ਵੱਡੀ ਖ਼ਬਰ: ਪਾਕਿਸਤਾਨ 'ਚ ਕੈਦ ਜਲੰਧਰ ਤੇ ਲੁਧਿਆਣਾ ਦੇ ਮੁੰਡੇ ਆਉਣਗੇ ਭਾਰਤ

ਸਿੱਧਵਾਂ ਬੇਟ (ਚਾਹਲ)- ਜੁਲਾਈ 2023 ਨੂੰ ਫਿਰੋਜ਼ਪੁਰ ਦੇ ਪਿੰਡ ਗਜਨੀਵਾਲਾ ਨੇੜਿਓਾ ਸਤਲੁਜ ਦਰਿਆ ਵਿਚ ਅਚਾਨਕ ਰੁੜ ਕੇ ਪਾਕਿਸਤਾਨ ਪੁੱਜੇ ਹਰਵਿੰਦਰ ਸਿੰਘ ਪੁੱਤਰ ਮੁਖਤਿਆਰ ਸਿੰਘ ਵਾਸੀ ਪਰਜੀਆਂ ਬਿਹਾਰੀਪੁਰ (ਲੁਧਿਆਣਾ) ਅਤੇ ਰਤਨਪਾਲ ਪੁੱਤਰ ਮਹਿੰਦਰ ਸਿੰਘ ਵਾਸੀ ਖੈਹਿਰਾ ਮੁਸਤਰਕਾ ਥਾਣਾ ਮਹਿਤਪੁਰ (ਜਲੰਧਰ) ਦੇ ਮਾਮਲੇ 'ਚ ਉਸ ਸਮੇਂ ਨਵਾਂ ਮੋੜ ਆਇਆ ਜਦੋਂ ਲਾਹੌਰ ਦੀ ਇਕ ਅਦਾਲਤ ਨੇ ਕਥਿਤ ਤੌਰ 'ਤੇ ਉਨ੍ਹਾਂ ਦੀ ਰਿਹਾਈ ਅਤੇ ਦੇਸ਼ ਵਾਪਸੀ ਦਾ ਹੁਕਮ ਦਿੱਤਾ ਹੈ। ਦਰਿਆ ਵਿਚ ਰੁੜਕੇ ਪਾਕਿਸਤਾਨ ਪੁੱਜਣ 'ਤੇ ਸਰਹੱਦੀ ਰੇਂਜਰਾਂ ਦੁਆਰਾ ਉਨ੍ਹਾਂ ਨੂੰ ਕਾਬੂ ਕਰ ਲਿਆ ਗਿਆ ਸੀ ਤੇ ਜੇਲ੍ਹ ਦੀ ਸਜ਼ਾ ਕੱਟਣ ਤੇ ਢਾਈ ਸਾਲ ਬਾਅਦ 13 ਦਸੰਬਰ ਨੂੰ ਅਦਾਲਤ ਵਲੋਂ ਉਹਨਾਂ ਦੀ ਰਿਹਾਈ ਦਾ ਹੁਕਮ ਸੁਣਾਇਆ ਗਿਆ ਹੈ, ਜਿਸ ਤੋਂ ਬਾਅਦ ਉਹਨਾਂ ਦੇ ਪਰਿਵਾਰਿਕ ਮੈਂਬਰਾਂ, ਰਿਸ਼ਤੇਦਾਰਾਂ ਤੇ ਪਿੰਡ ਵਾਸੀਆਂ ਵਿਚ ਖੁਸ਼ੀ ਦਾ ਮਾਹੌਲ ਹੈ ਤੇ ਉਹਨਾਂ ਨੂੰ ਨੌਜਵਾਨਾਂ ਦੀ ਜਲਦੀ ਰਿਹਾਈ ਦੀ ਆਸ ਬੱਝੀ ਹੈ।

ਇਹ ਦੋਵੇਂ ਜੁਲਾਈ 2023 ਦੇ ਵਿਚ ਪਾਕਿ ਰੇਜ਼ਰਾਂ ਦੁਆਰਾ ਗਿ੍ਫਤਾਰ ਕੀਤੇ ਗਏ 6 ਭਾਰਤੀਆਂ ਵਿਚੋਂ ਇਕ ਸਨ, ਪਾਕਿਸਤਾਨੀ ਅਧਿਕਾਰੀਆਂ ਨੇ ਸ਼ੁਰੂ ਵਿਚ ਇਹਨਾਂ ਉਪਰ ਨਸ਼ਾ ਤਸਕਰੀ ਦੇ ਦੋਸ਼ ਲਗਾਏ ਸਨ ਜਦਕਿ ਪਰਿਵਾਰਾਂ ਨੇ ਕਿਹਾ ਹੈ ਸੀ ਕਿ ਉਹ ਦਰਿਆ ਵਿਚ ਆਏ ਹੜ੍ਹਾਂ ਕਾਰਨ ਅਚਾਨਕ ਰੁੜ ਕੇ ਪਾਕਿਸਤਾਨ ਚਲੇ ਗਏ ਸਨ। ਹਰਵਿੰਦਰ ਦੇ ਚਾਚਾ ਹਰਪਾਲ ਸਿੰਘ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਉਸ ਦੇ ਭਤੀਜੇ ਨੇ 13 ਦਸੰਬਰ ਨੂੰ ਅਦਾਲਤੀ ਸੁਣਵਾਈ ਦੀ ਖ਼ਬਰ ਸਾਂਝੀ ਕਰਨ ਲਈ ਕੋਟ ਲਖਪਤ ਜੇਲ੍ਹ ਤੋਂ ਦੋ ਵਾਰ ਫ਼ੋਨ ਕੀਤਾ। ਹਰਪਾਲ ਸਿੰਘ ਨੇ ਦੱਸਿਆ ਕਿ ਜੱਜ ਨੇ ਜੇਲ੍ਹ ਅਧਿਕਾਰੀਆਂ ਨੂੰ ਉਨ੍ਹਾਂ ਨੂੰ ਰਿਹਾਅ ਕਰਨ ਅਤੇ ਭਾਰਤ ਵਾਪਸ ਭੇਜਣ ਦਾ ਹੁਕਮ ਦਿੱਤਾ, ਕਿਉਂਕਿ ਉਨ੍ਹਾਂ ਨੇ ਆਪਣੀ ਸਜ਼ਾ ਪੂਰੀ ਕਰ ਲਈ ਹੈ।

ਪਰਿਵਾਰ ਵਲੋਂ ਰਿਹਾਈ ਦੇ ਯਤਨ ਤੇਜ ਕਰਨ ਦੀ ਮੰਗ

ਹਰਵਿੰਦਰ ਦੀ ਪਤਨੀ ਸਿੰਕਦਰ ਕੌਰ, ਸਰਪੰਚ ਜਸਵੀਰ ਸਿੰਘ ਜੱਸਾ ਤੇ ਪਿੰਡ ਵਾਸੀਆਂ ਨੇ ਕੇਂਦਰ ਤੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਨੌਜਵਾਨਾਂ ਦੀ ਜਲਦੀ ਰਿਹਾਈ ਯਤਨ ਤੇਜ ਕੀਤੇ ਜਾਣ। ਲੁਧਿਆਣਾ ਦੇ ਡਿਪਟੀ ਕਮਿਸ਼ਨਰ ਹਿਮਾਂਸ਼ੂ ਜੈਨ ਨੇ ਕਿਹਾ ਕਿ ਨੌਜਵਾਨਾਂ ਦੀ ਘਰ ਵਾਪਸੀ ਲਈ ਪਰਿਵਾਰਾਂ ਦੀ ਮੰਗ ਬੇਨਤੀ ਅਨੁਸਾਰ ਗ੍ਰਹਿ ਵਿਭਾਗ ਨੂੰ ਕੂਟਨੀਤਕ ਚੈਨਲਾਂ ਰਾਹੀਂ ਵਾਪਸੀ ਦੀ ਪ੍ਰਕਿਰਿਆ ਨੂੰ ਤੇਜ਼ ਕਰਨ ਲਈ ਲਿਖਕੇ ਭੇਜ ਦਿੱਤਾ ਗਿਆ ਹੈ।

ਹਿਰਾਸਤ ਦੌਰਾਨ ਹੋਈਆਂ ਕਈ ਪਰਿਵਾਰਿਕ ਮੈਂਬਰਾਂ ਦੀਆਂ ਮੌਤਾਂ

ਢਾਈ ਸਾਲਾਂ ਦੇ ਵਿਛੋੜੇ ਨੇ ਦੋਵਾਂ ਪਰਿਵਾਰਾਂ 'ਤੇ ਬਹੁਤ ਵੱਡਾ ਪ੍ਰਭਾਵ ਪਾਇਆ ਹੈ। ਉਨ੍ਹਾਂ ਦੀ ਗੈਰਹਾਜ਼ਰੀ ਵਿਚ ਕਈ ਪਰਿਵਾਰਕ ਮੌਤਾਂ ਹੋਈਆਂ। ਹਿਰਾਸਤ ਦੌਰਾਨ ਰਤਨਪਾਲ ਦੇ ਪਰਿਵਾਰ ਵਿੱਚੋਂ ਉਸ ਦੇ ਪਿਤਾ ਕਰਤਾਰ ਸਿੰਘ, ਮਾਤਾ ਪਿਆਰੋ ਬਾਈ ਅਤੇ ਉਸਦਾ ਭਰਾ ਵੇਦ ਪ੍ਰਕਾਸ਼ ਦੀ ਮੌਤ ਹੋਈ। ਹਰਵਿੰਦਰ ਦੇ ਪਰਿਵਾਰ ਵਿੱਚੋਂ ਉਸਦੇ ਪਿਤਾ ਮੁਖਤਿਆਰ ਸਿੰਘ ਦੀ ਇਸ ਸਾਲ ਦੇ ਸ਼ੁਰੂ ਵਿਚ ਮੌਤ ਹੋ ਗਈ, ਉਸਦੀ ਮਾਂ ਸੁਰਜੀਤ ਕੌਰ ਗੰਭੀਰ ਮਾਨਸਿਕ ਪ੍ਰੇਸ਼ਾਨੀ ਵਿਚ ਹੈ।