''ਬੁੱਢੇ ਨਾਲੇ'' ਨੂੰ ਦੂਸ਼ਿਤ ਕਰ ਰਿਹੈ ਡਾਇੰਗ ਮਿੱਲਾਂ ਦਾ ਪਾਣੀ

ਚੰਡੀਗੜ੍ਹ : ਡਾਇੰਗ ਮਿੱਲਾਂ 'ਤੇ ਬੁੱਢੇ ਨਾਲੇ 'ਚ ਦੂਸ਼ਿਤ ਪਾਣੀ ਪਾਉਣ ਦੇ ਦੋਸ਼ ਪੰਜਾਬ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੀ ਰਿਪੋਰਟ 'ਚ ਸਹੀ ਸਾਬਿਤ ਹੋਏ ਹਨ। ਬੋਰਡ ਨੇ ਦੱਸਿਆ ਕਿ 16 ਅਜਿਹੀਆਂ ਮਿੱਲਾਂ ਪਾਈਆਂ ਗਈਆਂ ਹਨ, ਜੋ ਪਾਈਪਾਂ ਰਾਹੀਂ ਵੇਸਟੇਜ ਨੂੰ ਸਿੱਧਾ ਬੁੱਢੇ ਨਾਲੇ 'ਚ ਪਾ ਰਹੀਆਂਹਨ। ਅਜਿਹੇ 'ਚ ਉਸ ਇਲਾਕੇ ਦੇ ਅਸਿਸਟੈਂਟ ਐਨਵਾਇਰਮੈਂਟ ਇੰਜੀਨੀਅਰ ਅਤੇ ਲੁਧਿਆਣਾ ਨਿਗਮ ਦੇ ਖਿਲਾਫ ਕਾਰਵਾਈ ਕਰਨ ਦਾ ਫੈਸਲਾ ਲਿਆ ਗਿਆ ਹੈ। ਇਹ ਜਾਣਕਾਰੀ ਪੀ. ਪੀ. ਸੀ. ਬੀ. ਨੇ ਹਲਫਨਾਮੇ ਦੇ ਮਾਧਿਅਮ ਰਾਹੀਂ ਹਾਈਕੋਰਟ 'ਚ ਸੌਂਪੀ ਹੈ।

ਲੁਧਿਆਣਾ ਸੈਂਟਰਲ ਜੇਲ ਦੇ ਕੈਦੀਆਂ ਨੇ ਡਾਇੰਗ ਮਿੱਲਾਂ 'ਚੋਂ ਰਿਸਣ ਵਾਲੀਆਂ ਜ਼ਹਿਰੀਲੀਆਂ ਗੈਸਾਂ ਨਾਲ ਆਪਣੀ ਬੁਰੀ ਹਾਲਤ ਨੂੰ ਲੈ ਕੇ ਸੈਸ਼ਨ ਜੱਜ ਨੂੰ ਚਿੱਠੀ ਲਿਖੀ ਸੀ। ਚਿੱਠੀ 'ਚ ਦੱਸਿਆ ਗਿਆ ਸੀ ਕਿ ਗੈਸ ਦੇ ਮਾੜੇ ਪ੍ਰਭਾਵ ਕਾਰਨ ਵੱਡੀ ਗਿਣਤੀ 'ਚ ਕੈਦੀ ਬੀਮਾਰ ਹੋ ਰਹੇ ਹਨ ਅਤੇ ਉਨ੍ਹਾਂ ਦੀ ਹਾਲਤ ਗੰਭੀਰ ਹੁੰਦੀ ਜਾ ਰਹੀ ਹੈ। ਇਸ ਨਾਲ ਨਾ ਸਿਰਫ ਹਵਾ ਦੂਸ਼ਿਤ ਹੋ ਰਹੀ ਹੈ, ਸਗੋਂ ਪਾਣੀ 'ਤੇ ਵੀ ਬਹੁਤ ਬੁਰਾ ਪ੍ਰਭਾਵ ਪੈ ਰਿਹਾ ਹੈ। ਸੈਸ਼ਨ ਜੱਜ ਨੇ ਇਸ ਨੂੰ ਲੁਧਿਆਣਾ ਦੇ ਪ੍ਰਸ਼ਾਸਨਿਕ ਜੱਜ ਜਸਟਿਸ ਮਹਾਂਵੀਰ ਸਿੰਧੂ ਨੂੰ ਭੇਜ ਦਿੱਤਾ ਸੀ।

ਮਹਾਂਵੀਰ ਸਿੰਧੂ ਨੇ ਇਸ ਚਿੱਠੀ 'ਤੇ ਐਕਸ਼ਨ ਲੈਂਦੇ ਹੋਏ ਇਸ ਨੂੰ ਚੀਫ ਜਸਟਿਸ ਕੋਲ ਭੇਜ ਦਿੱਤਾ। ਚੀਫ ਜਸਟਿਸ ਨੇ ਇਸ ਮਾਮਲੇ ਨੂੰ ਜਨਹਿਤ ਪਟੀਸ਼ਨ ਦੇ ਤੌਰ 'ਤੇ ਸੁਣਨ ਦਾ ਫੈਸਲਾ ਲਿਆ ਅਤੇ ਅਦਾਲਤ ਦੀ ਸਹਾਇਤਾ ਨਾਲ ਐਡਵੋਕੇਟ ਐੱਚ. ਸੀ. ਅਰੋੜਾ ਨੂੰ ਐਮਿਕਸ ਕਿਊਰੀ ਨਿਯੁਕਤ ਕਰ ਦਿੱਤਾ। ਅਰੋੜਾ ਨੇ ਆਪਣੀ ਰਿਪੋਰਟ ਸੌਂਪਦੇ ਹੋਏ ਹਾਈਕੋਰਟ ਨੂੰ ਦੱਸਿਆ ਕਿ ਡਾਇੰਗ ਮਿੱਲਾਂ ਮਨਮਾਨੇ ਤਰੀਕੇ ਨਾਲ ਕੈਮਿਕਲ ਵਾਲਾ ਪਾਣੀ ਨਾਲੇ 'ਚ ਵਹਾ ਰਹੀਆਂ ਹਨ।