ਕਰਨਾਲ ''ਚ ਭਿਆਨਕ ਸੜਕ ਹਾਦਸਾ! 5 ਵਾਹਨਾਂ ਨਾਲ ਟੱਕਰ ਮਗਰੋਂ ਪਲਟਿਆ ਬੇਕਾਬੂ ਟਰੱਕ, 3 ਲੋਕਾਂ ਦੀ ਮੌਤ

ਕਰਨਾਲ (ਹਰਿਆਣਾ): ਹਰਿਆਣਾ ਦੇ ਕਰਨਾਲ ਜ਼ਿਲ੍ਹੇ ਦੇ ਘਰੌਂਡਾ ਵਿੱਚ ਨੈਸ਼ਨਲ ਹਾਈਵੇ-44 (NH-44) 'ਤੇ ਅੱਜ ਸਵੇਰੇ ਇੱਕ ਦਿਲ ਦਹਿਲਾ ਦੇਣ ਵਾਲਾ ਸੜਕ ਹਾਦਸਾ ਵਾਪਰਿਆ। ਇੱਕ ਬੇਕਾਬੂ ਟਰੱਕ ਨੇ ਪੰਜ ਵਾਹਨਾਂ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਕਾਰਨ ਤਿੰਨ ਲੋਕਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ ਅਤੇ ਕਈ ਲੋਕ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਏ।

ਹਾਦਸਾ ਨੈਸ਼ਨਲ ਹਾਈਵੇ-44 'ਤੇ ਟੋਲ ਪਲਾਜ਼ਾ ਤੋਂ ਲਗਭਗ ਇੱਕ ਕਿਲੋਮੀਟਰ ਪਹਿਲਾਂ ਹੋਇਆ। ਕਰਨਾਲ ਵੱਲੋਂ ਆ ਰਿਹਾ ਇੱਕ ਤੇਜ਼ ਰਫ਼ਤਾਰ ਕੰਟੇਨਰ ਟਰੱਕ ਡਿਵਾਈਡਰ ਤੋੜ ਕੇ ਰੌਂਗ ਸਾਈਡ ਆ ਗਿਆ। ਇਸ ਟਰੱਕ ਨੇ ਸਭ ਤੋਂ ਪਹਿਲਾਂ ਇੱਕ ਪੰਜਾਬ ਰੋਡਵੇਜ਼ ਦੀ ਬੱਸ ਨੂੰ ਟੱਕਰ ਮਾਰੀ। ਬੱਸ ਵਿੱਚ ਅਫਰਾ-ਤਫਰੀ ਮਚ ਗਈ। ਇਸ ਤੋਂ ਬਾਅਦ ਟਰੱਕ ਨੇ ਇੱਕ ਕਾਰ ਅਤੇ ਦੋ ਬਾਈਕਾਂ ਨੂੰ ਜ਼ੋਰਦਾਰ ਟੱਕਰ ਮਾਰੀ। ਇੱਕ ਕਾਰ ਨੂੰ ਟਰੱਕ ਘਸੀਟਦਾ ਹੋਇਆ ਸਰਵਿਸ ਲੇਨ ਦੀ ਰੇਲਿੰਗ ਕੋਲ ਜਾ ਕੇ ਪਲਟ ਗਿਆ।

ਚਸ਼ਮਦੀਦਾਂ ਨੇ ਦੱਸਿਆ ਕਿ ਟਰੱਕ ਨੇ ਪਹਿਲਾਂ ਕਾਰ ਨੂੰ ਕੁਚਲਿਆ, ਜਿਸ 'ਚ ਸਵਾਰ ਦੋ ਲੋਕਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਇਸ ਤੋਂ ਇਲਾਵਾ ਇੱਕ ਬਾਈਕ ਸਵਾਰ ਦੀ ਵੀ ਜਾਨ ਚਲੀ ਗਈ। ਮੌਕੇ 'ਤੇ ਮੌਜੂਦ ਰਾਹਗੀਰਾਂ ਨੇ ਦੱਸਿਆ ਕਿ ਟਰੱਕ ਦਾ ਡਰਾਈਵਰ ਸ਼ਾਇਦ ਸੁੱਤਾ ਹੋਇਆ ਸੀ ਜਾਂ ਨਸ਼ੇ ਵਿੱਚ ਸੀ। ਪੁਲਸ ਨੇ ਲਾਸ਼ਾਂ ਨੂੰ ਮੋਰਚਰੀ 'ਚ ਭੇਜ ਦਿੱਤਾ ਹੈ ਤੇ ਜ਼ਖਮੀਆਂ ਨੂੰ ਨੇੜਲੇ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ।