''''2 ਕਰੋੜ ਲੈ ਕੇ ਵੇਚ''ਤੀ ਟਿਕਟ..!'''',  ਲਾਲੂ ਦੇ ਘਰ ਬਾਹਰ RJD ਨੇਤਾ ਨੇ ਪਾਇਆ ਖਿਲਾਰਾ, ਕੁੜਤਾ ਪਾੜ ਕੇ ਰੋਇਆ

ਨੈਸ਼ਨਲ ਡੈਸਕ : ਬਿਹਾਰ 'ਚ ਸਿਆਸੀ ਸਰਗਰਮੀ ਆਪਣੇ ਸਿਖਰ 'ਤੇ ਹੈ, ਜਿੱਥੇ ਮਹਾਂਗਠਜੋੜ ਦੇ ਮੁੱਖ ਭਾਈਵਾਲਾਂ, ਰਾਸ਼ਟਰੀ ਜਨਤਾ ਦਲ (RJD) ਅਤੇ ਕਾਂਗਰਸ ਵਿੱਚ ਟਿਕਟ ਵੰਡ ਨੂੰ ਲੈ ਕੇ ਅੰਦਰੂਨੀ ਘਮਾਸਾਨ ਜਾਰੀ ਹੈ। ਇਸ ਦੌਰਾਨ RJD ਦੇ ਇੱਕ ਨਾਰਾਜ਼ ਨੇਤਾ ਨੇ ਟਿਕਟ ਨਾ ਮਿਲਣ 'ਤੇ ਪਾਰਟੀ 'ਤੇ ਗੰਭੀਰ ਦੋਸ਼ ਲਾਉਂਦਿਆਂ ਹਾਈਵੋਲਟੇਜ ਡਰਾਮਾ ਕੀਤਾ।
ਕੁੜਤਾ ਪਾੜ ਕੇ ਰੋਇਆ ਨੇਤਾ:
ਮੋਤੀਹਾਰੀ ਦੀ ਮਧੂਬਨ ਵਿਧਾਨ ਸਭਾ ਸੀਟ ਦੇ ਦਾਅਵੇਦਾਰ RJD ਨੇਤਾ ਮਦਨ ਸ਼ਾਹ ਨੇ ਪਾਰਟੀ ਦਾ ਸਿੰਬਲ (ਟਿਕਟ) ਨਾ ਮਿਲਣ ਤੋਂ ਨਾਰਾਜ਼ ਹੋ ਕੇ ਜ਼ੋਰਦਾਰ ਪ੍ਰਦਰਸ਼ਨ ਕੀਤਾ। ਇਹ ਪੂਰਾ ਡਰਾਮਾ ਲਾਲੂ ਪ੍ਰਸਾਦ ਅਤੇ ਰਬੜੀ ਦੇਵੀ ਦੀ ਰਿਹਾਇਸ਼ 10 ਸਰਕੂਲਰ ਰੋਡ ਦੇ ਬਾਹਰ ਹੋਇਆ। ਮਦਨ ਸ਼ਾਹ ਅਚਾਨਕ ਉੱਥੇ ਪਹੁੰਚੇ ਅਤੇ ਆਪਣਾ ਕੁੜਤਾ ਪਾੜ ਕੇ ਫੁੱਟ-ਫੁੱਟ ਕੇ ਰੋਣ ਲੱਗੇ। ਉਹ ਜ਼ਮੀਨ 'ਤੇ ਲੇਟ ਕੇ ਰੋਸ ਪ੍ਰਦਰਸ਼ਨ ਕਰ ਰਹੇ ਸਨ, ਜਿਸ ਦਾ ਵੀਡੀਓ ਉੱਥੇ ਮੌਜੂਦ ਲੋਕਾਂ ਨੇ ਬਣਾ ਲਿਆ।
'2 ਕਰੋੜ ਤੋਂ ਵੱਧ ਮੰਗੇ ਗਏ':
ਮਦਨ ਸ਼ਾਹ ਨੇ ਵੀਡੀਓ ਵਿੱਚ ਸਿੱਧੇ ਤੌਰ 'ਤੇ ਪਾਰਟੀ 'ਤੇ ਟਿਕਟ ਵੇਚਣ ਦਾ ਦੋਸ਼ ਲਾਇਆ ਹੈ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਉਨ੍ਹਾਂ ਤੋਂ ਦੋ ਕਰੋੜ ਰੁਪਏ ਤੋਂ ਵੱਧ ਦੀ ਰਕਮ ਦੀ ਮੰਗ ਕੀਤੀ ਗਈ ਸੀ। ਪੈਸੇ ਨਾ ਦੇਣ ਕਾਰਨ ਪਾਰਟੀ ਨੇ ਉਨ੍ਹਾਂ ਦਾ ਟਿਕਟ ਕੱਟ ਦਿੱਤਾ ਅਤੇ ਡਾ. ਸੰਤੋਸ਼ ਕੁਸ਼ਵਾਹਾ ਨੂੰ ਦੇ ਦਿੱਤਾ ਹੈ। ਮਦਨ ਸ਼ਾਹ ਨੇ ਕਿਹਾ ਕਿ ਉਹ 1990 ਤੋਂ ਪਾਰਟੀ ਲਈ ਕੰਮ ਕਰਦੇ ਰਹੇ ਹਨ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਉਹ 2020 ਦੀਆਂ ਚੋਣਾਂ ਵਿੱਚ ਵੀ ਪਾਰਟੀ ਦੇ ਸਿੰਬਲ 'ਤੇ ਲੜੇ ਸਨ, ਪਰ ਸਿਰਫ ਦੋ ਹਜ਼ਾਰ ਵੋਟਾਂ ਦੇ ਮਾਮੂਲੀ ਫਰਕ ਨਾਲ ਹਾਰ ਗਏ ਸਨ। ਉਨ੍ਹਾਂ ਦੋਸ਼ ਲਾਇਆ ਕਿ ਸਮਰਪਿਤ ਵਰਕਰਾਂ ਦੀ ਥਾਂ ਪਾਰਟੀ ਵਿੱਚ ਧਨਬਲ ਨੂੰ ਤਰਜੀਹ ਦਿੱਤੀ ਗਈ ਹੈ। ਉਨ੍ਹਾਂ ਨੇ RJD ਦੇ ਸਾਂਸਦ ਸੰਜੇ ਯਾਦਵ 'ਤੇ ਵੀ ਗੰਭੀਰ ਦੋਸ਼ ਲਾਉਂਦਿਆਂ ਕਿਹਾ ਕਿ ਸਾਂਸਦ ਨੇ ਟਿਕਟ ਦੀ ਦਲਾਲੀ ਕੀਤੀ ਅਤੇ ਪੈਸੇ ਲੈ ਕੇ ਟਿਕਟ ਵੇਚਿਆ ਹੈ। ਇਸ ਘਟਨਾ ਨੇ ਬਿਹਾਰ ਚੋਣਾਂ ਦੀ ਸਿਆਸੀ ਸਰਗਰਮੀ ਨੂੰ ਹੋਰ ਵਧਾ ਦਿੱਤਾ ਹੈ।