‘ਵੋਟਰ ਕਾਰਡ ਦੇ ਨੰਬਰ ਇਕੋ ਜਿਹੇ ਹੋਣ ਦਾ ਮਤਲਬ ਵੋਟਰ ਫਰਜ਼ੀ ਨਹੀਂ’

ਨਵੀਂ ਦਿੱਲੀ- 2 ਵੱਖ-ਵੱਖ ਸੂਬਿਆਂ ਵਿਚ ਵੋਟਰਾਂ ਨੂੰ ਇਕੋ ਜਿਹੇ ਵੋਟਰ ਆਈ. ਡੀ. ਨੰਬਰ ਜਾਰੀ ਕੀਤੇ ਜਾਣ ਦੀਆਂ ਰਿਪੋਰਟਾਂ ਦੇ ਵਿਚਕਾਰ ਚੋਣ ਕਮਿਸ਼ਨ ਨੇ ਐਤਵਾਰ ਨੂੰ ਕਿਹਾ ਕਿ ਇਕੋ ਜਿਹੇ ਨੰਬਰ ਦਾ ਮਤਲਬ ਇਹ ਨਹੀਂ ਹੈ ਕਿ ਉਹ ਫਰਜ਼ੀ ਵੋਟਰ ਹਨ। ਚੋਣ ਕਮਿਸ਼ਨ ਨੇ ਇਹ ਵੀ ਕਿਹਾ ਕਿ ਕੁਝ ਵੋਟਰਾਂ ਦੇ ਵੋਟਰ ਫੋਟੋ ਪਛਾਣ ਪੱਤਰ (ਈ. ਪੀ. ਆਈ. ਸੀ.) ਨੰਬਰ ‘ਇਕੋ ਜਿਹੇ ਹੋ ਸਕਦੇ ਹਨ’ ਪਰ ਆਬਾਦੀ ਸਬੰਧੀ ਵੇਰਵੇ, ਵਿਧਾਨ ਸਭਾ ਹਲਕਾ ਅਤੇ ਪੋਲਿੰਗ ਸਟੇਸ਼ਨ ਸਮੇਤ ਹੋਰ ਵੇਰਵੇ ਵੱਖਰੇ-ਵੱਖਰੇ ਹੁੰਦੇ ਹਨ।

ਇਸ ਵਿਚ ਕਿਹਾ ਗਿਆ ਹੈ ਕਿ ਈ. ਪੀ. ਆਈ. ਸੀ. ਨੰਬਰ ਭਾਵੇਂ ਜੋ ਵੀ ਹੋਵੇ, ਕੋਈ ਵੀ ਵੋਟਰ ਆਪਣੇ ਸੂਬੇ ਜਾਂ ਕੇਂਦਰ ਸ਼ਾਸਿਤ ਪ੍ਰਦੇਸ਼ ’ਚ ਆਪਣੇ ਸਬੰਧਤ ਹਲਕੇ ਵਿਚ ਆਪਣੇ ਤੈਅ ਪੋਲਿੰਗ ਸਟੇਸ਼ਨ ’ਤੇ ਹੀ ਵੋਟ ਪਾ ਸਕਦਾ ਹੈ, ਜਿੱਥੇ ਉਹ ਵੋਟਰ ਸੂਚੀ ਵਿਚ ਰਜਿਸਟਰਡ ਹੈ। ਇਸ ਤੋਂ ਇਲਾਵਾ ਉਹ ਕਿਤੇ ਹੋਰ ਵੋਟ ਨਹੀਂ ਪਾ ਸਕਦਾ। ਚੋਣ ਕਮਿਸ਼ਨ ਨੇ ਸਪੱਸ਼ਟ ਕੀਤਾ ਕਿ ਵੱਖ-ਵੱਖ ਸੂਬਿਆਂ ਦੇ ਵੋਟਰ ਸੂਚੀ ਡਾਟਾਬੇਸ ਨੂੰ ‘ਈ. ਆਰ. ਓ. ਐੱਨ. ਈ. ਟੀ.’ ਪਲੇਟਫਾਰਮ ’ਤੇ ਪਾਉਣ ਤੋਂ ਪਹਿਲਾਂ ‘ਵਿਕੇਂਦਰੀਕ੍ਰਿਤ ਅਤੇ ਦਸਤੀ ਪ੍ਰਕਿਰਿਆ’ ਦੀ ਪਾਲਣਾ ਕੀਤੇ ਜਾਣ ਕਾਰਨ ਵੱਖ-ਵੱਖ ਸੂਬਿਆਂ ਅਤੇ ਕੇਦਰ ਸ਼ਾਸਿਤ ਪ੍ਰਦੇਸ਼ਾਂ ਦੇ ਕੁਝ ਵੋਟਰਾਂ ਨੂੰ ਇਕੋ ਈ. ਪੀ. ਆਈ. ਸੀ. ਨੰਬਰ ਅਲਾਟ ਕੀਤਾ ਗਿਆ ਸੀ। 

ਚੋਣ ਕਮਿਸ਼ਨ ਨੇ ਦੱਸਿਆ ਕਿ ਨਤੀਜੇ ਵਜੋਂ ਕੁਝ ਸੂਬੇ ਇਕੋ ਈ. ਪੀ. ਆਈ. ਸੀ. ਨੰਬਰ ਅੱਖਰ ਅੰਕੀ (ਅਲਫਾਨੁਮੈਰਿਕ) ਲੜੀ ਦੀ ਵਰਤੋਂ ਕਰ ਰਹੇ ਹਨ ਅਤੇ ਵੱਖ-ਵੱਖ ਸੂਬਿਆਂ ਦੇ ਵੱਖ-ਵੱਖ ਵਿਧਾਨ ਸਭਾ ਹਲਕਿਆਂ ਵਿਚ ਵੋਟਰਾਂ ਨੂੰ ਇਕੋ ਜਿਹੇ ਈ. ਪੀ. ਆਈ. ਸੀ. ਨੰਬਰ ਅਲਾਟ ਕੀਤੇ ਜਾਣ ਦੀ ਗੁੰਜਾਇਸ਼ ਹੈ।

ਚੋਣ ਕਮਿਸ਼ਨ ਦੀ ਵੈੱਬਸਾਈਟ ਮੁਤਾਬਕ ‘ਈ. ਆਰ. ਓ. ਐੱਨ. ਈ. ਟੀ.’ ਇਕੋ ਜਿਹੀਆਂ ਐਂਟਰੀਆਂ ਨੂੰ ਹਟਾ ਕੇ ਅਤੇ ਇਕ ਜਗ੍ਹਾ ਤੋਂ ਦੂਜੀ ਜਗ੍ਹਾ ਟਰਾਂਸਫਰ ਹੋਣ ਵਾਲੇ ਵੋਟਰਾਂ ਨੂੰ ਸ਼ਾਮਲ ਕਰ ਕੇ ਚੋਣ ਪ੍ਰਣਾਲੀ ਨੂੰ ਬਣਾਈ ਰੱਖਣ ਵਿਚ ਚੋਣ ਅਧਿਕਾਰੀਆਂ ਦੀ ਮਦਦ ਕਰਦਾ ਹੈ। ਉਨ੍ਹਾਂ ਕਿਹਾ ਕਿ ਕਿਸੇ ਵੀ ਸ਼ੱਕ ਨੂੰ ਦੂਰ ਕਰਨ ਲਈ ਕਮਿਸ਼ਨ ਨੇ ਫੈਸਲਾ ਲਿਆ ਹੈ ਕਿ ਰਜਿਸਟਰਡ ਵੋਟਰਾਂ ਨੂੰ ਵਿਲੱਖਣ ਈ. ਪੀ. ਆਈ. ਸੀ. ਨੰਬਰ ਅਲਾਟ ਕਰਨਾ ਯਕੀਨੀ ਬਣਾਇਆ ਜਾਵੇ। ਇਕੋ ਜਿਹੇ ਈ. ਪੀ. ਆਈ. ਸੀ. ਨੰਬਰਾਂ ਦੇ ਕਿਸੇ ਵੀ ਮਾਮਲੇ ਨੂੰ ਇਕ ਵਿਲੱਖਣ ਈ. ਪੀ. ਆਈ. ਸੀ. ਨੰਬਰ ਨਿਰਧਾਰਤ ਕਰ ਕੇ ਠੀਕ ਕੀਤਾ ਜਾਵੇਗਾ।