3 ਮਹੀਨਿਆਂ ਤੋਂ ਲਾਪਤਾ ਲੜਕੀ ਨੂੰ ਵਾਰਿਸਾਂ ਨਾਲ ਮਿਲਾਇਆ

ਗਿੱਦੜਬਾਹਾ -13 ਅਗਸਤ ਦੀ ਰਾਤ ਨੂੰ ਰੇਲਵੇ ਸਟੇਸ਼ਨ ਦੇ ਪਲੇਟਫਾਰਮ ਤੋਂ ਦੂਰ ਹਨੇਰੇ ਵਿਚ ਇਕ ਨੌਜਵਾਨ ਲਾਵਾਰਿਸ ਲੜਕੀ ਦੇ ਮਿਲਣ ਦੀ ਖਬਰ 'ਜਗ ਬਾਣੀ' ਦੇ ਅਦਾਰੇ ਵੱਲੋਂ 14 ਅਗਸਤ ਨੂੰ ਵਿਸਥਾਰ ਨਾਲ ਪ੍ਰਕਾਸ਼ਿਤ ਕੀਤੇ ਜਾਣ ਤੋਂ ਬਾਅਦ ਉਕਤ ਲੜਕੀ ਦੇ ਵਾਰਿਸ 16 ਅਗਸਤ ਦੀ ਰਾਤ ਨੂੰ ਗਿੱਦੜਬਾਹਾ ਦੇ ਸਿਵਲ ਹਸਪਤਾਲ ਆ ਕੇ ਉਸ ਨੂੰ ਲੈ ਗਏ। ਲੜਕੀ ਦੇ ਪਿਤਾ ਭੋਲਾ ਨਾਥ ਨਿਗਮ ਨੇ ਦੱਸਿਆ ਕਿ 17 ਸਾਲਾ ਨੌਜਵਾਨ ਲੜਕੀ ਦਾ ਨਾਂ ਮਧੂ ਨਿਗਮ ਹੈ ਅਤੇ ਉਹ ਪਿਛਲੇ 3 ਮਹੀਨਿਆਂ ਤੋਂ ਬਲੀਆ ਯੂ. ਪੀ. ਤੋਂ ਲਾਪਤਾ ਸੀ। ਉਹ 12ਵੀਂ ਤੱਕ ਦੀ ਪੜ੍ਹਾਈ ਦੌਰਾਨ ਐੱਨ. ਸੀ. ਸੀ. ਦੀ ਕਮਾਂਡੋ ਰਹਿ ਚੁੱਕੀ ਹੈ। ਬਹੁਤ ਵਧੀਆ ਇੰਗਲਿਸ਼ ਬੋਲਣ ਵਾਲੀ ਮਧੂ ਦੇ ਦਿਮਾਗ 'ਤੇ ਆਪਣੇ ਹੀ ਗੁਆਂਢੀ ਪਰਿਵਾਰ ਵੱਲੋਂ ਕੀਤੀ ਪਰਿਵਾਰਕ ਲੜਾਈ ਦਾ ਅਜਿਹਾ ਅਸਰ ਪਿਆ ਕਿ ਉਹ ਆਪਣਾ ਦਿਮਾਗੀ ਸੰਤੁਲਨ ਖੋ ਬੈਠੀ।
ਜਨ-ਕਲਿਆਣ ਸੇਵਾ ਸਮਿਤੀ ਦੀ ਸੰਚਾਲਿਕਾ ਸੰਧਿਆ ਜਿੰਦਲ, ਸਬਜ਼ੀ ਐਂਡ ਫਰੂਟ ਯੂਨੀਅਨ ਦੇ ਸਾਬਕਾ ਪ੍ਰਧਾਨ ਕੈਲਾਸ਼ ਬਿੱਟੂ ਮੌਂਗਾ ਅਤੇ ਪੰਜਾਬ ਪੁਲਸ ਸਟੇਟ ਅਪੈਕਸ ਕਮੇਟੀ ਦੇ ਸਕੱਤਰ ਦੇ ਨਾਲ-ਨਾਲ ਮੈਡੀਕਲ ਅਫਸਰ ਜਸ਼ਨ, ਮੈਡੀਕਲ ਅਫਸਰ ਨਿਤੀਸ਼ ਗੋਇਲ, ਨਰਸ ਜਗਮੀਤ ਕੌਰ ਆਦਿ ਦੇ ਯਤਨਾਂ ਸਦਕਾ ਉਕਤ ਨੌਜਵਾਨ ਲੜਕੀ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਵਿਖੇ ਦਾਖਲ ਕਰਵਾਇਆ ਗਿਆ। 'ਜਗ ਬਾਣੀ' ਵਿਚ ਪ੍ਰਕਾਸ਼ਿਤ ਖਬਰ ਨੂੰ ਸੋਸ਼ਲ ਮੀਡੀਆ ਵਿਚ ਪਾਉਣ ਤੋਂ ਬਾਅਦ ਫਗਵਾੜਾ ਸਥਿਤ ਰਹਿੰਦੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੇ ਗਿੱਦੜਬਾਹਾ ਵਿਖੇ ਪਹੁੰਚ ਕੇ 'ਜਗ ਬਾਣੀ' ਅਦਾਰੇ ਦਾ ਧੰਨਵਾਦ ਕੀਤਾ। ਐੱਸ. ਐੱਚ. ਓ. ਨਰਿੰਦਰ ਸਿੰਘ ਦੇ ਦਿਸ਼ਾ-ਨਿਰਦੇਸ਼ਾਂ ਹੇਠ ਵਾਰਿਸਾਂ ਨੂੰ ਲੜਕੀ ਸੌਂਪ ਦਿੱਤੀ ਗਈ।