ਸਾਲ 2025 ਦੌਰਾਨ 166 ਚੀਤਿਆਂ ਦੀ ਗਈ ਜਾਨ ! ਸਭ ਤੋਂ ਵੱਧ 55 ਮੌਤਾਂ MP ''ਚ

ਨੈਸ਼ਨਲ ਡੈਸਕ- ਨੈਸ਼ਨਲ ਟਾਈਗਰ ਕੰਜ਼ਰਵੇਸ਼ਨ ਅਥਾਰਟੀ (NTCA) ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ, ਭਾਰਤ ਨੇ ਸਾਲ 2025 ਵਿੱਚ ਕੁੱਲ 166 ਚੀਤੇ ਗੁਆ ਦਿੱਤੇ ਹਨ। ਇਹ ਅੰਕੜਾ ਪਿਛਲੇ ਸਾਲ ਦੇ ਮੁਕਾਬਲੇ ਕਾਫੀ ਚਿੰਤਾਜਨਕ ਹੈ, ਕਿਉਂਕਿ ਪਿਛਲੇ ਸਾਲ 126 ਚੀਤਿਆਂ ਦੀ ਮੌਤ ਹੋਈ ਸੀ, ਜਿਸਦਾ ਮਤਲਬ ਹੈ ਕਿ ਇਸ ਸਾਲ 40 ਮੌਤਾਂ ਵੱਧ ਹੋਈਆਂ ਹਨ।

ਰਿਪੋਰਟ ਅਨੁਸਾਰ ਦੇਸ਼ ਦੇ 'ਟਾਈਗਰ ਸਟੇਟ' ਵਜੋਂ ਜਾਣੇ ਜਾਂਦੇ ਮੱਧ ਪ੍ਰਦੇਸ਼ ਵਿੱਚ ਸਭ ਤੋਂ ਵੱਧ 55 ਚੀਤਿਆਂ ਦੀ ਮੌਤ ਹੋਈ ਹੈ, ਜਦਕਿ ਮਹਾਰਾਸ਼ਟਰ ਵਿੱਚ 38, ਕੇਰਲ ਵਿੱਚ 13 ਅਤੇ ਅਸਾਮ ਵਿੱਚ 12 ਚੀਤਿਆਂ ਦੀ ਮੌਤ ਦਰਜ ਕੀਤੀ ਗਈ ਹੈ। ਹੋਈਆਂ ਕੁੱਲ ਮੌਤਾਂ ਵਿੱਚੋਂ 31 ਬਾਘ ਦੇ ਬੱਚੇ ਸਨ।

ਜੰਗਲੀ ਜੀਵ ਮਾਹਿਰਾਂ ਅਨੁਸਾਰ, ਚੀਤਿਆਂ ਦੀਆਂ ਇਨ੍ਹਾਂ ਮੌਤਾਂ ਦਾ ਸਭ ਤੋਂ ਵੱਡਾ ਕਾਰਨ ਜਗ੍ਹਾ ਦੀ ਘਾਟ ਕਾਰਨ ਹੋਣ ਵਾਲੀ ਆਪਸੀ ਲੜਾਈ ਹੈ। ਚੀਤਿਆਂ ਦੀ ਆਬਾਦੀ ਆਪਣੇ 'ਸੈਚੁਰੇਸ਼ਨ ਪੁਆਇੰਟ' 'ਤੇ ਪਹੁੰਚ ਗਈ ਹੈ, ਜਿਸ ਕਾਰਨ ਉਨ੍ਹਾਂ ਨੂੰ ਆਪਣਾ ਇਲਾਕਾ ਬਣਾਉਣ ਲਈ ਲੋੜੀਂਦੀ ਜਗ੍ਹਾ ਨਹੀਂ ਮਿਲ ਰਹੀ।

ਮੱਧ ਪ੍ਰਦੇਸ਼ ਵਿੱਚ ਚੀਤਿਆਂ ਦੀ ਗਿਣਤੀ 2014 ਵਿੱਚ 308 ਤੋਂ ਵਧ ਕੇ 2022 ਵਿੱਚ 785 ਹੋ ਗਈ ਹੈ ਤੇ ਜਿੱਥੇ ਆਬਾਦੀ ਜ਼ਿਆਦਾ ਹੁੰਦੀ ਹੈ, ਉੱਥੇ ਕੁਦਰਤੀ ਤੌਰ 'ਤੇ ਮੌਤਾਂ ਦੀ ਗਿਣਤੀ ਵੀ ਵੱਧ ਹੋ ਸਕਦੀ ਹੈ। ਅੰਕੜਿਆਂ ਮੁਤਾਬਕ ਮੱਧ ਪ੍ਰਦੇਸ਼ ਵਿੱਚ 38 ਮੌਤਾਂ ਕੁਦਰਤੀ ਕਾਰਨਾਂ ਕਰਕੇ ਹੋਈਆਂ, ਜਦਕਿ 10 ਮਾਮਲੇ ਸ਼ਿਕਾਰ ਦੇ ਸਨ ਅਤੇ ਕੁਝ ਮੌਤਾਂ ਕਰੰਟ ਲੱਗਣ ਕਾਰਨ ਹੋਈਆਂ।

ਵਿਭਾਗ ਵੱਲੋਂ ਹਰ ਮੌਤ ਨੂੰ ਪਹਿਲਾਂ ਸ਼ਿਕਾਰ ਦੇ ਸ਼ੱਕ ਵਜੋਂ ਦੇਖਿਆ ਜਾਂਦਾ ਹੈ ਜਦੋਂ ਤੱਕ ਕੋਈ ਹੋਰ ਸਬੂਤ ਨਾ ਮਿਲੇ ਅਤੇ ਸ਼ਿਕਾਰੀਆਂ ਵਿਰੁੱਧ ਸਖ਼ਤ ਕਾਰਵਾਈ ਲਈ 'ਸਟੇਟ ਟਾਈਗਰ ਸਟ੍ਰਾਈਕ ਫੋਰਸ' ਲਗਾਤਾਰ ਕੰਮ ਕਰ ਰਹੀ ਹੈ।