ਸਪੈਸ਼ਲ ਬੱਚਿਆਂ ਲਈ ਮਿਸਾਲ ਬਣੀ ਹੁਸ਼ਿਆਰਪੁਰ ਦੀ ਇੰਦਰਜੀਤ ਨੰਦਨ (ਵੀਡੀਓ)
Sunday, Nov 11, 2018 - 06:20 PM (IST)
ਹੁਸ਼ਿਆਰਪੁਰ (ਅਮਰੀਕ)— ਇੰਦਰਜੀਤ ਕੌਰ ਨੰਦਨ ਇਕ ਅਜਿਹੇ ਵਿਅਕਤੀਤੱਵ ਦੀ ਮਾਲਕ, ਜੋ ਉਨ੍ਹਾਂ ਲੱਖਾਂ ਲੋਕਾਂ ਲਈ ਮਿਸਾਲ ਹੈ, ਜੋ ਜ਼ਿੰਦਗੀ ਦੀਆਂ ਮੁਸ਼ਕਲਾਂ ਤੋਂ ਡਰ ਕੇ ਹਾਰ ਮੰਨ ਲੈਂਦੇ ਹਨ ਅਤੇ ਮੌਤ ਦੇ ਰਾਹ ਨੂੰ ਚੁਣ ਲੈਂਦੇ ਹਨ ਜਾਂ ਫਿਰ ਹਨੇਰਿਆਂ 'ਚ ਗਰਕ ਹੋ ਜਾਂਦੇ ਹਨ। ਚੱਲਣ ਤੋਂ ਅਸਮਰੱਥ ਹੁਸ਼ਿਆਰਪੁਰ ਦੀ ਵਾਸੀ ਇੰਦਰਜੀਤ ਕੌਰ ਨੇ ਜਿੱਥੇ ਖੁਦ ਦੀ ਜ਼ਿੰਦਗੀ ਨੂੰ ਆਪਣੇ ਕੰਮਾਂ ਨਾਲ ਬੁਲੰਦੀਆਂ ਦੇ ਰਾਹ ਤੋਰਿਆ, ਉਥੇ ਹੀ ਆਪਣੇ ਵਰਗੇ ਹੋਰ ਲੋਕਾਂ ਲਈ ਤਰੱਕੀ ਅਤੇ ਜ਼ਿੰਦਗੀ 'ਚ ਅੱਗੇ ਵੱਧਣ ਦੇ ਕਈ ਰਾਹ ਖੋਲ੍ਹ ਦਿੱਤੇ ਹਨ। ਇੰਦਰਜੀਤ ਦੇ ਇਸ ਵੱਡਮੁੱਲੇ ਯੋਗਦਾਨ ਲਈ 3 ਦਸੰਬਰ ਨੂੰ ਦੇਸ਼ ਦੇ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਵਲੋਂ ਰਾਸ਼ਟਰੀ ਭਵਨ 'ਚ ਉਨ੍ਹਾਂ ਨੂੰ ਸਨਮਾਨਤ ਕੀਤਾ ਜਾਵੇਗਾ। ਇੰਦਰਜੀਤ ਕੌਰ ਦੀ ਮਾਂ ਕੁੰਦਨ ਕੌਰ ਨੇ ਦੱਸਿਆ ਕਿ ਧੀ ਦਾ ਨਾਂ ਰਾਸ਼ਟਰਪਤੀ ਅਵਾਰਡ ਲਈ ਚੁਣੇ ਜਾਣ ਦੇ ਐਲਾਨ ਤੋਂ ਬਾਅਦ ਪਰਿਵਾਰ ਬੇਹੱਦ ਖੁਸ਼ ਹੈ ਅਤੇ ਸਾਰਾ ਪਰਿਵਾਰ ਧੀ 'ਤੇ ਮਾਣ ਮਹਿਸੂਸ ਕਰ ਰਿਹਾ ਹੈ।
ਦੱਸ ਦੇਈਏ ਕਿ ਇਸ ਅਜ਼ੀਮ ਸ਼ਖਸੀਅਤ ਦੇ ਹਿੱਸੇ ਸਿਰਫ ਇਹ ਹੀ ਇਕ ਅਵਾਰਡ ਨਹੀਂ ਆਇਆ ਸਗੋਂ ਇੰਦਰਜੀਤ ਨੂੰ ਇਸ ਤੋਂ ਪਹਿਲਾਂ ਵੀ ਕਈ ਸਨਮਾਨਾਂ ਨਾਲ ਨਵਾਜਿਆ ਜਾ ਚੁੱਕਿਆ ਹੈ। ਇੰਦਰਜੀਤ ਕੌਰ ਵੱਲੋਂ ਆਪਣੇ ਵਰਗੇ ਹੋਰਨਾਂ ਸਾਥੀਆਂ ਲਈ ਕਈ ਉਪਰਾਲੇ ਵੀ ਕੀਤੇ ਜਾ ਰਹੇ ਹਨ।
ਜ਼ਿਕਰਯੋਗ ਹੈ ਕਿ ਇੰਦਰਜੀਤ ਕੌਰ ਬੇਸ਼ੱਕ ਸਰੀਰਕ ਪੱਖੋਂ ਕਮਜ਼ੋਰ ਹੈ ਪਰ ਉਸ ਦੇ ਹੌਂਸਲੇ ਅਤੇ ਜਜ਼ਬੇ ਨੇ ਉਸ ਦੀ ਇਸ ਕਮਜ਼ੋਰੀ ਨੂੰ ਉਸ ਦੀ ਤਾਕਤ ਬਣਾ ਦਿੱਤਾ ਹੈ। ਅਜਿਹੀ ਉੱਘੀ ਸ਼ਖਸੀਅਤ ਦੇ ਹੌਂਸਲੇ ਨੂੰ ਦਿਲੋਂ ਸਲਾਮ ਹੈ।
