ਦਿੱਲੀ ਤੋਂ ਜਲੰਧਰ ਕੁੜੀ ਦੇਖਣ ਆ ਰਹੇ ਭਰਾਵਾਂ ਨਾਲ ਵਾਪਰੀ ਘਟਨਾ, ਉਹ ਹੋਇਆ ਜੋ ਸੋਚਿਆ ਨਾ ਸੀ

ਲੁਧਿਆਣਾ (ਰਿਸ਼ੀ) : ਵਿਆਹ ਲਈ ਕੁੜੀ ਦੇਖਣ ਦਿਲੀ ਤੋਂ ਜਲੰਧਰ ਆ ਰਹੇ ਦੋ ਭਰਾਵਾਂ ਨੂੰ ਐਤਵਾਰ ਸਵੇਰੇ 5 ਵਜੇ ਜਲੰਧਰ ਬਾਈਪਾਸ ਨੇੜੇ ਇੰਡੈਵਰ ਕਾਰ 'ਚ ਆਏ 6 ਨੌਜਵਾਨਾਂ ਨੇ ਲੁੱਟ ਲਿਆ। ਥਾਣਾ ਸਲੇਮ ਟਾਬਰੀ ਦੀ ਪੁਲਸ ਨੇ 1.30 ਘੰਟੇ ਬਾਅਦ ਉਕਤ ਨੌਜਵਾਨਾਂ ਵਲੋਂ ਲੁੱਟੀ ਗਈ ਡਸਟਰ ਕਾਰ ਨੂੰ ਥਾਮਾ ਹੈਬੋਵਾਲ ਦੇ ਇਲਾਕੇ ਬਚਨ ਸਿੰਘ ਨਗਰ ਵਿਚੋਂ ਬਰਾਮਦ ਕਰ ਲਿਆ। ਥਾਣਾ ਮੁਖੀ ਅਮਨਦੀਪ ਸਿੰਘ ਅਨੁਸਾਰ ਪੁਲਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਪ੍ਰਵੀਨ ਕੁਮਾਰ ਨੇ ਦੱਸਿਆ ਕਿ ਉਹ ਦਿੱਲੀ ਵਿਚ ਟਰੈਵਲ ਕੰਪਨੀ ਵਿਚ ਅਤੇ ਉਸ ਦਾ ਭਰਾ ਮੁਕੇਸ਼ ਬੈਂਗਲੂਰ ਵਿਚ ਪ੍ਰਾਈਵੇਟ ਨੌਕਰੀ ਕਰਦਾ ਹੈ। ਦੋਵੇਂ ਭਰਾ ਕਿਰਾਏ 'ਤੇ ਕਾਰ ਲੈ ਕੇ ਦਿੱਲੀ ਤੋਂ ਜਲੰਧਰ ਜਾ ਰਹੇ ਸਨ। ਜਿਥੇ ਉਸ ਲਈ ਲੜਕੀ ਦੇਖਣੀ ਸੀ।
ਸਵੇਰੇ 5 ਵਜੇ ਜਦੋਂ ਉਹ ਜਲੰਧਰ ਬਾਈਪਾਸ ਨੇੜੇ ਪਹੁੰਚੇ ਤਾਂ ਕੁਝ ਨੌਜਵਾਨਾਂ ਨੇ ਇੰਡੈਵਰ ਕਾਰ ਵਿਚ ਉਨ੍ਹਾਂ ਨੂੰ ਪਹਿਲਾਂ ਓਵਰ ਟੇਕ ਕੀਤਾ ਅਤੇ ਕੁਝ ਦੂਰੀ ਤੇ ਕਾਰ ਰੋਕ ਲਈ। ਇਸ ਦੌਰਾਂ 5-6 ਲੜਕੇ ਕਾਰ 'ਚੋਂ ਉਤਰ ਕੇ ਇਕ ਦਮ ਬਾਹਰ ਆਏ ਅਤੇ ਕੁੱਟਮਾਰ ਕਰਨ ਲੱਗ ਪਏ ਅਤੇ ਉਨ੍ਹਾਂ ਨੂੰ ਜ਼ਖਮੀ ਕਰਕੇ ਕਾਰ ਲੈ ਕੇ ਫਰਾਰ ਹੋ ਗਏ। ਘਟਨਾ ਤੋਂ ਬਾਅਦ ਉਨ੍ਹਾਂ ਨੇ ਪੁਲਸ ਕੰਟਰੋਲ ਰੂਮ 'ਚ ਫੋਨ ਕੀਤਾ। ਮੌਕੇ 'ਤੇ ਪਹੁੰਚੀ ਪੁਲਸ ਨੇ ਬਿਆਨ ਦਰਜ ਕਰਕੇ ਜਾਂਚ ਸ਼ੁਰੂ ਕੀਤੀ ਤਾਂ ਕੁਝ ਦੇਰ ਬਾਅਦ ਹੀ ਕਾਰ ਬਰਾਮਦ ਕਰ ਲਈ ਗਈ। ਪੁਲਸ ਅਨੁਸਾਰ ਲੁਟੇਰੇ ਕਾਰ ਨੂੰ ਬਚਨ ਸਿੰਘ ਮਾਰਕ ਦੇ ਇਕ ਖਾਲੀ ਪਲਾਟ ਨੇੜੇ ਖੜ੍ਹੀ ਕਰਕੇ ਫਰਾਰ ਹੋ ਗਏ। ਕਾਰ ਵਿਚੋਂ ਕੋਈ ਵੀ ਸਮਾਨ ਚੋਰੀ ਨਹੀਂ ਹੋਇਆ ਅਤੇ ਕਾਰ ਦੀ ਚਾਬੀ ਵੀ ਵਿਚ ਲੱਗੀ ਹੋਈ ਸੀ।