ਦਿੱਲੀ ਤੋਂ ਦੇਸ਼ ਭਰ ਦੇ 25,000 ਡਾਕਘਰਾਂ ਦੀ ਮੁੜ-ਸੁਰਜੀਤ ਮੁਹਿੰਮ ਸ਼ੁਰੂ

ਨਵੀਂ ਦਿੱਲੀ : ਦਿੱਲੀ ਦੀ ਮੁੱਖ ਮੰਤਰੀ ਰੇਖਾ ਗੁਪਤਾ ਵੀਰਵਾਰ ਨੂੰ ਨਹਿਰੂ ਪਲੇਸ ਸਥਿਤ ਮੁੜ-ਵਿਕਸਤ ਕੀਤੇ ਗਏ ਪੋਸਟ ਆਫਿਸ ‘ਜਨ ਸੇਵਾ ਕਨੈਕਟ’ ਦੇ ਉਦਘਾਟਨੀ ਪ੍ਰੋਗਰਾਮ ਵਿਚ ਕੇਂਦਰੀ ਸੰਚਾਰ ਮੰਤਰੀ ਜਯੋਤੀਰਾਦਿੱਤਿਆ ਸਿੰਧੀਆ ਅਤੇ ਕੇਂਦਰੀ ਸੰਚਾਰ ਰਾਜ ਮੰਤਰੀ ਡਾ. ਪੇਮਾਸਾਨੀ ਚੰਦਰਸ਼ੇਖਰ ਦੇ ਨਾਲ ਸ਼ਾਮਲ ਹੋਈ।

ਮੁੱਖ ਮੰਤਰੀ ਰੇਖਾ ਗੁਪਤਾ ਨੇ ਕੇਂਦਰੀ ਮੰਤਰੀਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਦੇਸ਼ ਭਰ ਵਿਚ ਡਾਕਘਰਾਂ ਦੇ ਆਧੁਨਿਕੀਕਰਨ ਅਤੇ ਮੁੜ-ਸੁਰਜੀਤ ਦੀ ਇਸ ਅਹਿਮ ਪਹਿਲ ਦੀ ਸ਼ੁਰੂਆਤ ਦਿੱਲੀ ਤੋਂ ਕੀਤਾ ਜਾਣਾ ਮਾਣ ਵਾਲੀ ਗੱਲ ਹੈ। ਉਨ੍ਹਾਂ ਕਿਹਾ ਕਿ ਕੇਂਦਰ ਸਰਕਾਰ ਵੱਲੋਂ ਦੇਸ਼ ਭਰ ’ਚ 25,000 ਡਾਕਘਰਾਂ ਦੇ ਨਵੀਨੀਕਰਨ ਦਾ ਫੈਸਲਾ ਦੂਰਅੰਦੇਸ਼ੀ ਸੋਚ ਦਾ ਪ੍ਰਤੀਕ ਹੈ।

ਜਨ ਸੇਵਾ ਦੇ ਮਜ਼ਬੂਤ ਕੇਂਦਰ ਬਣ ਕੇ ਉੱਭਰਨਗੇ
ਦਿੱਲੀ ਦੀ ਮੁੱਖ ਮੰਤਰੀ ਰੇਖਾ ਗੁਪਤਾ ਨੇ ਭਰੋਸਾ ਪ੍ਰਗਟਾਇਆ ਕਿ ਆਉਣ ਵਾਲੇ ਸਮੇਂ ਵਿਚ ਮੁੜ-ਵਿਕਸਤ ਡਾਕਘਰ ਨਾਗਰਿਕਾਂ ਲਈ ਆਧੁਨਿਕ ਸਹੂਲਤਾਂ, ਡਿਜੀਟਲ ਸੇਵਾਵਾਂ ਅਤੇ ਭਰੋਸੇਯੋਗ ਜਨ ਸੇਵਾ ਦੇ ਮਜ਼ਬੂਤ ਕੇਂਦਰ ਬਣ ਕੇ ਉੱਭਰਨਗੇ। ਉਨ੍ਹਾਂ ਕਿਹਾ ਕਿ ਦਿੱਲੀ ਸਰਕਾਰ ਕੇਂਦਰ ਸਰਕਾਰ ਨਾਲ ਮਿਲ ਕੇ ਇਨ੍ਹਾਂ ਸੇਵਾਵਾਂ ਨੂੰ ਘਰ-ਘਰ ਪਹੁੰਚਾਉਣ ਅਤੇ ਵੱਧ ਤੋਂ ਵੱਧ ਨਾਗਰਿਕਾਂ ਨੂੰ ਇਸ ਨਾਲ ਜੋੜਨ ਲਈ ਹਰ ਸੰਭਵ ਸਹਿਯੋਗ ਕਰੇਗੀ। ਉਨ੍ਹਾਂ ਕਿਹਾ ਕਿ ਇਸ ਵਿਸ਼ਾਲ ਨੈੱਟਵਰਕ ਨੂੰ ਬੰਦ ਕਰਨ ਦੀ ਬਜਾਏ ਆਧੁਨਿਕ ਤਕਨੀਕ ਅਤੇ ਨਵੀਆਂ ਸੇਵਾਵਾਂ ਰਾਹੀਂ ਮੁੜ ਸੁਰਜੀਤ ਕਰਨਾ ਕੇਂਦਰ ਸਰਕਾਰ ਦੀ ਦੂਰਅੰਦੇਸ਼ੀ ਸੋਚ ਅਤੇ ਸੰਵੇਦਨਸ਼ੀਲ ਅਗਵਾਈ ਦੀ ਮਿਸਾਲ ਹੈ।

ਲੋਕਾਂ ਨੂੰ ਇਕੋ ਥਾਂ ’ਤੇ ਕਈ ਸੇਵਾਵਾਂ ਦਾ ਮਿਲ ਰਿਹਾ ਲਾਭ
ਮੁੱਖ ਮੰਤਰੀ ਰੇਖਾ ਗੁਪਤਾ ਨੇ ਕਿਹਾ ਕਿ ਲੰਬੇ ਸਮੇਂ ਤੱਕ ਡਾਕਘਰ ਸਿਰਫ਼ ਚਿੱਠੀਆਂ ਅਤੇ ਪਾਰਸਲ ਸੇਵਾ ਤੱਕ ਸੀਮਤ ਮੰਨੇ ਜਾਂਦੇ ਸਨ ਪਰ ਅੱਜ ਡਾਕਘਰ ਬਹੁ-ਮੰਤਵੀ ਜਨ ਸੇਵਾ ਕੇਂਦਰਾਂ ਵਜੋਂ ਵਿਕਸਤ ਹੋ ਚੁੱਕੇ ਹਨ। ਹੁਣ ਡਾਕਘਰਾਂ ਵਿਚ ਬੈਂਕਿੰਗ, ਬੱਚਤ ਯੋਜਨਾਵਾਂ, ਆਧਾਰ ਰੀਡੈਕਟਿਡ ਸੇਵਾਵਾਂ, ਪਾਸਪੋਰਟ ਸੇਵਾਵਾਂ ਅਤੇ ਡਿਜੀਟਲ ਸਹੂਲਤਾਂ ਉਪਲਬਧ ਕਰਵਾਈਆਂ ਜਾ ਰਹੀਆਂ ਹਨ, ਜਿਸ ਨਾਲ ਆਮ ਨਾਗਰਿਕਾਂ ਨੂੰ ਇਕੋ ਥਾਂ ’ਤੇ ਅਨੇਕਾਂ ਸੇਵਾਵਾਂ ਦਾ ਲਾਭ ਮਿਲ ਰਿਹਾ ਹੈ। ਡਾਕਘਰਾਂ ਨੂੰ ਆਧੁਨਿਕ ਰੂਪ ਦੇਣ ਦੇ ਨਾਲ-ਨਾਲ ਨਾਗਰਿਕਾਂ ਦੇ ਤਜਰਬੇ ਨੂੰ ਬਿਹਤਰ ਬਣਾਉਣ ਦੀ ਦਿਸ਼ਾ ਵਿਚ ਵੀ ਕੰਮ ਕੀਤਾ ਗਿਆ ਹੈ। ਡਾਕ ਕਰਮਚਾਰੀਆਂ ਦੀ ਕਾਰਜ ਵਿਵਸਥਾ, ਬੈਠਣ ਦੀ ਸਹੂਲਤ, ਆਧੁਨਿਕ ਡਿਜ਼ਾਈਨ ਅਤੇ ਗਾਹਕ ਸੇਵਾ ਦੀ ਗੁਣਵੱਤਾ ਵਿਚ ਜੋ ਤਬਦੀਲੀ ਦੇਖਣ ਨੂੰ ਮਿਲੀ ਹੈ, ਉਹ ਪ੍ਰਭਾਵਸ਼ਾਲੀ ਹੈ।