ਭਾਰਤ ''ਚ ਪਹਿਲੀ ਵਾਰ ਡਰੋਨ ਤੇ ਰੋਬੋਟ ਨਾਲ ਡਿਲੀਵਰੀ; ਗੁਰੂਗ੍ਰਾਮ ''ਚ ਸ਼ੁਰੂ ਹੋਈ ਹਾਈਟੈੱਕ ਸੇਵਾ

ਗੁਰੂਗ੍ਰਾਮ : ਟੈਕਨਾਲੋਜੀ ਦੇ ਖੇਤਰ ਵਿੱਚ ਭਾਰਤ ਨੇ ਇੱਕ ਹੋਰ ਵੱਡੀ ਪੁਲਾਂਘ ਪੁੱਟੀ ਹੈ। ਦਿੱਲੀ-ਐੱਨ.ਸੀ.ਆਰ. ਦੇ ਸ਼ਹਿਰ ਗੁਰੂਗ੍ਰਾਮ ਵਿੱਚ ਦੇਸ਼ ਦੀ ਪਹਿਲੀ ਡਰੋਨ ਅਤੇ ਏਆਈ (AI) ਰੋਬੋਟ ਡਿਲੀਵਰੀ ਸੇਵਾ ਸ਼ੁਰੂ ਹੋ ਗਈ ਹੈ। ਇਹ ਹਾਈਟੈੱਕ ਸੇਵਾ 'ਸਕਾਈ ਏਅਰ ਮੋਬਿਲਿਟੀ' (Skye Air Mobility) ਨਾਮਕ ਕੰਪਨੀ ਵੱਲੋਂ ਸ਼ੁਰੂ ਕੀਤੀ ਗਈ ਹੈ, ਜੋ ਲੋਕਾਂ ਦੇ ਘਰਾਂ ਤੱਕ ਸਾਮਾਨ ਪਹੁੰਚਾਉਣ ਲਈ ਡਰੋਨ ਅਤੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਨਾਲ ਚੱਲਣ ਵਾਲੇ ਰੋਬੋਟਾਂ ਦੀ ਵਰਤੋਂ ਕਰੇਗੀ।

ਕੰਪਨੀ ਨੇ ਲਾਂਚਿੰਗ ਦੌਰਾਨ ਇਸ ਪ੍ਰਣਾਲੀ ਦਾ ਡੈਮੋ ਦਿਖਾਇਆ ਕਿ ਇਹ ਕਿਵੇਂ ਕੰਮ ਕਰੇਗੀ। ਪਹਿਲਾਂ ਇੱਕ ਡਰੋਨ ਪਾਰਸਲ ਬਾਕਸ ਲੈ ਕੇ ਆਵੇਗਾ ਅਤੇ ਉਸਨੂੰ ਨਿਰਧਾਰਿਤ ਕੀਤੇ ਗਏ 'ਮੇਲ ਬਾਕਸ' ਜਾਂ ਡਰੋਨ ਪੋਰਟ 'ਤੇ ਛੱਡ ਦੇਵੇਗਾ। ਇਸ ਤੋਂ ਬਾਅਦ ਇੱਕ ਏਆਈ-ਸੰਚਾਲਿਤ ਰੋਵਰ ਉਸ ਮੇਲ ਬਾਕਸ ਤੋਂ ਪਾਰਸਲ ਕਲੈਕਟ ਕਰੇਗਾ ਅਤੇ ਸਿੱਧਾ ਗਾਹਕ ਦੇ ਘਰ ਦੇ ਦਰਵਾਜ਼ੇ ਤੱਕ ਪਹੁੰਚਾਏਗਾ।

ਸਕਾਈ ਏਅਰ ਮੋਬਿਲਿਟੀ ਦੇ ਸੀ.ਈ.ਓ. ਅੰਕਿਤ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਦੀ ਕੰਪਨੀ ਭਾਰਤ ਵਿੱਚ ਡੋਰਸਟੈਪ ਡਿਲੀਵਰੀ ਲਈ ਡਰੋਨ ਅਤੇ ਰੋਬੋਟ ਦੀ ਵਰਤੋਂ ਕਰਨ ਵਾਲੀ ਪਹਿਲੀ ਕੰਪਨੀ ਹੈ। ਉਨ੍ਹਾਂ ਅਨੁਸਾਰ, ਕੰਪਨੀ ਹੁਣ ਤੱਕ 36 ਲੱਖ ਡਿਲੀਵਰੀ ਪੂਰੀਆਂ ਕਰ ਚੁੱਕੀ ਹੈ, ਜਿਸ ਨਾਲ ਲਗਭਗ 1,000 ਟਨ ਕਾਰਬਨ ਨਿਕਾਸ (CO2) ਨੂੰ ਘੱਟ ਕਰਨ ਵਿੱਚ ਮਦਦ ਮਿਲੀ ਹੈ।

ਹੋਰ ਸ਼ਹਿਰਾਂ ਵਿੱਚ ਵਿਸਥਾਰ ਦੀ ਯੋਜਨਾ ਕੰਪਨੀ ਨੇ ਇਸ ਸੇਵਾ ਲਈ ਅਮਰੀਕੀ ਕੰਪਨੀਆਂ Arrive AI ਅਤੇ Ottonomy ਨਾਲ ਸਾਂਝੇਦਾਰੀ ਕੀਤੀ ਹੈ। ਅੰਕਿਤ ਕੁਮਾਰ ਨੇ ਦੱਸਿਆ ਕਿ ਇਸ ਹਾਈਟੈੱਕ ਪਹਿਲ ਨੂੰ ਜਲਦੀ ਹੀ ਦੇਸ਼ ਦੇ ਹੋਰਨਾਂ ਸ਼ਹਿਰਾਂ ਵਿੱਚ ਵੀ ਵਧਾਇਆ ਜਾਵੇਗਾ। ਇਸ ਤਕਨੀਕ ਨਾਲ ਨਾ ਸਿਰਫ਼ ਸਾਮਾਨ ਦੀ ਡਿਲੀਵਰੀ ਤੇਜ਼ ਹੋਵੇਗੀ, ਸਗੋਂ ਮਨੁੱਖੀ ਦਖਲਅੰਦਾਜ਼ੀ ਵੀ ਘੱਟ ਜਾਵੇਗੀ।