ਸੋਸ਼ਲ ਮੀਡੀਆ ''ਤੇ ਵਾਇਰਲ ਕੀਤੀ ਲੜਕੀ ਦੀ ਅਸ਼ਲੀਲ ਫੋਟੋ

ਨਵੀਂ ਦਿੱਲੀ—ਝਾਰਖੰਡ ਦੇ ਦੁਮਕਾ ਜ਼ਿਲੇ 'ਚ ਇਕ ਬੇਹੱਦ ਅਣਮਨੁੱਖੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਕਾਲਜ ਦੇ ਆਦਿਵਾਸੀ ਹੋਸਟਲ ਦੀ ਵਿਦਿਆਰਥਣ ਨੂੰ ਉੱਥੇ ਰਹਿਣ ਵਾਲੀ ਦੂਜੀ ਵਿਦਿਆਰਥਣਾਂ ਨੇ ਮੋਬਾਇਲ ਚੋਰੀ ਦੇ ਦੋਸ਼ 'ਚ ਰਾਤ ਭਰ ਨਾ ਸਿਰਫ ਬੰਧੀ ਬਣਾ ਕੇ ਰੱਖਿਆ, ਸਗੋਂ  ਬੇਰਹਿਮੀ ਨਾਲ ਕੁੱਟਮਾਰ ਦੇ ਬਾਅਦ ਨੰਗਾ ਕਰਕੇ ਤਸਵੀਰਾਂ ਖਿੱਚ ਕੇ ਸੋਸ਼ਲ ਮੀਡੀਆ 'ਤੇ ਵਾਇਰਲ ਕਰ ਦਿੱਤੀ। ਹੈਰਾਨੀ ਦੀ ਗੱਲ ਹੈ ਕਿ ਕਾਲਜ 'ਚ ਇੰਨੀ ਵੱਡੀ ਘਟਨਾ ਹੋਣ ਦੇ ਬਾਵਜੂਦ ਕਾਲਜ ਪ੍ਰਸ਼ਾਸਨ ਖਾਮੋਸ਼ ਹੈ। ਇਸ ਮਾਮਲੇ 'ਚ ਹੋਸਟਲ ਦੀ ਵਾਰਡਨ ਵੀ ਮੂੰਹ ਖੋਲ੍ਹਣ ਨੂੰ ਤਿਆਰ ਨਹੀਂ ਹੈ।
ਪੁਲਸ 'ਚ ਸ਼ਿਕਾਇਤ ਦਰਜ ਕਰਾਉਂਦੇ ਹੋਏ ਪੀੜਤਾ ਨੇ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਹੋਸਟਲ ਤੋਂ ਇਕ ਵਿਦਿਆਰਥਣ ਦਾ ਮੋਬਾਇਲ ਚੋਰੀ ਹੋ ਗਿਆ ਸੀ। ਇਸ ਦੇ ਕੁਝ ਦਿਨ ਬਾਅਦ ਉਸ ਨੇ 500 ਰੁਪਏ 'ਚ ਇਕ ਪੁਰਾਣਾ ਮੋਬਾਇਲ ਖਰੀਦਿਆ। ਇਹ ਮੋਬਾਇਲ ਉਸ ਦੇ ਕੋਲ ਦੇਖਣ ਦੇ ਬਾਅਦ ਹੋਸਟਲ ਦੀਆਂ ਹੋਰ ਲੜਕੀਆਂ ਇਹ ਕਹਿਣ ਲੱਗੀਆਂ ਕਿ ਇਹ ਮੋਬਾਇਲ ਚੋਰੀ ਹੋਇਆ ਸੀ। 4 ਅਗਸਤ ਨੂੰ ਹੋਸਟਲ 'ਚ ਦੋ ਦਰਜਨ ਤੋਂ ਵਧ ਵਿਦਿਆਰਥਣਾਂ ਇਕੱਠੀਆਂ ਹੋਈਆਂ ਅਤੇ ਇਸ ਮਾਮਲੇ 'ਤੇ ਮਹਾਪੰਚਾਇਤ ਬੈਠਾਈ। ਇਸ ਦੇ ਬਾਅਦ ਚੋਰੀ ਦਾ ਦੋਸ਼ ਲਗਾ ਕੇ ਵਿਦਿਆਰਥਣਾਂ ਨੇ ਉਸ ਵਿਦਿਆਰਥਣ ਨੂੰ ਜ਼ਬਰਦਸਤੀ ਨੰਗਾ ਕਰ ਦਿੱਤਾ। ਇਸ ਦੇ ਬਾਅਦ ਸਾਰੀਆਂ ਉਸ ਦੀਆਂ ਤਸਵੀਰਾਂ ਅਤੇ ਵੀਡੀਓ ਬਣਾਉਣ ਲੱਗੇ। ਇਸ ਦੌਰਾਨ ਬਾਹਰ ਦੇ ਕੁਝ ਵਿਦਿਆਰਥੀ ਵੀ ਉੱਥੇ ਮੌਜੂਦ ਸੀ। ਮਹਾਪੰਚਾਇਤ 'ਚ ਇਹ ਫੈਸਲਾ ਸੁਣਵਾਇਆ ਗਿਆ ਕਿ ਪੀੜਤ ਵਿਦਿਆਰਥਣ ਨੂੰ 18,600 ਰੁਪਏ ਬਤੌਰ ਜ਼ੁਰਮਾਨਾ ਜਮ੍ਹਾ ਕਰਨਾ ਹੋਵੇਗਾ। ਧਮਕੀ ਦਿੱਤੀ ਗਈ ਕਿ ਜ਼ੁਰਮਾਨੇ ਦਾ ਪੈਸਾ ਨਹੀਂ ਦਿੱਤਾ, ਤਾਂ ਵੀਡੀਓ ਵਾਇਰਲ ਕਰ ਦੇਣਗੇ। ਇਸ 'ਚ ਦੋ ਦਿਨ ਪਹਿਲਾਂ ਵਿਦਿਆਰਥਣ ਦੀ ਨੰਗੀ ਤਸਵੀਰ ਸੋਸ਼ਲ ਮੀਡੀਆ 'ਤੇ ਵਾਇਰਲ ਕਰ ਦਿੱਤੀ ਗਈ। ਪੀੜਤ ਵਿਦਿਆਰਥਣ ਦੇ ਮੁਤਾਬਕ ਫੋਟੋ ਵਾਇਰਲ ਹੋਣ ਦੇ ਬਾਅਦ ਉਸ ਨੇ ਵਾਰਡਨ ਤੋਂ ਲੈ ਕੇ ਅਨੁਸੂਚਿਤ ਥਾਣੇ ਤੱਕ ਸ਼ਿਕਾਇਤ ਕੀਤੀ, ਪਰ ਕੋਈ ਕਾਰਵਾਈ ਨਹੀਂ ਹੋਈ।