ਕਤਲਾਂ ਦੇ ਦੋਸ਼ੀ ਵੱਲੋਂ ਪੁਲਸ ਜੀਪ ਦੇ ਡਰਾਈਵਰ ਨਾਲ ਹੱਥੋਪਾਈ

ਜ਼ੀਰਾ(ਗੁਰਮੇਲ, ਅਕਾਲੀਆਂਵਾਲਾ)—ਜ਼ੀਰਾ ਤੋਂ ਫਿਰੋਜ਼ਪੁਰ ਇਕ ਦੋਸ਼ੀ ਨੂੰ ਲਿਜਾ ਰਹੀ ਪੁਲਸ ਜੀਪ 'ਚ ਡਰਾਈਵਰ ਨਾਲ ਹੱਥੋਪਾਈ ਕਰ ਕੇ ਦੋਸ਼ੀ ਨੇ ਜੀਪ ਦਾ ਸਾਹਮਣੇ ਤੋਂ ਆ ਰਹੀ ਬੱਸ ਨਾਲ ਐਂਕਸੀਡੈਂਟ ਕਰਵਾ ਦਿੱਤਾ, ਜਿਸ ਕਾਰਨ ਸੰਤੁਲਨ ਵਿਗੜਣ ਨਾਲ ਜੀਪ ਅਤੇ ਬੱਸ ਦੋਨੋਂ ਪਲਟ ਗਈਆਂ ਅਤੇ ਇਸ ਹਾਦਸੇ ਦੌਰਾਨ ਕੋਈ ਡੇਢ ਦਰਜਨ ਦੇ ਕਰੀਬ ਸਵਾਰੀਆਂ ਗੰਭੀਰ ਜ਼ਖਮੀ ਹੋ ਗਈਆਂ। ਜਾਣਕਾਰੀ ਅਨੁਸਾਰ ਮਲੂਕ ਸਿੰਘ ਪੁੱਤਰ ਗੁਰਬਚਨ ਸਿੰਘ ਵਾਸੀ ਢੋਲੇਵਾਲਾ ਨੂੰ ਜ਼ੀਰਾ ਦੀ ਇਲਾਹਾਬਾਦ ਬੈਂਕ 'ਚ ਸਾਢੇ ਬਾਰ੍ਹਾਂ ਲੱਖ ਦੀ ਡਕੈਤੀ ਮਾਮਲੇ ਵਿਚ ਕਾਬੂ ਕੀਤਾ ਗਿਆ ਸੀ। ਇਸ ਤੋਂ ਇਲਾਵਾ ਉਹ ਸੱਤ ਕਤਲਾਂ ਦੇ ਦੋਸ਼ ਵਿਚ ਸਜ਼ਾ ਕੱਟ ਰਿਹਾ ਸੀ ਅਤੇ 2009 ਵਿਚ ਪੈਰੋਲ 'ਤੇ ਛੁੱਟੀ ਆਉਣ ਤੋਂ ਬਾਅਦ ਭਗੌੜਾ ਸੀ। ਸਿਟੀ ਪੁਲਸ ਨੇ ਉਸਨੂੰ ਡਕੈਤੀ ਮਾਮਲੇ 'ਚ ਗ੍ਰਿਫਤਾਰ ਕੀਤਾ ਸੀ ਅਤੇ ਪੁੱਛਗਿੱਛ ਲਈ ਪੁਲਸ ਜੀਪ 'ਚ ਸੀ. ਆਈ. ਸਟਾਫ਼ ਫਿਰੋਜ਼ਪੁਰ ਲਿਜਾਇਆ ਜਾ ਰਿਹਾ ਸੀ ਕਿ ਪਿੰਡ ਸ਼ੂਸ਼ਕ ਕੋਲ ਉਸਨੇ ਜੀਪ ਡਰਾਈਵਰ ਮੁਲਾਜ਼ਮ ਨਾਲ ਹੱਥੋਪਾਈ ਕਰ ਕੇ ਜੀਪ ਦਾ ਸਟੇਅਰਿੰਗ ਘੁਮਾ ਦਿੱਤਾ, ਜਿਸ ਕਾਰਨ ਜੀਪ ਸਾਹਮਣੇ ਤੋਂ ਆ ਰਹੀ ਬੱਸ ਵਿਚ ਟਕਰਾਉਣ ਨਾਲ  ਜੀਪ ਅਤੇ ਬੱਸ ਦੋਨੋਂ ਪਲਟ ਗਈਆਂ ਅਤੇ ਲਗਭਗ ਡੇਢ ਦਰਜਨ ਦੇ ਕਰੀਬ ਸਵਾਰੀਆਂ ਗੰਭੀਰ ਰੂਪ 'ਚ ਜ਼ਖਮੀ ਹੋ ਗਈਆਂ, ਜਿਨ੍ਹਾਂ ਵਿਚ ਪੁਲਸ ਮੁਲਾਜ਼ਮ ਬਲਰਾਜ ਸਿੰਘ, ਲੱਖਾ ਸਿੰਘ, ਗੁਰਜੀਤ ਸਿੰਘ ਅਤੇ ਸੱਤਪਾਲ ਸਿੰਘ ਜ਼ਖਮੀ ਹੋ ਗਏ। ਇਸ ਤੋਂ ਇਲਾਵਾ ਮੁਕੇਸ਼ ਕੁਮਾਰ ਪੁੱਤਰ ਭਗਵਾਨ ਦਾਸ ਵਾਸੀ ਜੰਮੂ, ਪ੍ਰਵੀਨ ਪੁੱਤਰ ਚਰਨਦਾਸ ਵਾਸੀ ਜੰਮੂ, ਭੋਲੀ ਪਤਨੀ ਤਰਸੇਮ ਸਿੰਘ ਵਾਸੀ ਫਤਿਹਗੜ੍ਹ ਪੰਜਤੂਰ, ਮੁਨੀਸ਼ ਪੁੱਤਰ ਹਾਰਫ ਵਾਸੀ ਫਿਰੋਜ਼ਪੁਰ, ਗੀਤਾ ਪਤਨੀ ਬੱਗਾ ਸਿੰਘ ਵਾਸੀ ਕੁੱਲਗੜ੍ਹੀ, ਜਸਵਿੰਦਰ ਕੌਰ ਪਤਨੀ ਗੁਰਨਾਮ ਸਿੰਘ ਵਾਸੀ ਖੋਸਾ ਦਲ ਸਿੰਘ, ਵਿੱਦਿਆ, ਅਮਰਜੀਤ ਕੌਰ ਪਤਨੀ ਕਸ਼ਮੀਰ ਸਿੰਘ ਵਾਸੀ ਨਸੀਰੇਵਾਲਾ ਗੰਭੀਰ ਜ਼ਖਮੀ ਹੋ ਗਏ, ਜਿਨ੍ਹਾਂ ਨੂੰ ਸਿਵਲ ਹਸਪਤਾਲ ਜ਼ੀਰਾ ਅਤੇ ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਕਾਲਜ ਫਰੀਦਕੋਟ ਵਿਖੇ ਭੇਜਿਆ ਗਿਆ। ਦੱਸਣਯੋਗ ਹੈ ਕਿ ਸਮੁੱਚੇ ਘਟਨਾਕ੍ਰਮ ਦੌਰਾਨ ਭੱਜਣ ਦੀ ਕੋਸ਼ਿਸ਼ ਕਰਨ ਵਾਲੇ ਦੋਸ਼ੀ ਨੂੰ ਪੁਲਸ ਨੇ ਮੁਸ਼ਤੈਦੀ ਨਾਲ ਕਾਬੂ ਕਰੀ ਰੱਖਿਆ ਅਤੇ ਉਹ ਭੱਜਣ ਵਿਚ ਸਫਲ ਨਹੀਂ ਹੋ ਸਕਿਆ।