ਰਨਵੇ ਬਣਾਉਣ ਲਈ ਅਥਾਰਟੀ ਨੇ ਕਈ ਫਲਾਈਟਾਂ ਕੀਤੀਆਂ ਰੱਦ, ਵਧਿਆ 40 ਤੋਂ 45 ਫੀਸਦੀ ਕਿਰਾਇਆ

ਚੰਡੀਗੜ੍ਹ (ਲਲਨ)-ਚੰਡੀਗੜ੍ਹ ਕੌਮਾਂਤਰੀ ਹਵਾਈ ਅੱਡੇ 'ਤੇ ਰਨਵੇ ਦੀ ਮੁਰੰਮਤ ਅਤੇ ਆਈ. ਐੱਲ. ਐੱਸ. ਕੈਟ-3 ਦੇ ਇੰਸਟਾਲ ਨੂੰ ਲੈ ਕੇ ਹਵਾਈ ਅੱਡਾ ਅਥਾਰਟੀ ਵੱਲੋਂ ਜਾਰੀ ਨਵੇਂ ਸ਼ਡਿਊਲ 'ਚ 9 ਫਲਾਈਟਾਂ ਨੂੰ ਰੱਦ ਕਰਨ ਕਾਰਨ ਇਸ ਦਾ ਬੋਝ ਯਾਤਰੀਆਂ ਦੀ ਜੇਬ 'ਤੇ ਪੈ ਰਿਹਾ ਹੈ, ਜਿਸ ਕਾਰਨ ਚੰਡੀਗੜ੍ਹ ਕੌਮਾਂਤਰੀ ਹਵਾਈ ਅੱਡੇ ਤੋਂ ਮੁੰਬਈ ਅਤੇ ਦਿੱਲੀ ਜਾਣ ਦੇ ਕਿਰਾਏ 'ਚ 40-45 ਫੀਸਦੀ ਵਾਧਾ ਹੋਇਆ ਹੈ। ਯਾਤਰੀਆਂ ਦੀ ਜੇਬ 'ਤੇ ਇਹ ਬੋਝ ਲਗਭਗ 28 ਅਕਤੂਬਰ ਤੱਕ ਪਵੇਗਾ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜੇਕਰ ਰਨਵੇ ਦੀ ਰਿਪੇਅਰ ਤੇ ਕੈਟ-3 ਦੀ ਇੰਸਟਾਲ ਦਾ ਕੰਮ ਪੂਰਾ ਨਹੀਂ ਹੋਇਆ ਤਾਂ ਇਹ ਸ਼ਡਿਊਲ ਅੱਗੇ ਵੀ ਵਧਾਇਆ ਜਾ ਸਕਦਾ ਹੈ।
ਨਵੇਂ ਸ਼ਡਿਊਲ ਮੁਤਾਬਕ ਹੁਣ ਇੰਟਰਨੈਸ਼ਨਲ ਹਵਾਈ ਅੱਡੇ ਤੋਂ ਪਹਿਲੀ ਫਲਾਈਟ ਸਵੇਰੇ 7.35 ਵਜੇ ਉਡਾਣ ਭਰੇਗੀ ਅਤੇ ਆਖਰੀ ਫਲਾਈਟ ਬਾਅਦ ਦੁਪਹਿਰ 3.35 ਵਜੇ। ਉਥੇ ਹੀ ਹੁਣ ਮਿਲੀ ਜਾਣਕਾਰੀ ਮੁਤਾਬਕ 8, 15 ਅਤੇ 22 ਅਕਤੂਬਰ ਨੂੰ ਪੈਣ ਵਾਲੇ ਐਤਵਾਰਾਂ ਨੂੰ ਪੂਰਾ ਦਿਨ ਹਵਾਈ ਅੱਡੇ ਤੋਂ ਕੋਈ ਵੀ ਫਲਾਈਟ ਉਡਾਣ ਨਹੀਂ ਭਰੇਗੀ।
ਹਵਾਈ ਅੱਡਾ ਅਥਾਰਟੀ ਵੱਲੋਂ ਨਵੇਂ ਸ਼ਡਿਊਲ 'ਚ ਜਿਹੜੀਆਂ 9 ਫਲਾਈਟਾਂ ਨੂੰ ਰੱਦ ਐਲਾਨਿਆ ਗਿਆ ਹੈ, ਉਨ੍ਹਾਂ 'ਚ ਚੰਡੀਗੜ੍ਹ-ਦਿੱਲੀ ਦੀਆਂ 4 ਫਲਾਈਟਾਂ ਹਨ, ਜਦੋਂਕਿ ਮੁੰਬਈ ਦੀ ਇੰਡੀਗੋ, ਗੋ-ਏਅਰ ਅਤੇ ਸਪਾਈਸ ਜੈਟ ਦੀ 1-1 ਫਲਾਈਟ ਸ਼ਾਮਲ ਹੈ। ਇੰਡੀਗੋ ਦੀ ਸ਼੍ਰੀਨਗਰ ਅਤੇ ਬੈਂਗਲੁਰੂ ਦੀ 1-1 ਫਲਾਈਟ ਰੱਦ ਹੋਈ ਹੈ। ਇਨ੍ਹਾਂ ਫਲਾਈਟਾਂ ਦੇ ਬੰਦ ਹੋਣ ਕਾਰਨ ਜਿਹੜੀਆਂ ਫਲਾਈਟਾਂ ਚੱਲ ਰਹੀਆਂ ਹਨ, ਉਨ੍ਹਾਂ ਦੇ ਕਿਰਾਏ 'ਚ 40-45 ਫੀਸਦੀ ਦਾ ਵਾਧਾ ਹੋਇਆ ਹੈ। ਇਸ ਸਬੰਧ 'ਚ ਟੂਰ ਐਂਡ ਟ੍ਰੈਵਲ ਕੰਪਨੀ ਸੰਚਾਲਕਾਂ ਦਾ ਕਹਿਣਾ ਹੈ ਕਿ ਦਿੱਲੀ ਦੀ ਜਿਹੜੀ ਟਿਕਟ ਪਹਿਲਾਂ 1500 ਤੋਂ 2000 ਰੁਪਏ ਦੀ ਬਣਦੀ ਸੀ, ਉਹ ਟਿਕਟ ਹੁਣ 3000-4000 ਰੁਪਏ ਦੀ ਬਣ ਰਹੀ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਮੁੰਬਈ ਦੀ ਟਿਕਟ ਪਹਿਲਾਂ ਆਉਣ-ਜਾਣ ਦੀ 6 ਤੋਂ 7 ਹਜ਼ਾਰ ਰੁਪਏ ਦੀ ਬਣਦੀ ਸੀ, ਹੁਣ ਉਹ ਵਧ ਕੇ 13500 ਰੁਪਏ ਦੀ ਬਣ ਰਹੀ ਹੈ। ਵੇਖਿਆ ਜਾਏ ਤਾਂ ਇਸ ਦਾ ਸਿੱਧਾ ਅਸਰ ਯਾਤਰੀਆਂ ਦੀ ਜੇਬ 'ਤੇ ਪੈ ਰਿਹਾ ਹੈ।

ਚੰਡੀਗੜ੍ਹ ਕੌਮਾਂਤਰੀ ਹਵਾਈ ਅੱਡੇ ਦੇ ਰਨਵੇ ਤੇ ਆਈ. ਐੱਲ. ਐੱਸ. ਕੈਟ-3 ਦੇ ਇੰਸਟਾਲ ਲਈ ਫਲਾਈਟਾਂ ਦੇ ਸ਼ਡਿਊਲ 'ਚ 3 ਤੋਂ 28 ਅਕਤੂਬਰ ਤੱਕ ਤਬਦੀਲੀ ਕੀਤੀ ਹੈ। ਇਸ ਦੌਰਾਨ 9 ਫਲਾਈਟਾਂ ਨੂੰ ਰੱਦ ਵੀ ਕੀਤਾ ਗਿਆ ਹੈ।
—ਸੁਨੀਲ ਦੱਤ, ਸੀ. ਈ. ਓ., ਚੰਡੀਗੜ੍ਹ ਕੌਮਾਂਤਰੀ ਹਵਾਈ ਅੱਡਾ

ਨਵਾਂ ਸ਼ਡਿਊਲ 28 ਅਕਤੂਬਰ ਤੱਕ ਹੋਵੇਗਾ ਫਾਲੋ