ਦਲਜੀਤ ਸਿੰਘ ਤੇ ਰਾਜਬਖਸ਼ ਨੂੰ ਪੁਲਸ ਪ੍ਰੋਟੈਕਸ਼ਨ ਵਾਰੰਟ ''ਤੇ ਲੈ ਕੇ ਆਈ

ਅਬੋਹਰ(ਸੁਨੀਲ)—ਨਗਰ ਥਾਣਾ 2 ਮੁਖੀ ਚੰਦਰਸ਼ੇਖਰ, ਸਹਾਇਕ ਸਬ-ਇੰਸਪੈਕਟਰ ਬਲਜਿੰਦਰ ਸਿੰਘ ਜ਼ਿਲਾ ਅਤੇ ਸੈਸ਼ਨ ਜੱਜ ਤੋਂ ਪ੍ਰੋਟੈਕਸ਼ਨ ਵਾਰੰਟ ਜਾਰੀ ਕਰਵਾ ਕੇ ਐੱਲ. ਸੀ. ਦੇ ਮਾਲਕ ਦੋ ਭਰਾਵਾਂ ਦਲਜੀਤ ਸਿੰਘ ਤੇ ਰਾਜਬਖਸ਼ ਪੁੱਤਰ ਲਖਵਿੰਦਰ ਸਿੰਘ ਸੀਤੋ ਰੋਡ ਅਬੋਹਰ ਬਾਈਪਾਸ ਨੂੰ ਜੇਲ ਤੋਂ ਲੈ ਕੇ ਆਏ। ਪੁਲਸ ਨੇ ਉਨ੍ਹਾਂ ਨੂੰ ਮਾਣਯੋਗ ਜੱਜ ਮੈਡਮ ਸਤਵੀਰ ਕੌਰ ਦੀ ਅਦਾਲਤ ਵਿਚ ਪੇਸ਼ ਕਰ ਕੇ ਦੋਵਾਂ ਦੀ ਪੁਲਸ ਰਿਮਾਂਡ ਦੀ ਮੰਗ ਕੀਤੀ ਤੇ ਹੋਰਨਾਂ ਦੋਵਾਂ ਖਿਲਾਫ ਪੁਲਸ ਨੇ ਧਾਰਾ ਵਿਚ ਵਾਧਾ ਕੀਤਾ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਨਗਰ ਥਾਣਾ ਨੰ. 2 ਦੀ ਪੁਲਸ ਨੇ ਗੋਪਾਲ ਕੰਬੋਜ ਦੇ ਬਿਆਨਾਂ ਦੇ ਆਧਾਰ 'ਤੇ ਦੋਵਾਂ ਭਰਾਵਾਂ ਦਲਜੀਤ ਸਿੰਘ ਤੇ ਰਾਜਬਖਸ਼ ਖਿਲਾਫ ਮਾਮਲਾ ਦਰਜ ਕੀਤਾ ਸੀ। ਦੋਵਾਂ ਭਰਾਵਾਂ ਨੇ ਜ਼ਿਲਾ ਪੁਲਸ ਕਪਤਾਨ ਫਾਜ਼ਿਲਕਾ ਨੂੰ ਪ੍ਰਾਰਥਨਾ ਪੱਤਰ ਦੇ ਕੇ ਜਾਂਚ ਦੀ ਮੰਗ ਕੀਤੀ ਸੀ। ਪੁਲਸ ਨੇ ਦੋਵਾਂ ਭਰਾਵਾਂ ਨੂੰ ਮੁਕੱਦਮੇ ਤੋਂ ਕੱਢ ਦਿੱਤਾ ਸੀ ਅਤੇ ਮਾਮਲੇ ਨੂੰ ਝੂਠਾ ਕਰਾਰ ਦੇ ਦਿੱਤਾ ਸੀ। ਗੋਪਾਲ ਕੰਬੋਜ ਨੇ ਆਪਣੇ ਵਕੀਲ ਹਰਪ੍ਰੀਤ ਕੰਬੋਜ ਦੇ ਮਾਧਿਅਮ ਨਾਲ ਅਦਾਲਤ ਵਿਚ ਪੇਸ਼ ਹੋ ਕੇ ਕੇਸ ਰੀਓਪਨ ਕਰਨ ਦੀ ਮੰਗ ਕੀਤੀ ਸੀ। ਮਾਣਯੋਗ ਜੱਜ ਮੈਡਮ ਸਤਵੀਰ ਕੌਰ ਨੇ ਗੋਪਾਲ ਦੇ ਵਕੀਲ ਹਰਪ੍ਰੀਤ ਦੀ ਅਪੀਲ ਨੂੰ ਮਨਜ਼ੂਰ ਕਰਦੇ ਹੋਏ ਪੁਲਸ ਨੂੰ ਦੁਬਾਰਾ ਜਾਂਚ ਕਰਨ ਦੇ ਆਦੇਸ਼ ਜਾਰੀ ਕੀਤੇ। ਇਸ ਮਾਮਲੇ ਵਿਚ ਸਹਾਇਕ ਸਬ-ਇੰਸਪੈਕਟਰ ਬਲਜਿੰਦਰ ਸਿੰਘ ਨੇ ਦੋ ਲੋਕਾਂ ਰਾਜੂ ਤੇ ਬਲਦੇਵ ਸਿੰਘ ਦੇ ਨਾਂ ਹੋਰ ਪਾਏ ਹਨ ਅਤੇ ਧਾਰਾ 365, 67, 68 ਦਾ ਵਾਧਾ ਕਰਦੇ ਹੋਏ ਦੋਵਾਂ ਭਰਾਵਾਂ ਦੇ ਜ਼ਿਲਾ ਫਾਜ਼ਿਲਕਾ ਦੀ ਸੈਸ਼ਨ ਕੋਰਟ ਤੋਂ ਪ੍ਰੋਟੈਕਸ਼ਨ ਵਾਰੰਟ ਜਾਰੀ ਕਰਵਾਏ।