ਅਮਰੀਕਾ ਰਹਿੰਦੀ ਆਪਣੀ ਹੀ ਪਤਨੀ ਨੂੰ ਆਨਲਾਈਨ ਪਿਆਰ ਦੇ ਜਾਲ ''ਚ ਫਸਾ ਕੀਤੀ ਕਰੋੜਾਂ ਦੀ ਠੱਗੀ

ਸੂਰਤ: ਗੁਜਰਾਤ ਦੀ ਸੂਰਤ ਪੁਲਸ ਨੇ ਇੱਕ ਅਜਿਹੇ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਸ ਨੇ ਅਮਰੀਕਾ ਵਿੱਚ ਰਹਿੰਦੀ ਆਪਣੀ ਪਤਨੀ ਤੋਂ ਕਥਿਤ ਤੌਰ 'ਤੇ 60 ਲੱਖ ਰੁਪਏ ਅਤੇ ਸੋਨੇ ਦੇ ਗਹਿਣੇ ਜਬਰਨ ਵਸੂਲੇ ਹਨ। ਪੁਲਸ ਅਨੁਸਾਰ ਮੁਲਜ਼ਮ ਦੀ ਪਛਾਣ ਏਜਾਜ਼ ਪਟੇਲ ਵਜੋਂ ਹੋਈ ਹੈ, ਜੋ ਸੂਰਤ ਵਿੱਚ ਕੱਪੜਿਆਂ ਦੀ ਇੱਕ ਦੁਕਾਨ 'ਤੇ ਕੰਮ ਕਰਦਾ ਸੀ।

ਪੀੜਤ ਮਹਿਲਾ, ਜੋ ਕਿ ਮੂਲ ਰੂਪ ਵਿੱਚ ਗੁਜਰਾਤ ਦੀ ਰਹਿਣ ਵਾਲੀ ਹੈ, ਦਾ ਏਜਾਜ਼ ਨਾਲ ਸੰਪਰਕ ਸਾਲ 2023 ਵਿੱਚ ਇੱਕ ਕੱਪੜੇ ਦੀ ਦੁਕਾਨ ਤੋਂ ਆਨਲਾਈਨ ਸਾਮਾਨ ਮੰਗਵਾਉਣ ਦੌਰਾਨ ਹੋਇਆ ਸੀ। ਇਹ ਜਾਣ-ਪਛਾਣ ਹੌਲੀ-ਹੌਲੀ ਰਿਸ਼ਤੇ ਵਿੱਚ ਬਦਲ ਗਈ। ਮਹਿਲਾ ਪਹਿਲਾਂ ਤੋਂ ਤਲਾਕਸ਼ੁਦਾ ਸੀ ਅਤੇ ਅਮਰੀਕਾ ਵਿੱਚ ਰਹਿ ਰਹੀ ਸੀ। ਜਨਵਰੀ 2024 ਵਿੱਚ ਦੋਵਾਂ ਦੀ ਮੁਲਾਕਾਤ ਹੈਦਰਾਬਾਦ ਵਿੱਚ ਹੋਈ, ਜਿੱਥੇ ਮੁਲਜ਼ਮ ਨੇ ਮਹਿਲਾ ਦਾ ਭਰੋਸਾ ਜਿੱਤ ਕੇ ਉਸ ਦੇ ਹੈਦਰਾਬਾਦ ਸਥਿਤ ਫਲੈਟ ਦੀਆਂ ਚਾਬੀਆਂ ਹਾਸਲ ਕਰ ਲਈਆਂ।

ਸ਼ਿਕਾਇਤ ਅਨੁਸਾਰ, ਮਾਰਚ 2024 ਵਿੱਚ ਏਜਾਜ਼ ਮਹਿਲਾ ਨੂੰ ਸਾਊਦੀ ਅਰਬ ਲੈ ਗਿਆ, ਜਿੱਥੇ ਮਹਿਲਾ ਨੇ ਇਸਲਾਮ ਧਰਮ ਅਪਣਾ ਲਿਆ। ਇਸ ਤੋਂ ਬਾਅਦ ਜਦੋਂ ਮਹਿਲਾ ਅਮਰੀਕਾ ਵਾਪਸ ਚਲੀ ਗਈ ਤਾਂ ਦੋਵਾਂ ਨੇ ਆਨਲਾਈਨ ਵਿਆਹ ਕਰ ਲਿਆ। ਵਿਆਹ ਤੋਂ ਬਾਅਦ ਏਜਾਜ਼ ਨੇ ਅਮਰੀਕਾ ਜਾਣ ਲਈ ਵੀਜ਼ਾ ਲੈਣ ਦੀ ਕੋਸ਼ਿਸ਼ ਕੀਤੀ, ਪਰ ਅਸਫ਼ਲ ਰਹਿਣ 'ਤੇ ਉਸ ਨੇ ਮਹਿਲਾ ਨੂੰ ਬਲੈਕਮੇਲ ਕਰਨਾ ਸ਼ੁਰੂ ਕਰ ਦਿੱਤਾ।

ਪੁਲਸ ਨੇ ਦੱਸਿਆ ਕਿ ਮੁਲਜ਼ਮ ਨੇ ਵਟਸਐਪ ਅਤੇ ਈਮੇਲ ਰਾਹੀਂ ਮਹਿਲਾ ਨੂੰ ਧਮਕਾ ਕੇ ਲਗਭਗ 60 ਲੱਖ ਰੁਪਏ ਆਪਣੇ ਖਾਤੇ ਵਿੱਚ ਟਰਾਂਸਫਰ ਕਰਵਾਏ। ਇੰਨਾ ਹੀ ਨਹੀਂ, ਮਹਿਲਾ ਦੇ ਭਰਾ ਰਾਹੀਂ ਲਗਭਗ 18 ਤੋਲੇ ਸੋਨੇ ਦੇ ਗਹਿਣੇ ਵੀ ਸੂਰਤ ਸਥਿਤ ਆਪਣੇ ਘਰ ਮੰਗਵਾ ਲਏ, ਜੋ ਕਦੇ ਅਮਰੀਕਾ ਨਹੀਂ ਭੇਜੇ ਗਏ।

ਜਦੋਂ ਮਹਿਲਾ ਨੇ ਆਪਣੇ ਪੈਸੇ, ਸੋਨਾ ਅਤੇ ਫਲੈਟ ਵਾਪਸ ਮੰਗਿਆ ਤਾਂ ਮੁਲਜ਼ਮ ਨੇ ਉਸ ਨੂੰ ਧਮਕੀਆਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ। ਮਹਿਲਾ ਦੇ ਭਰਾ ਵੱਲੋਂ ਦਰਜ ਕਰਵਾਈ ਗਈ ਸ਼ਿਕਾਇਤ 'ਤੇ ਕਾਰਵਾਈ ਕਰਦਿਆਂ ਸੂਰਤ ਪੁਲਸ ਨੇ ਭਾਰਤੀ ਨਿਆ ਸੰਹਿਤਾ (BNS) ਦੀਆਂ ਸਬੰਧਤ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕਰਕੇ ਮੁਲਜ਼ਮ ਏਜਾਜ਼ ਪਟੇਲ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।