ਕਾਨਪੁਰ ''ਚ ''Special 26'' ਸਟਾਈਲ ''ਚ ਲੁੱਟ! ਪੈਟਰੋਲੀਅਮ ਅਧਿਕਾਰੀ ਬਣ ਕੇ ਆਏ ਠੱਗ ਘਰੋਂ ਲੈ ਗਏ 2 ਗੈਸ ਸਿਲੰਡਰ

ਨੈਸ਼ਨਲ ਡੈਸਕ : ਉੱਤਰ ਪ੍ਰਦੇਸ਼ ਦੇ ਕਾਨਪੁਰ 'ਚ ਫ਼ਿਲਮੀ ਅੰਦਾਜ਼ 'ਚ ਚੋਰੀ ਦੀ ਇੱਕ ਅਨੋਖੀ ਘਟਨਾ ਸਾਹਮਣੇ ਆਈ ਹੈ। ਬਾਲੀਵੁੱਡ ਦੀ ਮਸ਼ਹੂਰ ਫ਼ਿਲਮ 'ਸਪੈਸ਼ਲ 26' ਤੋਂ ਵਾਂਗ ਕੁਝ ਸ਼ਾਤਰ ਠੱਗਾਂ ਨੇ ਪੈਟਰੋਲੀਅਮ ਅਧਿਕਾਰੀ ਬਣ ਕੇ ਇੱਕ ਘਰ 'ਚ ਲੁੱਟ ਦੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਹੈ। ਇਹ ਪੂਰੀ ਘਟਨਾ ਸੀਸੀਟੀਵੀ ਕੈਮਰੇ 'ਚ ਕੈਦ ਹੋ ਗਈ ਹੈ।  ਇਹ ਮਾਮਲਾ ਕਾਨਪੁਰ ਦੇ ਗੋਵਿੰਦ ਨਗਰ ਥਾਣਾ ਖੇਤਰ ਦੀ ਚਰਨ ਸਿੰਘ ਕਾਲੋਨੀ ਦਾ ਹੈ। ਇੱਥੇ ਇੱਕ ਨਿੱਜੀ ਸਕੂਲ ਦੀ ਅਧਿਆਪਕਾ ਕੀਰਤੀ ਵਰਮਾ ਦੇ ਘਰ ਦੋ ਨੌਜਵਾਨ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਪਹੁੰਚੇ। ਉਸ ਸਮੇਂ ਕੀਰਤੀ ਸਕੂਲ ਗਈ ਹੋਈ ਸੀ ਅਤੇ ਉਸ ਦਾ ਭਰਾ ਵੀ ਕੰਮ 'ਤੇ ਬਾਹਰ ਸੀ। ਘਰ ਵਿੱਚ ਸਿਰਫ਼ ਉਸ ਦੀ ਭਾਬੀ ਸਰੋਜਨੀ ਅਤੇ ਇੱਕ 10 ਸਾਲ ਦੀ ਬੱਚੀ ਮੌਜੂਦ ਸੀ।

ਠੱਗਾਂ ਨੇ ਖੁਦ ਨੂੰ ਇੰਡੀਅਨ ਆਇਲ ਕਾਰਪੋਰੇਸ਼ਨ ਦੇ ਅਧਿਕਾਰੀ ਦੱਸਿਆ ਅਤੇ ਕਿਹਾ ਕਿ ਉਹ ਗੈਸ ਸਿਲੰਡਰ ਦੀ ਸੁਰੱਖਿਆ ਜਾਂਚ ਕਰਨ ਆਏ ਹਨ। ਉਨ੍ਹਾਂ ਦੀਆਂ ਗੱਲਾਂ 'ਚ ਆ ਕੇ ਸਰੋਜਨੀ ਨੇ ਉਨ੍ਹਾਂ ਨੂੰ ਘਰ ਦੇ ਅੰਦਰ ਆਉਣ ਦਿੱਤਾ। ਰਸੋਈ 'ਚ ਪਹੁੰਚਦਿਆਂ ਹੀ ਇੱਕ ਨੌਜਵਾਨ ਨੇ ਰੈਗੂਲੇਟਰ ਖੋਲ੍ਹ ਕੇ ਭਰਿਆ ਹੋਇਆ ਸਿਲੰਡਰ ਬਾਹਰ ਕੱਢ ਲਿਆ ਤੇ ਦੂਜੇ ਨੇ ਖਾਲੀ ਸਿਲੰਡਰ ਚੁੱਕ ਲਿਆ।

ਰਸੀਦ ਮੰਗ ਕੇ ਕੀਤਾ ਧਿਆਨ ਭਟਕਾਉਣ ਦਾ ਖੇਡ 
ਵਾਰਦਾਤ ਨੂੰ ਅੰਜਾਮ ਦੇਣ ਲਈ ਠੱਗਾਂ ਨੇ ਬਹੁਤ ਚਾਲਾਕੀ ਵਰਤੀ। ਉਨ੍ਹਾਂ ਨੇ ਸਰੋਜਨੀ ਨੂੰ ਗੈਸ ਏਜੰਸੀ ਦੀ ਰਸੀਦ ਦਿਖਾਉਣ ਲਈ ਕਿਹਾ। ਜਿਵੇਂ ਹੀ ਉਹ ਰਸੀਦ ਲੈਣ ਲਈ ਦੂਜੇ ਕਮਰੇ 'ਚ ਗਈ, ਦੋਵੇਂ ਮੁਲਜ਼ਮ ਸਿਲੰਡਰ ਚੁੱਕ ਕੇ ਮੋਟਰਸਾਈਕਲ 'ਤੇ ਬੈਠ ਕੇ ਫ਼ਰਾਰ ਹੋ ਗਏ। ਜਦੋਂ ਤੱਕ ਮਹਿਲਾ ਬਾਹਰ ਆਈ, ਉਦੋਂ ਤੱਕ ਉਹ ਗਾਇਬ ਹੋ ਚੁੱਕੇ ਸਨ। ਘਟਨਾ ਤੋਂ ਬਾਅਦ ਇਲਾਕੇ 'ਚ ਹੜਕੰਪ ਮਚ ਗਿਆ। ਸੀਸੀਟੀਵੀ ਫੁਟੇਜ ਵਿੱਚ ਦੋਵੇਂ ਮੁਲਜ਼ਮ ਮੋਟਰਸਾਈਕਲ 'ਤੇ ਸਿਲੰਡਰ ਲੱਦ ਕੇ ਲਿਜਾਉਂਦੇ ਸਾਫ਼ ਦਿਖਾਈ ਦੇ ਰਹੇ ਹਨ। ਗੋਵਿੰਦ ਨਗਰ ਥਾਣਾ ਮੁਖੀ ਰਿਕੇਸ਼ ਕੁਮਾਰ ਸਿੰਘ ਅਨੁਸਾਰ ਪੀੜਤਾ ਦੀ ਸ਼ਿਕਾਇਤ 'ਤੇ ਮੁਕੱਦਮਾ ਦਰਜ ਕਰ ਲਿਆ ਗਿਆ ਹੈ ਅਤੇ ਪੁਲਸ ਦੀਆਂ ਟੀਮਾਂ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਲਈ ਲਗਾਤਾਰ ਛਾਪੇਮਾਰੀ ਕਰ ਰਹੀਆਂ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e