ਪੁਲਾੜ ਤੋਂ ਧਰਤੀ ’ਤੇ ਸੁਰੱਖਿਅਤ ਵਾਪਸੀ ਦਾ ਸਫ਼ਲ ਪ੍ਰੀਖਣ

ਬੈਂਗਲੁਰੂ (ਭਾਸ਼ਾ)- ਵਿਸ਼ਾਖਾਪਟਨਮ ਦੇ ਨੇਵਲ ਡਾਕਯਾਰਡ ਵਿਖੇ ਬੰਦਰਗਾਹ ਪ੍ਰੀਖਣਾਂ ਦੀ ਸ਼ੁਰੂਆਤ ਦੇ ਨਾਲ ਹੀ ਗਗਨਯਾਨ ਮਿਸ਼ਨ ਦਾ ਰਿਕਵਰੀ ਟੈਸਟ ਆਪਰੇਸ਼ਨ ਦੂਜੇ ਪੜਾਅ ਵਿਚ ਦਾਖ਼ਲ ਹੋ ਗਿਆ ਹੈ। ਇੰਡੀਅਨ ਸਪੇਸ ਰਿਸਰਚ ਆਰਗੇਨਾਈਜ਼ੇਸ਼ਨ (ਇਸਰੋ) ਅਤੇ ਸਮੁੰਦਰੀ ਫੌਜ ਨੇ 20 ਜੁਲਾਈ ਨੂੰ ਟੈਸਟ ਵਾਹਨ ਦੇ ਪਹਿਲੇ ਵਿਕਾਸ ਮਿਸ਼ਨ ਦੌਰਾਨ ਰਿਕਵਰੀ ਕਾਰਜਾਂ ਨੂੰ ਅੰਜਾਮ ਦੇਣ ਵਾਲੇ ਜਹਾਜ਼ ਦੇ ਨਾਲ ਸਾਂਝੇ ਤੌਰ ’ਤੇ ਟਰਾਇਲ ਕੀਤੇ। ਇਹ ਟਰਾਇਲ ਆਂਧਰਾ ਪ੍ਰਦੇਸ਼ ਦੇ ਵਿਸ਼ਾਖਾਪਟਨਮ ’ਚ ਪੂਰਬੀ ਸਮੁੰਦਰੀ ਫੌਜ ਕਮਾਂਡ ਵਿਖੇ ‘ਕਰੂ ਮਾਡਿਊਲ ਮੌਕਅੱਪ’ ਦੀ ਵਰਤੋਂ ਕਰ ਕੇ ਕਰਵਾਏ ਗਏ ਸਨ। ਗਗਨਯਾਨ ਪ੍ਰੋਜੈਕਟ ’ਚ ਤਿੰਨ ਮੈਂਬਰਾਂ ਦੀ ਇਕ ਟੀਮ ਨੂੰ ਤਿੰਨ ਦਿਨਾਂ ਮਿਸ਼ਨ ’ਤੇ 400 ਕਿਲੋਮੀਟਰ ਦੇ ਪੁਲਾੜ ਪੰਧ ’ਚ ਭੇਜਣ ਅਤੇ ਹਿੰਦ ਮਹਾਸਾਗਰ ਖੇਤਰ ’ਚ ਲੈਂਡ ਕਰਕੇ ਅਤੇ ਉਨ੍ਹਾਂ ਨੂੰ ਸੁਰੱਖਿਅਤ ਰੂਪ ’ਚ ਧਰਤੀ ਉੱਤੇ ਵਾਪਸ ਲਿਆਉਣਾ ਹੈ।

ਇਸ' ਟੈਸਟਿੰਗ ਪ੍ਰਕਿਰਿਆ ’ਚ ਮੌਕਅੱਪ ਇਕ ਮਹੱਤਵਪੂਰਨ ਹਿੱਸਾ ਹੈ, ਇਹ ਯਕੀਨੀ ਬਣਾਉਣ ਲਈ ਕਿ ਰਿਕਵਰੀ ਪ੍ਰਕਿਰਿਆਵਾਂ ਸਥਿਤੀਆਂ ਲਈ ਸਹੀ ਹਨ। ਅਜ਼ਮਾਇਸ਼ਾਂ ਨੇ ਰਿਕਵਰੀ ਦੇ ਵੱਖ-ਵੱਖ ਪੜਾਵਾਂ ਦੀ ਨਕਲ ਕੀਤੀ, ਜਿਸ ’ਚ ਜਹਾਜ਼ 'ਤੇ 'ਕਰੂ ਮਾਡਿਊਲ' ਨੂੰ ਟੋਇੰਗ, ਹੈਂਡਲਿੰਗ ਅਤੇ ਚੁੱਕਣਾ ਸ਼ਾਮਲ ਹੈ। ਇਕ ਨਿਰਵਿਘਨ ਅਤੇ ਸੁਰੱਖਿਅਤ ਰਿਕਵਰੀ ਪ੍ਰਕਿਰਿਆ ਨੂੰ ਯਕੀਨੀ ਬਣਾਉਣ ਲਈ ਕੋਚੀ ’ਚ ਵਾਟਰ ਸਰਵਾਈਵਲ ਟ੍ਰੇਨਿੰਗ ਫੈਸਿਲਿਟੀ ਵਿਖੇ ਪੜਾਅ-1 ਦੇ ਟਰਾਇਲਾਂ ਦੇ ਤਜ਼ਰਬਿਆਂ ਦੇ ਆਧਾਰ 'ਤੇ ਮਿਆਰੀ ਸੰਚਾਲਨ ਪ੍ਰਕਿਰਿਆਵਾਂ ਨੂੰ ਐਡਜਸਟ ਕੀਤਾ ਗਿਆ ਸੀ। ਪੁਲਾੜ ਏਜੰਸੀ ਨੇ ਕਿਹਾ ਕਿ ਇਸ ਦੁਹਰਾਉਣ ਵਾਲੀ ਪਹੁੰਚ ਨੇ ਸੁਧਾਰ ਕਰਨਾ ਆਸਾਨ ਬਣਾ ਦਿੱਤਾ ਹੈ, ਜਿਸ ਨਾਲ ਰਿਕਵਰੀ ਕਾਰਜਾਂ ਦੀ ਕੁਸ਼ਲਤਾ ਅਤੇ ਭਰੋਸੇਯੋਗਤਾ ਵਧੀ ਹੈ।

ਸਟਾਰਟਅੱਪ ਸਕਾਈਰੂਟ ਦੇ ਰਾਕੇਟ ਇੰਜਣ ਦਾ ਵੀ ਸਫ਼ਲ ਪ੍ਰੀਖਣ

ਇਸਰੋ ਨੇ ਹੈਦਰਾਬਾਦ ਸਥਿਤ ਸਪੇਸ ਸਟਾਰਟਅੱਪ ਸਕਾਈਰੂਟ ਦੇ ਇਕ ਰਾਕੇਟ ਇੰਜਣ ਦਾ ਸਫਲ ਪ੍ਰੀਖਣ ਕੀਤਾ। ਤਾਮਿਲਨਾਡੂ ਦੇ ਮਹੇਂਦਰਗਿਰੀ ਸਥਿਤ ਇਸਰੋ ਪ੍ਰੋਪਲਸ਼ਨ ਕੰਪਲੈਕਸ ਵਿਚ ਲਿਕਵਿਡ ਥ੍ਰਸਟਰ ਟੈਸਟ ਫੈਸੀਲਿਟੀ ’ਚ ਪ੍ਰੀਖਣ ’ਚ ਰਮਨ-2 ਇੰਜਨ ਦਾ ਇਸਤੇਮਾਲ ਕੀਤਾ ਗਿਆ, ਜਿਸ ਨਾਲ 820 ਨਿਊਟਨ (ਸਮੁੰਦਰੀ ਪੱਧਰ) ਅਤੇ 1,460 ਨਿਊਟਨ (ਵੈਕਿਊਮ) ਬਲ ਪੈਦਾ ਕਰਨ ਲਈ ਡਿਜ਼ਾਈਨ ਕੀਤਾ ਗਿਆ ਹੈ। 10 ਸਕਿੰਟ ਦੀ ਮਿਆਦ ਦੇ ਟੈਸਟ ਨੇ ਕਈ ਉਦੇਸ਼ ਮਾਪਦੰਡਾਂ ਨੂੰ ਪੂਰਾ ਕੀਤਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

 For IOS:- https://itunes.apple.com/in/app/id538323711?mt=8