲਈ ਜਾਣਿਆ ਜਾਂਦਾ ਹੈ। ਇਨ੍ਹਾਂ ਵਿਆਹ ਸਮਾਗਮਾਂ ’ਚ ਵੱਡੇ ਉਦਯੋਗਪਤੀਆਂ ਅਤੇ ਐੱਨ. ਆਰ. ਆਈਜ਼ ਸਮੇਤ ਪੰਜਾਬੀ ਵੀ ਸ਼ਾਮਲ ਹਨ। ਮਹਾਮਾਰੀ ਤੋਂ ਪਹਿਲਾਂ ਉਹ ਅਜਿਹੇ ਸਮਾਰੋਹਾਂ ’ਤੇ ਦੌਲਤ ਦੇ ਵਿਸ਼ਾਲ ਪ੍ਰਦਰਸ਼ਨ ਕਰਨ ਲਈ ਜਾਣੇ ਜਾਂਦੇ ਸਨ।

ਇਸੇ ਤਰ੍ਹਾਂ ਦੇ ਬਹੁਤ ਸਾਰੇ ਵੱਡੇ ਵਿਆਹ ਸਮਾਰੋਹ ਵੀ ਵੇਖੇ ਗਏ ਹਨ, ਜਿਸ ਵਿਚ ਬਾਲੀਵੁੱਡ ਫਿਲਮਾਂ ’ਤੇ ਅਾਧਾਰਤ ਵਿਸ਼ਾਲ ਸੈੱਟ ਲਾਏ ਜਾਂਦੇ ਸਨ ਅਤੇ ਹਜ਼ਾਰਾਂ ਮਹਿਮਾਨਾਂ ਨੂੰ ਬੁਲਾਇਆ ਗਿਆ। ਘਟਨਾ ਸਥਾਨ ’ਤੇ ਪਹੁੰਚਣ ਲਈ ਕਈ ਵਾਰ ਲਾੜੀ-ਲਾੜਾ ਹੈਲੀਕਾਪਟਰ ਦੀ ਵਰਤੋਂ ਕਰਦੇ ਸਨ ਅਤੇ ਹੈਲੀਕਾਪਟਰ ਡੋਲੀ ਦਾ ਪ੍ਰਬੰਧ ਕਰਦੇ ਦਿਖਾਈ ਦਿੰਦੇ ਸਨ।

ਜਦੋਂ ਤੋਂ ਕੋਰੋਨਾ ਮਹਾਮਾਰੀ ਫੈਲੀ ਹੈ, ਇਸ ਤਰ੍ਹਾਂ ਦੇ ਸ਼ਾਨਦਾਰ ਜਸ਼ਨਾਂ ਦੀਆਂ ਘਟਨਾਵਾਂ ਪਿੱਛੇ ਰਹਿ ਗਈਆਂ ਹਨ। ਪਿਛਲੇ ਸਾਲ ਦੇ ਸ਼ੁਰੂਆਤੀ ਮਹੀਨਿਆਂ ’ਚ ਮਹਾਮਾਰੀ ਤਹਿਤ ਲਾਕਡਾਊਨ/ਕਰਫਿਊ ਨੇ ਸਾਰੀਆਂ ਗਤੀਵਿਧੀਆਂ ਨੂੰ ਠੱਲ੍ਹ ਪਾ ਦਿੱਤੀ ਸੀ, ਨਤੀਜੇ ਵਜੋਂ ਮੈਰਿਜ ਪੈਲੇਸ ਅਤੇ ਇਸ ਨਾਲ ਜੁੜੇ ਸਾਰੇ ਕਾਰੋਬਾਰ ਜਿਵੇਂ ਕਿ ਫੋਟੋਗ੍ਰਾਫੀ, ਸਜਾਵਟ, ਡੀ.ਜੇ., ਕੈਟਰਿੰਗ ਵਿਕ੍ਰੇਤਾ ਆਦਿ ਪੂਰੀ ਤਰ੍ਹਾਂ ਬੰਦ ਹੋ ਗਏ ਸਨ।

ਪਿਛਲੇ ਸਾਲ ਨਵੰਬਰ ਅਤੇ ਦਸੰਬਰ ’ਚ ਸੂਬਾ ਸਰਕਾਰ ਵੱਲੋਂ ਮੈਰਿਜ ਪੈਲੇਸਾਂ ਨੂੰ ਕੁਝ ਢਿੱਲ ਦਿੱਤੀ ਗਈ ਸੀ, ਜਿਸ ਦੇ ਤਹਿਤ 100 ਲੋਕਾਂ ਨੂੰ ਹਾਲ ’ਚ ਅਤੇ 200 ਲੋਕਾਂ ਨੂੰ ਲਾਅਨ ’ਚ ਇਕੱਠਾ ਕਰਨ ਦੀ ਆਗਿਆ ਦਿੱਤੀ ਗਈ ਸੀ। ਇਸ ਸਾਲ ਦੇ ਸ਼ੁਰੂ ’ਚ ਜਦੋਂ ਕੋਵਿਡ-19 ਨਾਲ ਪਾਜ਼ੇਟਿਵ ਲੋਕਾਂ ਦੀ ਗਿਣਤੀ ਇਕ ਵਾਰ ਫਿਰ ਵਧਣ ਲੱਗੀ ਤਾਂ ਇਸ ਛੋਟ ਨੂੰ ਵਾਪਸ ਲੈ ਕੇੇ ਫਿਰ 20 ਲੋਕਾਂ ਤੱਕ ਇਕੱਤਰਤਾ ਸੀਮਤ ਕਰ ਦਿੱਤੀ। ਇਸ ਨਾਲ ਫਿਰ ਮੈਰਿਜ ਪੈਲੇਸਾਂ ’ਤੇ ਸੰਕਟ ਬੱਦਲ ਛਾ ਗਏ।

ਜੇ ਫੈਕਟਰੀਆਂ, ਮਾਲਜ਼ ਖੁੱਲ੍ਹ ਸਕਦੇ ਹਨ ਤਾਂ ਮੈਰਿਜ ਪੈਲੇਸ ਕਿਉਂ ਨਹੀਂ

ਮੈਰਿਜ ਪੈਲੇਸਾਂ ਦੇ ਮਾਲਕਾਂ ਨੇ ਵਾਰ-ਵਾਰ ਪੰਜਾਬ ਦੇ ਮੁੱਖ ਮੰਤਰੀ ਨੂੰ ਅਪੀਲ ਕੀਤੀ ਕਿ ਉਹ ਉਨ੍ਹਾਂ ਨੂੰ ਸੰਕਟ ਤੋਂ ਬਾਹਰ ਕੱਢਣ। ਹੁਣ ਸਰਕਾਰ ਨੇ ਫਿਰ ਇਕ ਹੁਕਮ ਜਾਰੀ ਕੀਤਾ ਹੈ, ਜਿਸ ਦੇ ਤਹਿਤ ਹਾਲ ਵਿਚ 50 ਅਤੇ ਲਾਅਨ ਵਿਚ 100 ਲੋਕਾਂ ਨੂੰ ਇਕੱਠਾ ਕਰਨ ਦੀ ਆਗਿਆ ਦਿੱਤੀ ਗਈ ਹੈ ਪਰ ਮੈਰਿਜ ਪੈਲੇਸ ਮਾਲਕ ਇਸ ਤੋਂ ਸੰਤੁਸ਼ਟ ਨਹੀਂ ਹਨ। ਉਹ ਕਹਿੰਦੇ ਹਨ ਕਿ ਜੇ ਫੈਕਟਰੀਆਂ, ਸਿਨੇਮਾ ਹਾਲ, ਮਾਲ ਆਦਿ ਖੁੱਲ੍ਹ ਸਕਦੇ ਹਨ ਤਾਂ ਮੈਰਿਜ ਪੈਲੇਸ ਆਪਣੀ ਅੱਧੀ ਸਮਰੱਥਾ ਨਾਲ ਕਿਉਂ ਨਹੀਂ ਖੁੱਲ੍ਹ ਸਕਦੇ।

ਜਾਣਕਾਰੀ ਅਨੁਸਾਰ, ਪੰਜਾਬ ਵਿਚ ਤਕਰੀਬਨ 3500 ਰਜਿਸਟਰਡ ਮੈਰਿਜ ਪੈਲੇਸ ਅਤੇ ਰਿਜ਼ੋਰਟਸ ਹਨ। ਇਥੇ ਲਗਭਗ 2000 ਅਜਿਹੇ ਮੈਰਿਜ ਪੈਲੇਸ ਅਤੇ ਰਿਜ਼ੋਰਟਸ ਹਨ, ਜਿਨ੍ਹਾਂ ਕੋਲ ਰਜਿਸਟ੍ਰੇਸ਼ਨ ਨਹੀਂ ਹੈ। ਲਗਭਗ 130 ਵਿਆਹ ਪੈਲੇਸ ਅਤੇ ਰਿਜ਼ੋਰਟ ਇਕੱਲੇ ਲੁਧਿਆਣਾ ’ਚ ਸਥਿਤ ਹਨ। ਇਸ ਸਾਲ ਅਪ੍ਰੈਲ ਅਤੇ ਮਈ ਵਿਚ, ਲੁਧਿਆਣਾ ਵਿਚ ਲਗਭਗ 1300 ਵਿਆਹ ਦੀਆਂ ਰਸਮਾਂ ਬੁੱਕ ਕੀਤੀਆਂ ਗਈਆਂ ਸਨ। ਇਨ੍ਹਾਂ ’ਚੋਂ 80 ਫੀਸਦੀ ਬੁਕਿੰਗ ਪਹਿਲਾਂ ਹੀ ਰੱਦ ਕਰ ਦਿੱਤੀ ਗਈ ਹੈ ਕਿਉਂਕਿ ਲੋਕਾਂ ਲਈ ਵਿਆਹ ਦੀ ਰਸਮ ਕਰਨ ਲਈ ਬਹੁਤ ਘੱਟ ਲੋਕਾਂ ਨੂੰ ਬੁਲਾਉਣਾ ਸੰਭਵ ਨਹੀਂ ਹੈ। ਇਨ੍ਹਾਂ ਵਿਆਹ ਸਮਾਗਮਾਂ ਦੀ ਬੁਕਿੰਗ ਰੱਦ ਕਰ ਕੇ, ਲੋਕ ਆਪਣੇ ਬੁਕਿੰਗ ਵਾਲੇ ਪੈਸੇ ਵਾਪਸ ਮੰਗ ਰਹੇ ਹਨ।

ਲੋਕ ਨੇ ਕੀਤਾ ਬਾਹਰੀ ਸੂਬਿਆਂ ’ਚ ‘ਡੈਸਟੀਨੇਸ਼ਨ ਵੈਡਿੰਗਜ਼’ ਕਰਾਉਣ ਵੱਲ ਰੁਖ਼

ਇਨ੍ਹਾਂ ਜਸ਼ਨਾਂ ਨੂੰ ਰੱਦ ਕਰਦਿਆਂ, ਲੋਕ ਗੁਆਂਢੀ ਸੂਬਿਆਂ ’ਚ ਜਾ ਰਹੇ ਹਨ ਅਤੇ ‘ਡੈਸਟੀਨੇਸ਼ਨ ਵੈਡਿੰਗਜ਼’ ਦਾ ਆਯੋਜਨ ਕਰ ਰਹੇ ਹਨ, ਜਿਨ੍ਹਾਂ ’ਚ ਹਰਿਆਣਾ, ਹਿਮਾਚਲ ਪ੍ਰਦੇਸ਼, ਰਾਜਸਥਾਨ ਅਤੇ ਜੰਮੂ ਸ਼ਾਮਲ ਹਨ। ਉਥੇ ਵਧੇਰੇ ਲੋਕਾਂ ਨੂੰ ਵਿਆਹ ਦੀਆਂ ਰਸਮਾਂ ਲਈ ਇਕੱਠੇ ਹੋਣ ਦੀ ਇਜਾਜ਼ਤ ਹੈ। ਉਦਾਹਰਣ ਵਜੋਂ ਹਰਿਆਣਾ ਦੇ ਕਿਸੇ ਵੀ ਮੈਰਿਜ ਪੈਲੇਸ ਦੇ ਹਾਲ ਵਿਚ 200 ਲੋਕ ਅਤੇ 500 ਲੋਕ ਲਾਅਨ ’ਚ ਇਕੱਠੇ ਹੋ ਸਕਦੇ ਹਨ।

ਪੰਜਾਬ ਦੇ ਮੈਰਿਜ ਪੈਲੇਸਾਂ ’ਚ ਬਣਿਆ ਉਜਾੜ ਵਰਗਾ ਮਾਹੌਲ

ਲੁਧਿਆਣਾ ’ਚ ਬਹੁਤ ਸਾਰੇ ਮੈਰਿਜ ਪੈਲੇਸਾਂ ਅਤੇ ਰਿਜ਼ੋਰਟਸ ਹਨ, ਜਿੱਥੇ ਵਿਆਹ ਦੀਆਂ 2 ਜਾਂ 3 ਰਸਮਾਂ ਇਕੋ ਸਮੇਂ ਹੋ ਸਕਦੀਆਂ ਹਨ। ਬਹੁਤ ਸਾਰੇ ਮੈਰਿਜ ਪੈਲੇਸਾਂ ਅਤੇ ਰਿਜ਼ੋਰਟਸ 2000 ਲੋਕਾਂ ਦਾ ਪ੍ਰਬੰਧ ਵੀ ਕਰਦੇ ਹਨ ਪਰ ਇਸ ਸਮੇਂ ਇਨ੍ਹਾਂ ਮੈਰਿਜ ਪੈਲੇਸਾਂ ਅਤੇ ਰਿਜ਼ੋਰਟਾਂ ਵਿਚ ਇਕ ਉਜਾੜ ਵਰਗਾ ਮਾਹੌਲ ਹੈ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਲਗਭਗ 250 ਲੋਕਾਂ ਦੀ ਰੋਜ਼ੀ-ਰੋਟੀ ਮੈਰਿਜ ਪੈਲੇਸ ਤੋਂ ਚਲਦੀ ਹੈ। ਉਨ੍ਹਾਂ ਦੇ ਭਵਿੱਖ ਦਾ ਕੀ ਬਣੇਗਾ ਜੋ ਮੈਰਿਜ ਪੈਲੇਸ ਆਪਣੀ ਅੱਧੀ ਸਮਰੱਥਾ ਦੇ ਬਾਵਜੂਦ ਵੀ ਨਹੀਂ ਖੁੱਲ੍ਹਦਾ। ਜੇ ਸਥਿਤੀ ਵਿਚ ਸੁਧਾਰ ਨਾ ਹੋਇਆ ਤਾਂ ਉਹ ਦਿਨ ਦੂਰ ਨਹੀਂ ਜਦੋਂ ਉਹ ਆਪਣਾ ਕਾਰੋਬਾਰ ਨਹੀਂ ਚਲਾ ਸਕਣਗੇ। ਕੁਝ ਕਰਮਚਾਰੀ ਪਹਿਲਾਂ ਹੀ ਗੁਆਂਢੀ ਸੂਬਿਆਂ ’ਚ ਰੋਜ਼ਗਾਰ ਲਈ ਪ੍ਰਵਾਸ ਕਰ ਚੁੱਕੇ ਹਨ ਕਿਉਂਕਿ ਉਨ੍ਹਾਂ ਦੇ ਮਾਲਕ ਕੰਮ ਤੋਂ ਬਿਨਾਂ ਆਪਣੀ ਤਨਖਾਹ ਦੇਣ ’ਚ ਅਸਮਰੱਥ ਹਨ।

ਲੁਧਿਆਣਾ ਮੈਰਿਜ ਪੈਲੇਸ ਵੈੱਲਫੇਅਰ ਐਸੋਸੀਏਸ਼ਨ ਦੇ ਪ੍ਰਧਾਨ ਅਮਰਜੀਤ ਸਿੰਘ (ਸੰਤ) ਅਤੇ ਬੁਲਾਰੇ ਵਿਕਾਸ ਸ੍ਰੀਵਾਸਤਵ ਨੇ ਸਰਕਾਰ ਨੂੰ ਬੇਨਤੀ ਕੀਤੀ ਕਿ ਉਹ ਮੈਰਿਜ ਪੈਲੇਸਾਂ ਨੂੰ ਘੱਟੋ-ਘੱਟ ਅੱਧੀ ਸਮਰੱਥਾ ਨਾਲ ਕੰਮ ਕਰਨ ਦੀ ਆਗਿਆ ਦੇਣ ਤਾਂ ਜੋ ਉਨ੍ਹਾਂ ਨੂੰ ਕੁਝ ਰਾਹਤ ਮਿਲ ਸਕੇ।