ਸਟੋਰ ’ਚ ਏ. ਸੀ. ਰਿਪੇਅਰ ਕਰਦੇ ਸਮੇਂ ਧਮਾਕਾ, ਇਕ ਦੀ ਮੌਤ

ਗਡ਼੍ਹਸ਼ੰਕਰ, (ਸ਼ੋਰੀ)- ਇੱਥੋਂ ਦੀ ਸਬਜ਼ੀ ਮੰਡੀ ਵਿਚ ਕੇਲਿਆਂ ਦੇ ਇਕ ਸਟੋਰ ਵਿਚ ਲੱਗੇ ਏ. ਸੀ. ਨੂੰ ਰਿਪੇਅਰ ਕਰਦੇ ਸਮੇਂ ਹੋਏ ਧਮਾਕੇ ਵਿਚ ਇਕ ਵਿਅਕਤੀ ਦੀ ਮੌਤ ਤੇ ਇਕ ਦੇ ਬੁਰੀ ਤਰ੍ਹਾਂ ਜ਼ਖਮੀ ਹੋ ਜਾਣ ਦਾ ਸਮਾਚਾਰ ਹੈ। ਜਾਣਕਾਰੀ ਅਨੁਸਾਰ ਹਰਿਆਣਾ ਦੇ ਰੋਹਤਕ ਤੋਂ ਆਏ ਏ. ਸੀ. ਮਕੈਨਿਕ ਸੁਰਿੰਦਰ ਸਿੰਘ ਪੁੱਤਰ ਓਮ ਪ੍ਰਕਾਸ਼ (32) ਨਿਵਾਸੀ ਰੁਡ਼ਕੀ, ਰੋਹਤਕ (ਹਰਿਆਣਾ) ਦੀ ਇਸ ਧਮਾਕੇ ਵਿਚ ਮੌਤ ਹੋ ਗਈ, ਜਦਕਿ ਉਸ ਦਾ ਸਾਥੀ ਆਂਚਲ ਪੁੱਤਰ ਰਾਜਿੰਦਰ ਨਿਵਾਸੀ ਰੋਹਤਕ ਬੁਰੀ ਤਰ੍ਹਾਂ ਝੁਲਸ ਗਿਆ। ਇਨ੍ਹਾਂ ਦਾ ਇਕ ਹੋਰ ਸਾਥੀ ਸੰਦੀਪ ਇਸ ਹਾਦਸੇ ਵਿਚ ਵਾਲ-ਵਾਲ ਬਚ ਗਿਆ।
ਇਸ ਘਟਨਾ ਦੇ ਕੁਝ ਪਲਾਂ ਦੇ ਅੰਦਰ ਹੀ ਡੀ.ਐੱਸ.ਪੀ. ਗਡ਼੍ਹਸ਼ੰਕਰ ਸਤੀਸ਼ ਕੁਮਾਰ ਅਤੇ ਐੱਸ.ਐੱਚ.ਓ. ਗਡ਼੍ਹਸ਼ੰਕਰ ਇਕਬਾਲ ਸਿੰਘ ਮੌਕੇ ’ਤੇ ਪਹੁੰਚ ਗਏ। ਸਟੋਰ ਦੇ ਮਾਲਕ ਨੌਸ਼ਾਦ ਪੁੱਤਰ ਅਲਾਹੂਦੀਨ ਨਿਵਾਸੀ ਬਡਾਲਾ ਸ਼ਾਮਲੀ, ਮੁਜ਼ੱਫਰਨਗਰ (ਉੱਤਰ ਪ੍ਰਦੇਸ਼) ਨੇ ਦੱਸਿਆ ਕਿ ਉਹ ਲੋਕ ਪਿਛਲੇ ਤਿੰਨ ਸਾਲਾਂ ਤੋਂ ਇੱਥੇ ਕੇਲਿਆਂ ਦੇ ਸਟੋਰ ਦਾ ਕੰਮ ਕਰ ਰਹੇ ਹਨ ਅਤੇ ਏ. ਸੀ. ਦੀ ਰਿਪੇਅਰ ਲਈ ਉਨ੍ਹਾਂ ਨੇ ਇਨ੍ਹਾਂ ਮਕੈਨਿਕਾਂ ਨੂੰ ਸੱਦਿਆ ਹੋਇਆ ਸੀ। ਰਿਪੇਅਰ ਦੌਰਾਨ ਇਕ ਏ. ਸੀ. ਦਾ ਕੰਮ ਇਨ੍ਹਾਂ ਨੇ ਠੀਕ ਕਰ ਲਿਆ ਸੀ ਤੇ ਜਦ ਅੱਗੇ ਕੰਮ ਕਰਨ ਲੱਗੇ ਤਾਂ ਅਚਾਨਕ ਇਕ ਏ. ਸੀ. ਵਿਚ ਧਮਾਕਾ ਹੋ ਗਿਆ, ਜਿਸ ਕਾਰਨ ਇਹ ਹਾਦਸਾ ਵਾਪਰ ਗਿਆ। ਜ਼ਖਮੀ ਆਂਚਲ ਦਾ ਇਲਾਜ ਸਰਕਾਰੀ ਹਸਪਤਾਲ ਵਿਚ ਚਲ ਰਿਹਾ ਸੀ ਅਤੇ ਮ੍ਰਿਤਕ ਦੀ ਦੇਹ ਲਾਸ਼ਘਰ ਵਿਚ ਰੱਖੀ ਗਈ ਸੀ।