ਬੱਚਿਆਂ ਨੇ ਤੋੜੀਆਂ ਗੁੱਲਕਾਂ ਤੇ ਮਾਂਵਾਂ ਨੇ ਭੇਜ''ਤੇ ਆਪਣੇ ਗਹਿਣੇ ! ਕਸ਼ਮੀਰ ਦੇ ਲੋਕਾਂ ਨੇ ਇੰਝ ਕੀਤੀ ਈਰਾਨ ਦੀ ਮਦਦ

ਲੇਹ- ਪੱਛਮੀ ਏਸ਼ੀਆ 'ਚ ਜਾਰੀ ਟਕਰਾਅ ਦਰਮਿਆਨ, ਲੱਦਾਖ ਅਤੇ ਜੰਮੂ-ਕਸ਼ਮੀਰ ਦੇ ਨਿਵਾਸੀ ਈਰਾਨ ਦੇ ਪ੍ਰਭਾਵਿਤ ਲੋਕਾਂ ਦੀ ਮਦਦ ਲਈ ਵੱਡੇ ਪੱਧਰ 'ਤੇ ਅੱਗੇ ਆਏ ਹਨ। ਇਨ੍ਹਾਂ ਇਲਾਕਿਆਂ 'ਚ ਲੋਕਾਂ ਵੱਲੋਂ ਨਕਦੀ, ਕੀਮਤੀ ਧਾਤਾਂ ਅਤੇ ਹੋਰ ਜ਼ਰੂਰੀ ਵਸਤੂਆਂ ਦਾਨ ਕਰਨ ਲਈ ਵਿਸ਼ੇਸ਼ ਮੁਹਿੰਮਾਂ ਚਲਾਈਆਂ ਜਾ ਰਹੀਆਂ ਹਨ। ਇਸ ਰਾਹਤ ਮਿਸ਼ਨ 'ਚ ਬੱਚਿਆਂ ਦਾ ਜਜ਼ਬਾ ਦੇਖਣਯੋਗ ਹੈ। ਲੇਹ 'ਚ ਇਕ ਛੋਟੀ ਬੱਚੀ ਨੇ ਈਰਾਨ ਦੇ ਲੋਕਾਂ ਦੀ ਮਦਦ ਲਈ ਆਪਣੀ 'ਗੁੱਲਕ' (piggy bank) ਤੋੜ ਦਿੱਤੀ, ਜਦੋਂ ਕਿ ਕਈ ਬੱਚਿਆਂ ਨੇ ਆਪਣੀਆਂ ਸਾਈਕਲਾਂ ਤੱਕ ਦਾਨ ਕਰ ਦਿੱਤੀਆਂ ਹਨ। ਰਾਮਬਨ ਜ਼ਿਲ੍ਹੇ ਦੇ ਚੰਦਰਕੋਟ 'ਚ ਵੀ ਬੱਚਿਆਂ ਨੇ ਆਪਣੀਆਂ ਗੁੱਲਕਾਂ ਰਾਹਤ ਕਾਰਜਾਂ ਲਈ ਦਿੱਤੀਆਂ। ਔਰਤਾਂ ਨੇ ਵੀ ਮਨੁੱਖਤਾ ਦੀ ਮਿਸਾਲ ਪੇਸ਼ ਕਰਦਿਆਂ ਆਪਣੇ ਸੋਨੇ-ਚਾਂਦੀ ਦੇ ਗਹਿਣੇ, ਇੱਥੋਂ ਤੱਕ ਕਿ ਆਪਣੇ ਬੱਚਿਆਂ ਦੀਆਂ ਵਾਲੀਆਂ ਅਤੇ ਚੂੜੀਆਂ ਵੀ ਦਾਨ ਕਰ ਦਿੱਤੀਆਂ ਹਨ।

ਦਾਨ ਕੀਤੀਆਂ ਜਾ ਰਹੀਆਂ ਵਸਤੂਆਂ 'ਚ ਸਿਰਫ਼ ਪੈਸੇ ਹੀ ਨਹੀਂ, ਸਗੋਂ ਘਰੇਲੂ ਵਰਤੋਂ ਦੇ ਭਾਂਡੇ ਅਤੇ ਹੋਰ ਸਮਾਨ ਵੀ ਸ਼ਾਮਲ ਹੈ। ਬਡਗਾਮ 'ਚ ਲੋਕਾਂ ਨੇ ਭਾਰੀ ਮਾਤਰਾ 'ਚ ਸੋਨਾ, ਚਾਂਦੀ ਅਤੇ ਨਕਦੀ ਇਕੱਠੀ ਕੀਤੀ ਹੈ, ਜਦੋਂ ਕਿ ਇੱਕ ਵਿਅਕਤੀ ਨੇ ਆਪਣੀ ਭੇਡ ਵੀ ਦਾਨ 'ਚ ਦੇ ਦਿੱਤੀ। ਭਾਰਤੀ ਲੋਕਾਂ ਦੀ ਇਸ ਦਰਿਆਦਿਲੀ ਨੂੰ ਦੇਖਦੇ ਹੋਏ, ਭਾਰਤ ਸਥਿਤ ਈਰਾਨੀ ਦੂਤਘਰ ਨੇ 22 ਮਾਰਚ ਨੂੰ ਭਾਰਤੀਆਂ ਦੀ "ਮਨੁੱਖਤਾ" ਅਤੇ "ਦਿਆਲਤਾ" ਲਈ ਵਿਸ਼ੇਸ਼ ਤੌਰ 'ਤੇ ਧੰਨਵਾਦ ਕੀਤਾ ਹੈ। ਦੂਤਘਰ ਨੇ ਕਿਹਾ ਕਿ ਉਹ ਕਸ਼ਮੀਰ ਦੇ ਲੋਕਾਂ ਵੱਲੋਂ ਦਿਖਾਈ ਗਈ ਇਸ ਇੱਕਜੁੱਟਤਾ ਅਤੇ ਮਾਨਵਤਾਵਾਦੀ ਸਹਿਯੋਗ ਨੂੰ ਕਦੇ ਨਹੀਂ ਭੁੱਲਣਗੇ। ਇਹ ਰਾਹਤ ਮੁਹਿੰਮ 28 ਫਰਵਰੀ ਨੂੰ ਈਰਾਨੀ ਖੇਤਰ 'ਤੇ ਹੋਏ ਅਮਰੀਕਾ-ਇਜ਼ਰਾਈਲ ਦੇ ਸਾਂਝੇ ਫੌਜੀ ਹਮਲੇ ਤੋਂ ਬਾਅਦ ਸ਼ੁਰੂ ਹੋਈ ਹੈ, ਜਿਸ 'ਚ ਈਰਾਨ ਦੇ ਸੁਪਰੀਮ ਲੀਡਰ ਆਇਤੁੱਲਾ ਅਲੀ ਖਾਮੇਨੇਈ ਅਤੇ ਹੋਰ ਸੀਨੀਅਰ ਆਗੂਆਂ ਦੀ ਮੌਤ ਹੋ ਗਈ ਸੀ। ਇਸ ਘਟਨਾ ਤੋਂ ਬਾਅਦ ਖੇਤਰ 'ਚ ਤਣਾਅ ਕਾਫੀ ਵੱਧ ਗਿਆ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e