ਸਮਰਾਟ ਚੌਧਰੀ ਬਿਹਾਰ ਦੇ ਚੋਟੀ ਦੇ ਅਹੁਦੇ ਲਈ ਸਭ ਤੋਂ ਅੱਗੇ ਕਿਉਂ ਹਨ?
Monday, Mar 09, 2026 - 11:30 PM (IST)
ਨੈਸ਼ਨਲ ਡੈਸਕ- ਜਿਵੇਂ-ਜਿਵੇਂ ਬਿਹਾਰ ’ਚ ਉੱਤਰਾਧਿਕਾਰ ਦੀ ਬਹਿਸ ਹੌਲੀ-ਹੌਲੀ ਜ਼ੋਰ ਫੜ ਰਹੀ ਹੈ, ਇਕ ਨਾਂ ਤੇਜ਼ੀ ਨਾਲ ਚਰਚਾ ’ਚ ਛਾਇਆ ਹੋਇਆ ਹੈ—ਸਮਰਾਟ ਚੌਧਰੀ। ਭਾਜਪਾ ਦੇ ਦਾਅਵੇਦਾਰਾਂ ਦੀ ਭੀੜ ’ਚ, ਮੌਜੂਦਾ ਡਿਪਟੀ ਚੀਫ਼ ਮਿਨਿਸਟਰ ਸੂਬੇ ਦੇ ਚੋਟੀ ਦੇ ਅਹੁਦੇ ਦੀ ਦੌੜ ’ਚ ਹੌਲੀ-ਹੌਲੀ ਅੱਗੇ ਵਧਦੇ ਦਿੱਸ ਰਹੇ ਹਨ।
ਚੌਧਰੀ ਪਹਿਲਾਂ ਹੀ ਨਿਤੀਸ਼ ਕੁਮਾਰ ਦੀ ਸਰਕਾਰ ’ਚ ਦੂਜੇ ਨੰਬਰ ’ਤੇ ਹਨ। ਇਸ ਤੋਂ ਵੀ ਜ਼ਰੂਰੀ ਗੱਲ ਇਹ ਹੈ ਕਿ ਉਨ੍ਹਾਂ ਦੇ ਕੋਲ ਪਾਵਰਫੁੱਲ ਹੋਮ ਡਿਪਾਰਟਮੈਂਟ ਹੈ ਅਤੇ ਉਨ੍ਹਾਂ ਨੂੰ ਐਡਮਿਨਿਸਟ੍ਰੇਸ਼ਨ ਦੇ ਖ਼ਾਸ ਕੰਮ ਸੰਭਾਲਦੇ ਹੋਏ ਦੇਖਿਆ ਜਾਂਦਾ ਹੈ।
ਭਾਜਪਾ ਦੀ ਸੈਂਟਰਲ ਲੀਡਰਸ਼ਿਪ ਦੇ ਨਾਲ ਚੌਧਰੀ ਦਾ ਤਾਲਮੇਲ ਵੀ ਓਨਾ ਹੀ ਜ਼ਰੂਰੀ ਹੈ। ਮੰਨਿਆ ਜਾਂਦਾ ਹੈ ਕਿ ਉਨ੍ਹਾਂ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੋਵਾਂ ਦਾ ਭਰੋਸਾ ਹਾਸਲ ਹੈ, ਨਾਲ ਹੀ ਉਹ ਨਿਤੀਸ਼ ਕੁਮਾਰ ਦੇ ਆਸ-ਪਾਸ ਜਦ (ਯੂ) ਲੀਡਰਸ਼ਿਪ ਦੇ ਨਾਲ ਵੀ ਚੰਗਾ ਤਾਲਮੇਲ ਬਣਾਈ ਰੱਖਦੇ ਹਨ।
ਬਿਹਾਰ ਦੇ ਲਗਾਤਾਰ ਬਦਲਦੇ ਸਿਆਸੀ ਮਾਹੌਲ ’ਚ, ਚੋਟੀ ਦੇ ਨੇਤਾਵਾਂ ਦੀਆਂ ਛਿਟਪੁਟ ਗੱਲਾਂ ਅਕਸਰ ਰਸਮੀ ਐਲਾਨਾਂ ਨਾਲੋਂ ਜ਼ਿਆਦਾ ਮਾਅਨੇ ਰੱਖਦੀਆਂ ਹਨ। ਸਿਆਸੀ ਜਾਣਕਾਰਾਂ ਨੂੰ ਅਜੇ ਵੀ ਅਕਤੂਬਰ 2025 ਦੇ ਅਸੈਂਬਲੀ ਇਲੈਕਸ਼ਨ ਕੈਂਪੇਨ ਦੇ ਦੌਰਾਨ ਅਮਿਤ ਸ਼ਾਹ ਦਾ ਕੀਤਾ ਗਿਆ ਇਕ ਦਿਲਚਸਪ ਕੁਮੈਂਟ ਯਾਦ ਹੈ। ਚੌਧਰੀ ਦੇ ਚੋਣ ਖੇਤਰ ’ਚ ਇਕ ਰੈਲੀ ਨੂੰ ਸੰਬੋਧਨ ਕਰਦੇ ਹੋਏ, ਸ਼ਾਹ ਨੇ ਵੋਟਰਾਂ ਨੂੰ ਉਨ੍ਹਾਂ ਦੀ ਜਿੱਤ ਪੱਕੀ ਕਰਨ ਦੀ ਅਪੀਲ ਕੀਤੀ ਅਤੇ ਫਿਰ ਇਕ ਅਜਿਹੀ ਗੱਲ ਕਹੀ ਜਿਸ ਨਾਲ ਸਿਆਸੀ ਗਲਿਆਰਿਆਂ ’ਚ ਹਲਚਲ ਮਚ ਗਈ।
ਸ਼ਾਹ ਨੇ ਕਿਹਾ ਕਿ ਉਹ ਪਹਿਲਾਂ ਹੀ ਡਿਪਟੀ ਚੀਫ਼ ਮਿਨਿਸਟਰ ਹਨ। ਆਉਣ ਵਾਲੇ ਦਿਨਾਂ ’ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਉਨ੍ਹਾਂ ਨੂੰ ਇਕ ਵੱਡਾ ਆਦਮੀ ਬਣਾਉਣ ਜਾ ਰਹੇ ਹਨ—ਇਕ ਬਹੁਤ ਵੱਡਾ ਆਦਮੀ। ਕਈ ਲੋਕਾਂ ਨੇ ਇਸ ਨੂੰ ਇਸ ਗੱਲ ਦਾ ਸੰਕੇਤ ਮੰਨਿਆ ਕਿ ਭਾਜਪਾ ਲੀਡਰਸ਼ਿਪ ਚੌਧਰੀ ਨੂੰ ਬਿਹਾਰ ਦੇ ਸਿਆਸੀ ਢਾਂਚੇ ’ਚ ਇਕ ਵੱਡੀ ਭੂਮਿਕਾ ਲਈ ਤਿਆਰ ਕਰ ਰਹੀ ਹੈ। ਜਾਤ ਦਾ ਗਣਿਤ (ਜੋ ਬਿਹਾਰ ਦੀ ਸਿਆਸਤ ਦਾ ਹਮੇਸ਼ਾ ਚੱਲਣ ਵਾਲਾ ਫੈਕਟਰ ਹੈ) ਵੀ ਉਨ੍ਹਾਂ ਦੇ ਪੱਖ ’ਚ ਕੰਮ ਕਰਦਾ ਹੈ। ਹਾਲਾਂਕਿ, ਮੈਦਾਨ ਖਾਲੀ ਨਹੀਂ ਹੈ। ਕੇਂਦਰੀ ਗ੍ਰਹਿ ਰਾਜ ਮੰਤਰੀ ਨਿਤਿਆਨੰਦ ਰਾਏ, ਦਿਲੀਪ ਜਾਇਸਵਾਲ, ਦਲਿਤ ਚਿਹਰਾ ਜਨਕ ਰਾਮ ਅਤੇ ਡਿਪਟੀ ਸੀ. ਐੱਮ. ਵਿਜੇ ਕੁਮਾਰ ਸਿਨ੍ਹਾਂ ਵਰਗੇ ਨੇਤਾਵਾਂ ’ਤੇ ਵੀ ਚਰਚਾ ਹੋ ਰਹੀ ਹੈ।
