ਹਜ਼ਾਰਾਂ ਸਾਲ ਪਹਿਲਾਂ ਤੇ ਅਗਲੇ 100 ਸਾਲ ਵੀ ਨਹੀਂ ਵੇਖੋਂਗੇ ਅਜਿਹਾ ਪੂਰਨ ਸੂਰਜ ਗ੍ਰਹਿਣ! ਜਾਣੋਂ ਕਦੋਂ ਲੱਗੇਗਾ

ਵੈੱਬ ਡੈਸਕ : ਇਸ ਸਦੀ ਦਾ ਸਭ ਤੋਂ ਲੰਬਾ ਸੂਰਜ ਗ੍ਰਹਿਣ 2 ਅਗਸਤ 2027 ਨੂੰ ਹੋਣ ਜਾ ਰਿਹਾ ਹੈ। ਇਹ ਸੂਰਜ ਗ੍ਰਹਿਣ 6 ਮਿੰਟ ਤੋਂ ਵੱਧ ਸਮੇਂ ਲਈ ਰਹੇਗਾ ਅਤੇ ਅਰਬ ਜਗਤ ਦੇ ਕਈ ਦੇਸ਼ਾਂ ਦੇ ਨਾਲ-ਨਾਲ ਉੱਤਰੀ ਅਫਰੀਕਾ ਵਿੱਚ ਵੀ ਦਿਖਾਈ ਦੇਵੇਗਾ। ਲਕਸਰ (ਮਿਸਰ), ਜੇਦਾਹ (ਸਾਊਦੀ ਅਰਬ) ਅਤੇ ਬੇਨਗਾਜ਼ੀ (ਲੀਬੀਆ) ਵਰਗੇ ਸ਼ਹਿਰਾਂ ਦੇ ਲੋਕ ਇਸਨੂੰ ਸਾਫ਼-ਸਾਫ਼ ਦੇਖ ਸਕਣਗੇ। ਇਹ ਅਰਬ ਜਗਤ ਦੇ ਲੱਖਾਂ ਲੋਕਾਂ ਲਈ ਇੱਕ ਵਿਲੱਖਣ ਅਤੇ ਦੁਰਲੱਭ ਮੌਕਾ ਹੋਵੇਗਾ। ਇਹ ਅਜਿਹਾ ਸੂਰਜ ਗ੍ਰਹਿਣ ਹੋਵੇਗਾ ਜੋ ਹਜ਼ਾਰਾਂ ਸਾਲਾਂ ਵਿਚ ਨਹੀਂ ਹੋਇਆ ਹੈ ਤੇ ਨਾ ਹੀ ਅਗਲੇ 100 ਸਾਲਾਂ ਵਿਚ ਅਜਿਹਾ ਹੋਵੇਗਾ।

ਸੂਰਜ ਗ੍ਰਹਿਣ ਕਦੋਂ ਅਤੇ ਕਿਵੇਂ ਹੁੰਦਾ ਹੈ?
ਸੂਰਜ ਗ੍ਰਹਿਣ ਉਦੋਂ ਹੁੰਦਾ ਹੈ ਜਦੋਂ ਚੰਦਰਮਾ ਧਰਤੀ ਅਤੇ ਸੂਰਜ ਦੇ ਵਿਚਕਾਰ ਆ ਜਾਂਦਾ ਹੈ ਅਤੇ ਸੂਰਜ ਨੂੰ ਪੂਰੀ ਤਰ੍ਹਾਂ ਢੱਕ ਲੈਂਦਾ ਹੈ। ਜਦੋਂ ਪੂਰਨ ਸੂਰਜ ਗ੍ਰਹਿਣ ਹੁੰਦਾ ਹੈ, ਤਾਂ ਦਿਨ ਵੇਲੇ ਹੀ ਰਾਤ ਵਰਗੀ ਹਨੇਰ ਸਥਿਤੀ ਪੈਦਾ ਹੋ ਜਾਂਦੀ ਹੈ। 2027 ਵਿੱਚ, ਜਦੋਂ ਚੰਦਰਮਾ ਸੂਰਜ ਦੇ ਸਾਹਮਣੇ ਆਵੇਗਾ, ਤਾਂ ਸੂਰਜ ਪੂਰੀ ਤਰ੍ਹਾਂ ਢੱਕ ਜਾਵੇਗਾ ਅਤੇ ਦਿਨ ਵੇਲੇ ਲਗਭਗ 6 ਮਿੰਟ 23 ਸਕਿੰਟਾਂ ਲਈ ਹਨੇਰਾ ਛਾਇਆ ਰਹੇਗਾ। ਇਸ ਗ੍ਰਹਿਣ ਨੂੰ 1991 ਤੋਂ 2114 ਦੇ ਵਿਚਕਾਰ ਸਭ ਤੋਂ ਲੰਬਾ ਪੂਰਨ ਸੂਰਜ ਗ੍ਰਹਿਣ ਮੰਨਿਆ ਜਾਂਦਾ ਹੈ।

2 ਅਗਸਤ 2027 ਦਾ ਸੂਰਜ ਗ੍ਰਹਿਣ ਖਾਸ ਕਿਉਂ ਹੈ?
ਇਸ ਦਿਨ, ਧਰਤੀ ਸੂਰਜ ਤੋਂ ਸਭ ਤੋਂ ਦੂਰ ਹੋਵੇਗੀ, ਜਿਸ ਨਾਲ ਸੂਰਜ ਅਸਮਾਨ ਵਿੱਚ ਛੋਟਾ ਦਿਖਾਈ ਦੇਵੇਗਾ।
ਚੰਦਰਮਾ ਧਰਤੀ ਦੇ ਸਭ ਤੋਂ ਨੇੜੇ ਹੋਵੇਗਾ, ਜਿਸ ਨਾਲ ਇਹ ਵੱਡਾ ਦਿਖਾਈ ਦੇਵੇਗਾ ਅਤੇ ਸੂਰਜ ਨੂੰ ਪੂਰੀ ਤਰ੍ਹਾਂ ਢੱਕ ਲਵੇਗਾ।
ਗ੍ਰਹਿਣ ਦਾ ਰਸਤਾ ਭੂਮੱਧ ਰੇਖਾ ਦੇ ਨੇੜੇ ਤੋਂ ਲੰਘੇਗਾ, ਜਿਸ ਨਾਲ ਚੰਦਰਮਾ ਦਾ ਪਰਛਾਵਾਂ ਹੌਲੀ-ਹੌਲੀ ਹਿੱਲੇਗਾ ਅਤੇ ਗ੍ਰਹਿਣ ਦੀ ਮਿਆਦ ਆਮ ਨਾਲੋਂ ਵੱਧ ਹੋਵੇਗੀ।
ਇਹ ਪੂਰਨ ਸੂਰਜ ਗ੍ਰਹਿਣ ਅਰਬ ਦੇਸ਼ਾਂ ਦੇ ਸ਼ਹਿਰਾਂ ਵਿੱਚ ਦਿਖਾਈ ਦੇਵੇਗਾ, ਜਿੱਥੇ ਆਮ ਤੌਰ 'ਤੇ ਪੂਰਨ ਗ੍ਰਹਿਣ ਦੇਖਣ ਦਾ ਮੌਕਾ ਨਹੀਂ ਮਿਲਦਾ।

ਇਹ ਸੂਰਜ ਗ੍ਰਹਿਣ ਕਿੱਥੇ ਦਿਖਾਈ ਦੇਵੇਗਾ?
ਇਹ ਗ੍ਰਹਿਣ ਮੁੱਖ ਤੌਰ 'ਤੇ ਉੱਤਰੀ ਅਫਰੀਕਾ ਅਤੇ ਮੱਧ ਪੂਰਬ ਵਿੱਚ ਦਿਖਾਈ ਦੇਵੇਗਾ। ਇਨ੍ਹਾਂ ਵਿੱਚ ਸ਼ਾਮਲ ਹਨ:
ਉੱਤਰੀ ਮੋਰੋਕੋ ਅਤੇ ਅਲਜੀਰੀਆ
ਦੱਖਣੀ ਟਿਊਨੀਸ਼ੀਆ ਅਤੇ ਉੱਤਰ-ਪੂਰਬੀ ਲੀਬੀਆ
ਲਕਸਰ ਸਮੇਤ ਮਿਸਰ ਦੇ ਕਈ ਹਿੱਸੇ
ਦੱਖਣ-ਪੱਛਮੀ ਸਾਊਦੀ ਅਰਬ ਅਤੇ ਯਮਨ ਦੇ ਕੁਝ ਖੇਤਰ

ਮਿਸਰ, ਲੀਬੀਆ ਅਤੇ ਸਾਊਦੀ ਅਰਬ ਲਈ, ਇਹ ਇੱਕ ਸਦੀ ਯਾਨੀ 100 ਸਾਲਾਂ ਵਿੱਚ ਪਹਿਲੀ ਵਾਰ ਹੋਵੇਗਾ ਜਦੋਂ ਉੱਥੋਂ ਪੂਰਨ ਸੂਰਜ ਗ੍ਰਹਿਣ ਦਿਖਾਈ ਦੇਵੇਗਾ।

ਮੌਸਮ ਕਿਹੋ ਜਿਹਾ ਰਹੇਗਾ?
ਖਗੋਲ ਵਿਗਿਆਨੀਆਂ ਦਾ ਮੰਨਣਾ ਹੈ ਕਿ ਪੂਰਬੀ ਲੀਬੀਆ ਅਤੇ ਪੱਛਮੀ ਮਿਸਰ ਵਿੱਚ ਅਸਮਾਨ ਸਭ ਤੋਂ ਸਾਫ਼ ਹੋਵੇਗਾ, ਜਿਸ ਕਾਰਨ ਉੱਥੇ ਗ੍ਰਹਿਣ ਸਾਫ਼ ਦਿਖਾਈ ਦੇਵੇਗਾ। ਸਾਊਦੀ ਅਰਬ ਅਤੇ ਯਮਨ ਵਿੱਚ ਮੌਸਮ ਥੋੜ੍ਹਾ ਅਨਿਸ਼ਚਿਤ ਹੋ ਸਕਦਾ ਹੈ, ਖਾਸ ਕਰਕੇ ਤੱਟਵਰਤੀ ਖੇਤਰਾਂ ਵਿੱਚ ਬੱਦਲ ਛਾਏ ਰਹਿਣ ਦੀ ਸੰਭਾਵਨਾ ਹੋਵੇਗੀ।

ਕੀ ਇਹ ਭਾਰਤ 'ਚ ਦਿਖਾਈ ਦੇਵੇਗਾ ਜਾਂ ਨਹੀਂ?
ਪੂਰਨ ਸੂਰਜ ਗ੍ਰਹਿਣ ਭਾਰਤ 'ਚ ਦਿਖਾਈ ਨਹੀਂ ਦੇਵੇਗਾ, ਪਰ ਦੇਸ਼ ਦੇ ਕੁਝ ਹਿੱਸਿਆਂ 'ਚ ਅੰਸ਼ਕ ਸੂਰਜ ਗ੍ਰਹਿਣ ਦਿਖਾਈ ਦੇਵੇਗਾ। ਦਿੱਲੀ, ਮੁੰਬਈ, ਚੇਨਈ ਅਤੇ ਕੋਲਕਾਤਾ ਵਰਗੇ ਵੱਡੇ ਸ਼ਹਿਰਾਂ ਦੇ ਲੋਕ ਸ਼ਾਮ 4:30 ਵਜੇ ਦੇ ਕਰੀਬ ਅੰਸ਼ਕ ਸੂਰਜ ਗ੍ਰਹਿਣ ਦੇਖ ਸਕਣਗੇ।

ਇਹ ਮੌਕਾ ਖਾਸ ਕਿਉਂ ਹੈ?
ਇਹ ਸੂਰਜ ਗ੍ਰਹਿਣ ਨਾ ਸਿਰਫ਼ ਅਰਬ ਜਗਤ ਲਈ ਸਗੋਂ ਪੂਰੇ ਖਗੋਲ ਵਿਗਿਆਨ ਜਗਤ ਲਈ ਬਹੁਤ ਖਾਸ ਹੋਵੇਗਾ। 6 ਮਿੰਟ ਤੋਂ ਵੱਧ ਦਾ ਇਹ ਗ੍ਰਹਿਣ ਇਸ ਸਦੀ ਦਾ ਸਭ ਤੋਂ ਲੰਬਾ ਪੂਰਨ ਸੂਰਜ ਗ੍ਰਹਿਣ ਹੋਵੇਗਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e