ਸ਼ਹੀਦ ਭਗਤ ਸਿੰਘ ਨਗਰ ''ਚ ਨੌਜਵਾਨ ਦੇ ਘਰ ''ਤੇ ਹਮਲਾ! ਬਦਮਾਸ਼ੀ ਦੀ ਵੀਡੀਓ ਸੋਸ਼ਲ ਮੀਡੀਆ ''ਤੇ ਵਾਇਰਲ

ਲੁਧਿਆਣਾ (ਰਾਜ): ਧਾਂਦਰਾ ਰੋਡ ਸਥਿਤ ਸ਼ਹੀਦ ਭਗਤ ਸਿੰਘ ਨਗਰ ਵਿਚ ਅੱਧੀ ਰਾਤ ਨੂੰ ਕਰੀਬ 10 ਤੋਂ 15 ਹਮਲਾਵਰ ਨੌਜਵਾਨਾਂ ਨੇ ਇਕ ਘਰ ਨੂੰ ਚਾਰੋਂ ਪਾਸਿਓਂ ਘੇਰ ਕੇ ਜ਼ਬਰਦਸਤ ਹਮਲਾ ਕਰ ਦਿੱਤਾ। ਬਦਮਾਸ਼ਾਂ ਨੇ ਇਲਾਕੇ ਵਿਚ ਜੰਮ ਕੇ ਗੁੰਡਾਗਰਦੀ ਕੀਤੀ ਅਤੇ ਨੌਜਵਾਨ ਦੇ ਘਰ 'ਤੇ ਪੱਥਰਾਂ ਦੀ ਬਰਸਾਤ ਕਰ ਦਿੱਤੀ। ਹਵਾ ਵਿਚ ਲਹਿਰਾਉਂਦੀਆਂ ਤਲਵਾਰਾਂ, ਲੋਹੇ ਦੀਆਂ ਰੌਡਾਂ ਅਤੇ ਡੰਡੇ ਲੈ ਕੇ ਆਏ ਇਨ੍ਹਾਂ ਬਦਮਾਸ਼ਾਂ ਨੇ ਘਰ ਦੇ ਮੁੱਖ ਗੇਟ ਨੂੰ ਬੁਰੀ ਤਰ੍ਹਾਂ ਨੁਕਸਾਨਿਆ ਅਤੇ ਦਰਵਾਜ਼ਾ ਤੋੜ ਕੇ ਅੰਦਰ ਦਾਖ਼ਲ ਹੋ ਗਏ। ਇਹ ਪੂਰੀ ਵਾਰਦਾਤ ਉੱਥੇ ਲੱਗੇ ਸੀ.ਸੀ.ਟੀ.ਵੀ. (CCTV) ਕੈਮਰੇ ਵਿਚ ਕੈਦ ਹੋ ਗਈ ਹੈ, ਜਿਸ ਦੀ ਵੀਡੀਓ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ।

ਸੜਕ ਹਾਦਸੇ ਦੀ ਮਾਮੂਲੀ ਰੰਜਿਸ਼ ਬਣੀ ਹਮਲੇ ਦਾ ਕਾਰਨ

ਪੀੜਤ ਸੰਨੀ ਕੁਮਾਰ ਅਨੁਸਾਰ ਇਹ ਵਿਵਾਦ ਇਕ ਮਾਮੂਲੀ ਸੜਕ ਹਾਦਸੇ ਤੋਂ ਸ਼ੁਰੂ ਹੋਇਆ ਸੀ। ਸੰਨੀ ਬੀਤੀ ਰਾਤ ਆਪਣੇ ਦੋਸਤ ਨਾਲ ਜਨਮਦਿਨ ਦੀ ਪਾਰਟੀ ਤੋਂ ਵਾਪਸ ਆ ਰਿਹਾ ਸੀ, ਜਦੋਂ ਰਸਤੇ ਵਿਚ ਇਕ ਬਜ਼ੁਰਗ ਦੀ ਮੋਟਰਸਾਈਕਲ ਨਾਲ ਉਨ੍ਹਾਂ ਦੀ ਟੱਕਰ ਹੋ ਗਈ। ਬਜ਼ੁਰਗ ਵੱਲੋਂ ਗਾਲੀ-ਗਲੋਚ ਕਰਨ 'ਤੇ ਜਦੋਂ ਸੰਨੀ ਨੇ ਵਿਰੋਧ ਕੀਤਾ, ਤਾਂ ਬਜ਼ੁਰਗ ਨੇ ਘਰ ਜਾ ਕੇ ਆਪਣੇ ਲੜਕਿਆਂ ਨੂੰ ਗੱਲ ਵਧਾ-ਚੜ੍ਹਾ ਕੇ ਦੱਸੀ। ਰਾਤ ਕਰੀਬ 11 ਵਜੇ ਬਜ਼ੁਰਗ ਦੇ ਲੜਕੇ ਨੇ ਦਰਜਨ ਭਰ ਅਣਪਛਾਤੇ ਨੌਜਵਾਨਾਂ ਨਾਲ ਇਕ ਕਾਰ ਅਤੇ ਚਾਰ ਮੋਟਰਸਾਈਕਲਾਂ 'ਤੇ ਸਵਾਰ ਹੋ ਕੇ ਸੰਨੀ ਦੇ ਘਰ 'ਤੇ ਹਮਲਾ ਕਰ ਦਿੱਤਾ। ਜਾਨ ਬਚਾਉਣ ਲਈ ਪੂਰਾ ਪਰਿਵਾਰ ਘਰ ਦੇ ਅੰਦਰਲੇ ਹਿੱਸੇ ਵਿਚ ਜਾ ਕੇ ਲੁਕ ਗਿਆ।

ਇਸ ਮਾਮਲੇ ਵਿਚ ਪੁਲਸ ਦਾ ਰਵੱਈਆ ਬੇਹੱਦ ਸੁਸਤ ਦਿਖਾਈ ਦੇ ਰਿਹਾ ਹੈ। ਪੀੜਤ ਪਰਿਵਾਰ ਦਾ ਦੋਸ਼ ਹੈ ਕਿ ਉਹ ਇਨਸਾਫ਼ ਲਈ ਕਈ ਵਾਰ ਪੁਲਸ ਚੌਕੀ ਦੇ ਚੱਕਰ ਕੱਟ ਚੁੱਕੇ ਹਨ, ਪਰ ਅਜੇ ਤੱਕ ਕੋਈ ਕੇਸ ਦਰਜ ਨਹੀਂ ਕੀਤਾ ਗਿਆ। ਦੂਜੇ ਪਾਸੇ, ਸਬੰਧਤ ਥਾਣੇ ਦੀ ਪੁਲਸ ਆਪਣੀ ਜ਼ਿੰਮੇਵਾਰੀ ਤੋਂ ਪੱਲਾ ਝਾੜਦਿਆਂ ਕਹਿ ਰਹੀ ਹੈ ਕਿ ਉਨ੍ਹਾਂ ਕੋਲ ਅਜੇ ਤੱਕ ਕੋਈ ਲਿਖਤੀ ਸ਼ਿਕਾਇਤ ਹੀ ਨਹੀਂ ਪਹੁੰਚੀ। ਪੁਲਸ ਦੀ ਇਸ ਢਿੱਲ-ਮੱਠ ਕਾਰਨ ਪੀੜਤ ਪਰਿਵਾਰ ਹੁਣ ਡਰ ਦੇ ਸਾਏ ਵਿਚ ਜੀਣ ਲਈ ਮਜਬੂਰ ਹੈ।