ਗਣਤੰਤਰ ਦਿਵਸ ਮੌਕੇ ਦੇਸ਼ ਦੇ ''ਗੁੰਮਨਾਮ ਨਾਇਕਾਂ'' ਦਾ ਵੱਡਾ ਸਨਮਾਨ, 45 ਸ਼ਖਸੀਅਤਾਂ ਨੂੰ ਮਿਲੇਗਾ ਪਦਮ ਸ਼੍ਰੀ

ਨਵੀਂ ਦਿੱਲੀ- ਗਣਤੰਤਰ ਦਿਵਸ ਦੇ ਸ਼ੁੱਭ ਮੌਕੇ 'ਤੇ ਭਾਰਤ ਸਰਕਾਰ ਨੇ ਦੇਸ਼ ਦੇ ਉਨ੍ਹਾਂ 'ਗੁੰਮਨਾਮ ਨਾਇਕਾਂ' (Unsung Heroes) ਨੂੰ ਸਨਮਾਨਿਤ ਕਰਨ ਦਾ ਫੈਸਲਾ ਕੀਤਾ ਹੈ, ਜਿਨ੍ਹਾਂ ਨੇ ਬਿਨਾਂ ਕਿਸੇ ਪ੍ਰਚਾਰ ਦੇ ਸਮਾਜ ਦੀ ਬਿਹਤਰੀ ਲਈ ਆਪਣਾ ਜੀਵਨ ਲਗਾ ਦਿੱਤਾ ਹੈ। ਇਸ ਵਾਰ ਪਦਮ ਸ਼੍ਰੀ ਪੁਰਸਕਾਰਾਂ ਲਈ 45 ਅਜਿਹੇ ਵਿਅਕਤੀਆਂ ਦੀ ਚੋਣ ਕੀਤੀ ਗਈ ਹੈ ਜੋ ਦੇਸ਼ ਦੇ ਕੋਨੇ-ਕੋਨੇ 'ਚ ਚੁੱਪ-ਚਾਪ ਮਨੁੱਖਤਾ ਦੀ ਸੇਵਾ ਕਰ ਰਹੇ ਹਨ।

ਬੱਸ ਕੰਡਕਟਰ ਤੋਂ ਲੈ ਕੇ ਡਾਕਟਰਾਂ ਤੱਕ, ਸਭ ਨੇ ਗੱਡੇ ਝੰਡੇ 

ਇਸ ਸੂਚੀ 'ਚ ਕਰਨਾਟਕ ਦੇ 75 ਸਾਲਾ ਅੰਕੇ ਗੌੜਾ ਦਾ ਨਾਮ ਪ੍ਰਮੁੱਖ ਹੈ, ਜੋ ਕਦੇ ਬੱਸ ਕੰਡਕਟਰ ਹੁੰਦੇ ਸਨ। ਉਨ੍ਹਾਂ ਨੇ ਦੁਨੀਆ ਦੀ ਸਭ ਤੋਂ ਵੱਡੀ ਫ੍ਰੀ-ਐਕਸੈਸ ਲਾਇਬ੍ਰੇਰੀ 'ਪੁਸਤਕ ਮਾਨੇ' ਸਥਾਪਿਤ ਕੀਤੀ ਹੈ, ਜਿਸ 'ਚ 20 ਭਾਸ਼ਾਵਾਂ ਦੀਆਂ 20 ਲੱਖ ਤੋਂ ਵੱਧ ਕਿਤਾਬਾਂ ਅਤੇ ਦੁਰਲੱਭ ਹੱਥ-ਲਿਖਤਾਂ ਮੌਜੂਦ ਹਨ। ਇਸੇ ਤਰ੍ਹਾਂ ਮੁੰਬਈ ਦੀ ਬਾਲ ਰੋਗ ਮਾਹਿਰ ਅਰਮੀਡਾ ਫਰਨਾਂਡੇਜ਼ ਨੂੰ ਏਸ਼ੀਆ ਦਾ ਪਹਿਲਾ 'ਹਿਊਮਨ ਮਿਲਕ ਬੈਂਕ' ਸਥਾਪਿਤ ਕਰਨ ਲਈ ਸਨਮਾਨਿਤ ਕੀਤਾ ਜਾਵੇਗਾ, ਜਿਸ ਨੇ ਹਜ਼ਾਰਾਂ ਨਵਜੰਮੇ ਬੱਚਿਆਂ ਦੀ ਜਾਨ ਬਚਾਉਣ 'ਚ ਮਦਦ ਕੀਤੀ ਹੈ।

ਕਲਾ ਅਤੇ ਸੱਭਿਆਚਾਰ ਦੇ ਰਾਖੇ ਪੁਰਸਕਾਰ ਜੇਤੂਆਂ ਵਿੱਚ ਕਲਾ ਨੂੰ ਸਮਰਪਿਤ ਕਈ ਸ਼ਖਸੀਅਤਾਂ ਸ਼ਾਮਲ ਹਨ:

ਭੀਕਲਿਆ ਲਾਡਕਿਆ ਢਿੰਡਾ: ਮਹਾਰਾਸ਼ਟਰ ਦੇ 90 ਸਾਲਾ ਆਦਿਵਾਸੀ ਕਲਾਕਾਰ, ਜੋ 'ਤਾਰਪਾ' (ਲੌਕੀ ਅਤੇ ਬਾਂਸ ਤੋਂ ਬਣਿਆ ਸਾਜ਼) ਵਜਾਉਣ 'ਚ ਮਾਹਰ ਹਨ।
ਧਾਰਮਿਕਲਾਲ ਚੁਨੀਲਾਲ ਪਾਂਡਿਆ: ਗੁਜਰਾਤ ਦੀ ਰਵਾਇਤੀ ਕਲਾ 'ਮਾਨਭੱਟ' ਦੇ ਪ੍ਰਸਿੱਧ ਕਲਾਕਾਰ।
ਕੇ ਪਜਾਨੀਵੇਲ: ਪੁਡੂਚੇਰੀ ਦੇ ਵਸਨੀਕ, ਜੋ ਤਾਮਿਲ ਮਾਰਸ਼ਲ ਆਰਟ 'ਸਿਲੰਬਮ' ਨੂੰ ਜਿਉਂਦਾ ਰੱਖ ਰਹੇ ਹਨ।
ਖੇਮ ਰਾਜ ਸੁੰਦਰੀਆਲ: ਹਰਿਆਣਾ ਦੇ ਇਸ ਕਲਾਕਾਰ ਨੇ 'ਜਾਮਦਾਨੀ' ਬੁਣਾਈ ਦੀ ਤਕਨੀਕ ਨੂੰ ਹਜ਼ਾਰਾਂ ਕਾਰੀਗਰਾਂ ਤੱਕ ਪਹੁੰਚਾਇਆ ਅਤੇ ਪਾਨੀਪਤ ਦੇ ਮਸ਼ਹੂਰ 'ਖੇਸ' ਨੂੰ ਨਵੇਂ ਡਿਜ਼ਾਈਨਾਂ ਨਾਲ ਸੁਰਜੀਤ ਕੀਤਾ ਹੈ।

ਔਖੇ ਹਾਲਾਤਾਂ 'ਚ ਸੇਵਾ ਦੀ ਮਿਸਾਲ 

ਇਹ ਪੁਰਸਕਾਰ ਉਨ੍ਹਾਂ ਲੋਕਾਂ ਨੂੰ ਦਿੱਤੇ ਜਾ ਰਹੇ ਹਨ ਜਿਨ੍ਹਾਂ ਨੇ ਨਿੱਜੀ ਦੁਖਾਂਤ ਅਤੇ ਭਾਰੀ ਮੁਸ਼ਕਲਾਂ ਦੇ ਬਾਵਜੂਦ ਸਮਾਜ ਦੀ ਸੇਵਾ ਕੀਤੀ। ਇਸ 'ਚ ਛੱਤੀਸਗੜ੍ਹ ਦੇ ਨਕਸਲ ਪ੍ਰਭਾਵਿਤ ਇਲਾਕਿਆਂ 'ਚ ਸਕੂਲ ਚਲਾਉਣ ਵਾਲੀ ਬੁਦਰੀ ਥਾਟੀ ਅਤੇ ਜੰਮੂ-ਕਸ਼ਮੀਰ ਦੇ ਉੱਘੇ ਸਮਾਜ ਸੇਵੀ ਬ੍ਰਿਜ ਲਾਲ ਭੱਟ ਦੇ ਨਾਮ ਸ਼ਾਮਲ ਹਨ। ਇਸ ਤੋਂ ਇਲਾਵਾ, ਹੈਦਰਾਬਾਦ ਦੇ ਜੈਨੇਟਿਕਸਿਸਟ ਕੁਮਾਰਸਾਮੀ ਥੰਗਾਰਾਜ, ਜਿਨ੍ਹਾਂ ਨੇ ਅਫਰੀਕਾ ਤੋਂ ਭਾਰਤ ਤੱਕ ਮਨੁੱਖੀ ਪਰਵਾਸ ਦੀ ਖੋਜ ਕੀਤੀ, ਨੂੰ ਵੀ ਸਨਮਾਨਿਤ ਕੀਤਾ ਜਾ ਰਿਹਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e