ਪਟਨਾ ਯੂਨੀਵਰਸਿਟੀ ਦਾ ਅਨੌਖਾ ਕਾਰਨਾਮਾ ! 40 ਵਿੱਚੋਂ 34 ਅੰਕ ਪ੍ਰਾਪਤ ਕਰਨ ਵਾਲੇ ਵਿਦਿਆਰਥੀ ਕਰ 'ਤੇ ਫੇਲ੍ਹ
Friday, Oct 17, 2025 - 11:29 AM (IST)
ਨੈਸ਼ਨਲ ਡੈਸਕ : ਪਟਨਾ ਯੂਨੀਵਰਸਿਟੀ (Patna University - PU) ਵੱਲੋਂ ਬੀ.ਐੱਡ. ਸੈਸ਼ਨ 2024-26 ਦੇ ਵਿਦਿਆਰਥੀਆਂ ਨੂੰ ਜਾਰੀ ਕੀਤੇ ਗਏ ਅੰਕ-ਪੱਤਰਾਂ (ਸਕੋਰਕਾਰਡ) ਵਿੱਚ ਵੱਡੀ ਗੜਬੜੀ ਸਾਹਮਣੇ ਆਈ ਹੈ। ਜਾਰੀ ਕੀਤੀਆਂ ਗਈਆਂ ਮਾਰਕਸ਼ੀਟਾਂ ਵਿੱਚ ਵਿਸ਼ਿਆਂ ਤੇ ਪ੍ਰਾਪਤ ਕੀਤੇ ਨੰਬਰਾਂ ਨੂੰ ਗਲਤ ਢੰਗ ਨਾਲ ਦਰਜ ਕੀਤਾ ਗਿਆ ਹੈ।
34 ਨੰਬਰ ਲੈਣ ਵਾਲੇ ਵਿਦਿਆਰਥੀ ਫੇਲ੍ਹ
ਵਿਦਿਆਰਥੀਆਂ ਨੂੰ ਸਭ ਤੋਂ ਵੱਡਾ ਝਟਕਾ ਉਦੋਂ ਲੱਗਾ, ਜਦੋਂ ਉਨ੍ਹਾਂ ਨੂੰ ਪਤਾ ਲੱਗਾ ਕਿ 40 ਨੰਬਰਾਂ ਦੀ ਪ੍ਰੀਖਿਆ ਵਿੱਚੋਂ 34 ਅੰਕ ਪ੍ਰਾਪਤ ਕਰਨ ਵਾਲੇ ਵਿਦਿਆਰਥੀਆਂ ਨੂੰ ਵੀ ਫੇਲ੍ਹ ਕਰਾਰ ਦੇ ਦਿੱਤਾ ਗਿਆ ਹੈ। ਬੀ.ਐੱਡ. ਸੈਸ਼ਨ 2024-26 ਦੇ ਵਿਦਿਆਰਥੀ ਅਭਿਸ਼ੇਕ ਕੁਮਾਰ ਝਾਅ ਨੇ ਦੱਸਿਆ ਕਿ ਉਸਨੂੰ ਕੁੱਲ 40 ਨੰਬਰਾਂ ਦੀ ਪ੍ਰੀਖਿਆ ਵਿੱਚ 34 ਅੰਕ ਮਿਲੇ ਹਨ, ਪਰ ਮਾਰਕਸ਼ੀਟ ਵਿੱਚ ਉਸਨੂੰ ਫੇਲ੍ਹ ਦਿਖਾਇਆ ਗਿਆ ਹੈ। ਕਈ ਵਿਦਿਆਰਥੀਆਂ ਨੇ ਦੱਸਿਆ ਕਿ ਜਿਹੜੇ ਵਿਸ਼ਿਆਂ ਵਿੱਚ ਉਹ ਪਾਸ ਸਨ, ਉਨ੍ਹਾਂ ਵਿੱਚ ਉਨ੍ਹਾਂ ਨੂੰ ਫੇਲ੍ਹ ਕਰ ਦਿੱਤਾ ਗਿਆ, ਜਦਕਿ ਕੁਝ ਫੇਲ੍ਹ ਵਿਦਿਆਰਥੀਆਂ ਨੂੰ ਪਾਸ ਕਰ ਦਿੱਤਾ ਗਿਆ ਸੀ।
ਇਹ ਵੀ ਪੜ੍ਹੋ...ਸੋਮਵਾਰ ਨੂੰ ਹੋ ਗਿਆ ਛੁੱਟੀ ਦਾ ਐਲਾਨ ! ਬੰਦ ਰਹਿਣਗੇ ਸਾਰੇ ਸਕੂਲ-ਕਾਲਜ ਤੇ ਸਰਕਾਰੀ ਦਫਤਰ
ਪ੍ਰੀਖਿਆ ਦੀ ਤਰੀਕ ਵੀ ਗਲਤ
ਮਾਰਕਸ਼ੀਟਾਂ ਵਿੱਚ ਸਿਰਫ਼ ਨੰਬਰਾਂ ਦੀ ਹੀ ਗੜਬੜੀ ਨਹੀਂ ਸੀ, ਸਗੋਂ ਪ੍ਰੀਖਿਆ ਦੀ ਤਰੀਕ ਵੀ ਗਲਤ ਦਰਜ ਕੀਤੀ ਗਈ ਸੀ। ਪ੍ਰੀਖਿਆ ਦਾ ਆਯੋਜਨ ਮਈ 2025 ਵਿੱਚ ਕੀਤਾ ਗਿਆ ਸੀ, ਪਰ ਜਾਰੀ ਕੀਤੇ ਗਏ ਅੰਕ-ਪੱਤਰਾਂ ਵਿੱਚ ਪ੍ਰੀਖਿਆ ਦੀ ਤਰੀਕ ਜਨਵਰੀ 2025 ਦਰਜ ਕੀਤੀ ਗਈ ਹੈ। ਵਿਦਿਆਰਥੀਆਂ ਨੇ ਕਿਹਾ ਕਿ ਯੂਨੀਵਰਸਿਟੀ ਵੱਲੋਂ ਜਾਰੀ ਕੀਤੇ ਗਏ ਟੈਬੂਲੇਸ਼ਨ ਰਜਿਸਟਰ ਵਿੱਚ ਨੰਬਰ ਸਹੀ ਹਨ, ਪਰ ਜਾਰੀ ਕੀਤੇ ਗਏ ਸਕੋਰਕਾਰਡ ਵਿੱਚ ਬਹੁਤ ਸਾਰੀਆਂ ਕਮੀਆਂ ਹਨ।
ਇਹ ਵੀ ਪੜ੍ਹੋ...ਵਿਦਿਆਰਥੀਆਂ ਦੀਆਂ ਲੱਗ ਗਈਆਂ ਮੌਜਾਂ ! 5 ਦਿਨ ਬੰਦ ਰਹਿਣਗੇ ਸਾਰੇ ਸਕੂਲ, ਜਾਣੋ ਕਾਰਨ
ਯੂਨੀਵਰਸਿਟੀ ਨੇ ਕੀਤੀ ਤੁਰੰਤ ਕਾਰਵਾਈ
ਜਾਣਕਾਰੀ ਸਾਹਮਣੇ ਆਉਣ ਤੋਂ ਬਾਅਦ ਯੂਨੀਵਰਸਿਟੀ ਪ੍ਰਸ਼ਾਸਨ ਤੁਰੰਤ ਹਰਕਤ ਵਿੱਚ ਆਇਆ। ਯੂਨੀਵਰਸਿਟੀ ਨੇ ਤੁਰੰਤ ਪ੍ਰਭਾਵ ਨਾਲ ਜਾਰੀ ਕੀਤੀਆਂ ਗਈਆਂ ਸਾਰੀਆਂ ਮਾਰਕਸ਼ੀਟਾਂ ਨੂੰ ਰੱਦ ਕਰ ਦਿੱਤਾ ਹੈ। ਯੂਨੀਵਰਸਿਟੀ ਦੇ ਪ੍ਰੀਖਿਆ ਕੰਟਰੋਲਰ ਪ੍ਰੋ. ਬੀ.ਕੇ. ਲਾਲ ਨੇ ਦੱਸਿਆ ਕਿ ਇਹ ਗੜਬੜੀ ਇੱਕ ਏਜੰਸੀ ਦੀ ਗਲਤੀ ਕਾਰਨ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਏਜੰਸੀ ਨੇ ਗਲਤੀ ਨਾਲ ਕਿਸੇ ਦੂਜੇ ਯੂਨੀਵਰਸਿਟੀ ਦੇ ਫਾਰਮੇਟ ਦੀ ਵਰਤੋਂ ਕਰਕੇ ਸਕੋਰਕਾਰਡ ਜਾਰੀ ਕਰ ਦਿੱਤੇ ਹਨ।
ਯੂਨੀਵਰਸਿਟੀ ਨੇ ਵਿਦਿਆਰਥੀਆਂ ਨੂੰ ਭਰੋਸਾ ਦਿੱਤਾ ਹੈ ਕਿ ਉਨ੍ਹਾਂ ਨੂੰ ਪਰੇਸ਼ਾਨ ਹੋਣ ਦੀ ਕੋਈ ਲੋੜ ਨਹੀਂ ਹੈ। ਜਿਨ੍ਹਾਂ ਵਿਦਿਆਰਥੀਆਂ ਦੇ ਅੰਕ-ਪੱਤਰਾਂ ਵਿੱਚ ਗੜਬੜੀ ਹੈ, ਉਨ੍ਹਾਂ ਸਾਰਿਆਂ ਨੂੰ ਦੁਬਾਰਾ ਨਵੀਂ ਮਾਰਕਸ਼ੀਟ ਜਾਰੀ ਕੀਤੀ ਜਾਵੇਗੀ। ਪ੍ਰੀਖਿਆ ਕੰਟਰੋਲਰ ਨੇ ਏਜੰਸੀ ਨੂੰ ਇੱਕ ਹਫ਼ਤੇ ਦੇ ਅੰਦਰ ਗਲਤੀਆਂ ਨੂੰ ਸੁਧਾਰ ਕੇ ਨਵੀਂ ਮਾਰਕਸ਼ੀਟ ਜਾਰੀ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।
