ਬਜੁਰਗ ਕਾਂਗਰਸੀ ਦੀ ਆਖਰੀ ਇੱਛਾ-ਕੈਪਟਨ ਸਾਬ੍ਹ, ਮੇਰੇ ਜਿਉਂਦੇ ਜੀ ਵਿਕਾਸ ਕਰਵਾ ਦਿਓ

ਬੁਢਲਾਡਾ (ਮਨਜੀਤ) ਸਥਾਨਕ ਸ਼ਹਿਰ ਦੇ ਥਾਂ-ਥਾਂ ਤੋਂ ਟੁੱਟੀਆਂ ਪਈਆਂ ਸੜਕਾਂ, ਗਲੀਆਂ-ਨਾਲੀਆਂ ਅਤੇ ਸੀਵਰੇਜ ਵਿਭਾਗ ਦੇ ਯੋਗ ਪ੍ਰਬੰਧ ਨਾ ਹੋਣ ਕਾਰਨ ਬੁਢਲਾਡਾ ਸ਼ਹਿਰ ਦੇ ਲੋਕ ਨਰਕ ਭਰੀ ਜਿੰਦਗੀ ਬਤੀਤ ਕਰ ਰਹੇ ਹਨ। ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਟਕਸਾਲੀ ਕਾਂਗਰਸੀ ਬਜੁਰਗ ਨੇਤਾ ਧਿਆਨ ਸਿਘ ਨੇ ਗੱਲਬਾਤ ਕਰਦਿਆਂ ਕਿਹਾ ਕਿ ਪੰਜਾਬ 'ਚ ਕਾਂਗਰਸ ਸਰਕਾਰ ਬਣਦਿਆਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਤੋਂ ਸ਼ਹਿਰ ਦੇ ਵਿਕਾਸ ਦੀ ਕਿਰਨ ਜਾਗੀ ਸੀ, ਪਰ 9 ਮਹੀਨੇ ਦਾ ਸਮਾਂ ਬਤੀਤ ਹੋਣ ਤੋਂ ਬਾਅਦ ਵੀ ਸ਼ਹਿਰ ਦੇ ਮੇਨ ਕੰਮ ਆਰੰਭ ਨਹੀ ਹੋਏ।

ਜਿਵੇਂ ਆਈ.ਟੀ.ਆਈ ਤੋਂ ਬੱਸ ਸਟੈਂਡ ਰੋਡ, ਰੇਲਵੇ ਰੋਡ, ਕੁਲਾਣਾ ਰੋਡ, ਭੀਖੀ-ਰਤੀਆ ਰੋਡ, 1 ਤੋਂ 6 ਵਾਰਡ ਦੇ ਸੀਵਰੇਜ ਦੇ ਅਧੂਰੇ ਕੰਮਾਂ ਨੂੰ ਨੇਪਰੇ ਚਾੜਣਾ ਤੇ ਸ਼ਹਿਰ 'ਚ ਪਾਰਕ ਬਣਾਉਣਾ, ਲੜਕੇ-ਲੜਕੀਆਂ ਦਾ ਸਰਕਾਰੀ ਕਾਲਜ ਬਣਾਉਣਾ, ਫਾਇਰ ਬ੍ਰਿਗੇਡ ਬੱਸਾਂ ਦਾ ਪ੍ਰਬੰਧ ਕਰਨਾ ਆਦਿ। ਉਕਤ ਬਜੁਰਗ ਆਗੂ ਨੇ ਕਿਹਾ ਕਿ ਉਨ੍ਹਾਂ ਨੇ ਆਪਣੀ ਸਾਰੀ ਉਮਰ ਕਾਂਗਰਸ ਪਾਰਟੀ ਦੀ ਸੇਵਾ 'ਚ ਲਾ ਦਿੱਤੀ ਹੈ ਕਦੇ ਵੀ ਪਾਰਟੀ 'ਚ ਸਰਕਾਰ ਬਣਨ ਤੇ ਉੱਚ ਅਹੁਦਾ ਪ੍ਰਾਪਤ ਕਰਨ ਦੀ ਇੱਛਾ ਨਹੀ ਰੱਖੀ।

ਪਰ ਹੁਣ ਆਖਰੀ ਸਮੇਂ ਦੌਰਾਨ ਸ਼ਹਿਰ ਦਾ ਸਰਬ ਪੱਖੀ ਵਿਕਾਸ ਪੰਜਾਬ ਦੇ ਮੁੱਖ ਮੰਤਰੀ ਮਹਾਰਾਜਾ ਕੈਪਟਨ ਅਮਰਿੰਦਰ ਸਿੰਘ ਦੇ ਹੱਥੋਂ ਹੋਵੇ ਇਹ ਮੇਰੇ ਮਨ ਦੀ ਇੱਛਾ ਅਤੇ ਹੋਰ ਵੀ ਕਾਂਗਰਸੀ ਵਰਕਰਾਂ ਦੀਆਂ ਭਾਵਾਨਾਵਾਂ ਸ਼ਹਿਰ ਦੇ ਵਿਕਾਸ ਨਾਲ ਜੁੜੀਆਂ ਹੋਈਆਂ ਹਨ। ਇਸ ਲਈ ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਟਕਸਾਲੀ ਕਾਂਗਰਸੀ ਵਰਕਰਾਂ ਦੀ ਭਾਵਨਾਵਾਂ ਦੀ ਕਦਰ ਕਰਦਿਆਂ ਪਹਿਲ ਦੇ ਅਧਾਰ ਤੇ ਦਿਲ ਖੋਲ ਕੇ ਗ੍ਰਾਂਟਾ ਜਾਰੀ ਕਰਨ ਤਾਂ ਕਿ ਗੁਆਂਢੀ ਸੂਬਾ ਹਰਿਆਣੇ ਦੇ ਲੋਕ ਆ ਕੇ ਵੀ ਬੁਢਲਾਡਾ ਸ਼ਹਿਰ ਵੇਖਣ ਲਈ ਮਜਬੂਰ ਹੋਣ।