ਜੋ ਹੋ ਖੁੱਲ੍ਹ ਕੇ ਸਾਹਮਣੇ ਆਓ ਫਿਰ ਮਿਲਣਗੇ ਹੱਕ : ਡ੍ਰੈਗ ਕੁਈਨ ਰੋਵੀਨਾ

ਚੰਡੀਗੜ੍ਹ (ਬਿਊਰੋ)- ਐਲ.ਜੀ.ਬੀ.ਟੀ. ਕਮਿਊਨਿਟੀ ਨੂੰ ਇਕ ਵੱਖਰੀ ਪਛਾਣ ਦਿਵਾਉਣ ਦੇ ਮੰਤਵ ਨਾਲ ਕੰਮ ਕਰ ਰਹੇ ਰੋਬਿਨ ਸ਼ਰਮਾ ਜੋ ਕਿ ਰੋਵੀਨਾ ਟੈਂਪੋਨ ਦੇ ਨਾਂ ਨਾਲ ਵੀ ਜਾਣੇ ਜਾਂਦੇ ਹਨ, ਦਾ ਕਹਿਣਾ ਹੈ ਕਿ ਇਸ ਕਮਿਊਨਿਟੀ ਨਾਲ ਸਬੰਧਤ ਲੋਕਾਂ ਨੂੰ ਆਪਣੀ ਪਛਾਣ ਲੁਕਾਉਣੀ ਨਹੀਂ ਚਾਹੀਦੀ ਸਗੋਂ ਖੁਲ ਕੇ ਅੱਗੇ ਆਉਣਾ ਚਾਹੀਦਾ ਹੈ।

ਚੰਡੀਗੜ੍ਹ ਵਿਚ ਆਪਣੇ ਆਪ ਵਿਚ ਪਹਿਲੇ ਡ੍ਰੈਗ ਕੁਈਨ ਕੰਸੈਪਟ ਨੂੰ ਲੈ ਕੇ ਆਏ ਰੋਵੀਨਾ ਨੇ ਦੱਸਿਆ ਕਿ ਉਨ੍ਹਾਂ ਨੇ ਡ੍ਰੈਗ ਕੁਈਨ ਕੰਸੈਪਟ ਦੀ ਕੁਝ ਮਹੀਨੇ ਪਹਿਲਾਂ ਹੀ ਸ਼ੁਰੂਆਤ ਕੀਤੀ ਹੈ। ਇਹ ਕੰਸੈਪਟ ਅਸਲ ਵਿਚ ਰੂਪੋਲ ਡ੍ਰੈਗ ਰੇਸ ’ਤੇ ਸ਼ੁਰੂ ਹੋਇਆ ਸੀ, ਜੋ ਕਿ ਵਿਦੇਸ਼ਾਂ ਵਿਚ ਕਾਫੀ ਪ੍ਰਸਿੱਧ ਹੈ। ਇਕ ਚੈਨਲ ਨੂੰ ਦਿੱਤੇ ਇੰਟਰਵਿਊ ਵਿਚ ਰੋਵੀਨਾ ਨੇ ਦੱਸਿਆ ਕਿ ਮੇਰਾ ਮੰਤਵ ਹੈ ਕਿ ਐਲ.ਜੀ.ਬੀ. ਟੀ. ਕਮਿਊਨਿਟੀ ਦੇ ਲੋਕ ਖੁਲ ਕੇ ਅੱਗੇ ਆਉਣ ਅਤੇ ਕਮਿਊਨਿਟੀ ਨਾਲ ਸਬੰਧਿਤ ਸੀ.ਡੀ. (ਕ੍ਰਾਸ ਡਰੈਸਰ) ਸਿਰਫ ਰਾਤ ਨੂੰ ਘਰੋਂ ਬਾਹਰ ਨਿਕਲਣ ਨੂੰ ਮਜਬੂਰ ਨਾ ਰਹਿਣ। ਸਗੋਂ ਜਿਸ ਖਿੱਤੇ ਵਿਚ ਉਹ ਮੁਹਾਰਤ ਰੱਖਦੇ ਹਨ ਉਸ ਖਿੱਤੇ ਵਿਚ ਉਹ ਨਾਮ ਕਮਾਉਣ।

ਰੋਵੀਨਾ ਨੇ ਕਿਹਾ ਕਿ ਮੈਂ ਇਹ ਨਹੀਂ ਕਿਹਾ ਕਿ ਸਭ ਡ੍ਰੈਗ ਕੁਈਨ ਹੀ ਬਣ ਜਾਣ ਕਿਉਂਕਿ ਸਭ ਕੋਲ ਇਸ ਤਰ੍ਹਾਂ ਦੀ ਕਲਾ ਨਹੀਂ ਹੈ ਪਰ ਜੋ ਉਹ ਕਰਨਾ ਚਾਹੁੰਦੇ ਹਨ ਉਹ ਜ਼ਰੂਰ ਕਰਨ। ਜਦੋਂ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਤੁਸੀਂ ਦੇਸ਼ ਦੇ ਇਕ ਛੋਟੇ ਸ਼ਹਿਰ ਤੋਂ ਇਸ ਕੰਸੈਪਟ ਦੀ ਸ਼ੁਰੂਆਤ ਕੀਤੀ ਹੈ, ਤੁਹਾਨੂੰ ਔਕੜਾਂ ਦਾ ਸਾਹਮਣਾ ਤਾਂ ਨਹੀਂ ਕਰਨਾ ਪੈ ਰਿਹਾ ਤਾਂ ਉਨ੍ਹਾਂ ਕਿਹਾ ਕਿ ਚੰਡੀਗੜ੍ਹ ਨੂੰ ਇਸ ਲਈ ਚੁਣਿਆ ਕਿਉਂਕਿ ਚੰਡੀਗੜ ਵਿਚ ਐਲ.ਜੀ.ਬੀ.ਟੀ. ਕਮਿਊਨਿਟੀ ਵੈਲਫੇਅਰ ਬੋਰਡ ਸਥਾਪਿਤ ਹੈ। ਫਿਰ ਚੰਡੀਗੜ ਦੀ ਚੋਣ ਕਿਉਂ ਨਹੀਂ।

ਮੈਂ ਕੁਝ ਲੋਕਾਂ ਨਾਲ ਮਿਲ ਕੇ ਕੋਸ਼ਿਸ਼ ਵਿਚ ਹਾਂ ਕਿ ਹਰ ਇਕ ਸੈਕਸੁਐਲਿਟੀ ਨੂੰ ਇਕ ਪਲੇਟਫਾਮ ’ਤੇ ਲਿਆਂਦਾ ਜਾ ਸਕੇ ਅਤੇ ਅਜਿਹੇ ਲੋਕਾਂ ਨੂੰ ਇਕ ਮੌਕਾ ਉਪਲਬਧ ਕਰਵਾ ਸਕੀਏ ਤਾਂ ਜੋ ਉਹ ਸਮਾਜ ਵਿਚ ਬਰਾਬਰਤਾ ਦਾ ਹੱਕ ਹਾਸਲ ਕਰ ਸਕਣ। ਇਹ ਸਮਾਂ ਡ੍ਰੈਗ ਕਵੀਨ ਦਾ ਨਹੀਂ ਸਗੋਂ ਡ੍ਰੈਗ ਕਲਚਰ ਦਾ ਹੈ।

ਰੋਵੀਨਾ ਨੇ ਦੱਸਿਆ ਕਿ ਡ੍ਰੈਗ ਸ਼ਬਦ ਦਾ ਮਤਲਬ ਹੈ ਇਕ ਕਲਾ, ਜੋ ਹਰ ਕੋਈ ਨਹੀਂ ਕਰ ਸਕਦਾ ਪਰ ਜੋ ਕਰਦਾ ਹੈ ਉਹ ਇਕ ਕੁਈਨ ਹੈ। ਇਹ ਸਾਡੇ ਲਈ ਇਕ ਨਵਾਂ ਕੰਸੈਪਟ ਹੈ। ਜਿਸ ਤਰ੍ਹਾਂ ਸਾਨੂੰ ਐਲ.ਜੀ.ਬੀ.ਟੀ. ਦੇ ਹੱਕ ਹਾਸਲ ਕਰਨ ਵਿਚ ਸਮਾਂ ਲੱਗਾ ਹੈ ਉਸੇ ਤਰ੍ਹਾਂ ਡ੍ਰੈਗ ਕੁਈਨ ਕੰਸੈਪਟ ਨੂੰ ਅਜੇ ਥੋੜ੍ਹਾ ਸਮਾਂ ਲੱਗ ਸਕਦਾ ਹੈ। ਰੋਵੀਨਾ ਨੇ ਕਿਹਾ ਕਿ ਸਾਨੂੰ ਆਪਣੀ ਪਛਾਣ ਨੂੰ ਲੁਕਾਉਣਾ ਨਹੀਂ ਚਾਹੀਦਾ ਅਤੇ ਅਸੀਂ ਜੋ ਵੀ ਹਾਂ ਸਾਨੂੰ ਉਸ ਨੂੰ ਸਾਰਿਆਂ ਸਾਹਮਣੇ ਪੇਸ਼ ਕਰਨਾ ਚਾਹੀਦਾ ਹੈ, ਬਸ ਇਹ ਹੀ ਡ੍ਰੈਗ ਕੁਈਨ, ਜਿਸ ਨੂੰ ਲੋਕ ਹੌਲੀ-ਹੌਲੀ ਜਾਣਨਗੇ ਅਤੇ ਪਸੰਦ ਵੀ ਕਰਨਗੇ।