ਨਵੇਂ ਰਾਹੁਲ ਗਾਂਧੀ ਦਾ ਉਭਾਰ

ਕੇਰਲਮ ’ਚ ਵੀ. ਡੀ. ਸਤੀਸਨ ਤੇ ਕਰਨਾਟਕ ’ਚ ਡੀ. ਕੇ. ਸ਼ਿਵਕੁਮਾਰ ਦੀ ਮੁੱਖ ਮੰਤਰੀ ਵਜੋਂ ਸੁਚਾਰੂ ਨਿਯੁਕਤੀ ਲਈ ਪਾਰਟੀ ਅੰਦਰ ਕਾਂਗਰਸ ਦੇ ਨੇਤਾ ਰਾਹੁਲ ਗਾਂਧੀ ਨੇ ਸ਼ਲਾਘਾ ਹਾਸਲ ਕੀਤੀ ਹੈ। ਬਹੁਤ ਸਾਰੇ ਸੀਨੀਅਰ ਨੇਤਾਵਾਂ ਨੇ ਉਨ੍ਹਾਂ ਨੂੰ ਫੈਸਲਾ ਲੈਣ ਵਾਲੇ ਤੇ ਸੰਜਮੀ ਸਿਆਸੀ ਪ੍ਰਬੰਧਕ ਹੋਣ ਦਾ ਸਿਹਰਾ ਦਿੱਤਾ ਹੈ।

ਕੇਰਲਮ ’ਚ ਰਾਹੁਲ ਗਾਂਧੀ ਨੇ ਸਤੀਸਨ ਨੂੰ ਉੱਚ ਅਹੁਦੇ ਲਈ ਹਮਾਇਤ ਦੇ ਕੇ ਬਹੁਤ ਸਾਰੇ ਲੋਕਾਂ ਨੂੰ ਹੈਰਾਨ ਕਰ ਦਿੱਤਾ ਕਿਉਂਕਿ ਇਹ ਅੰਦਾਜ਼ਾ ਲਾਇਆ ਜਾ ਰਿਹਾ ਸੀ ਕਿ ਉਹ ਆਪਣੇ ਨਜ਼ਦੀਕੀ ਸਹਿਯੋਗੀ ਕੇ. ਸੀ. ਵੇਣੂਗੋਪਾਲ ਦੀ ਹਮਾਇਤ ਕਰਨਗੇ।

ਕਰਨਾਟਕ ’ਚ ਸਿੱਧਰਮਈਆ ਨੂੰ ਸੁਚਾਰੂ ਢੰਗ ਨਾਲ ਹਟਾਉਣ ਤੇ ਸ਼ਿਵਕੁਮਾਰ ਲਈ ਸੱਤਾ ਦੇ ਸ਼ਾਂਤੀਪੂਰਨ ਤਬਾਦਲੇ ਨੂੰ ਯਕੀਨੀ ਬਣਾਉਣ ’ਚ ਉਨ੍ਹਾਂ ਦੀ ਭੂਮਿਕਾ ਨੂੰ ਉਸ ਪਾਰਟੀ ’ਚ ਸਫਲ ਜਾਨਸ਼ੀਨ ਪ੍ਰਬੰਧਨ ਦੀ ਇਕ ਵਿਲੱਖਣ ਉਦਾਹਰਣ ਵਜੋਂ ਸ਼ਲਾਘਾ ਕੀਤੀ ਗਈ ਜੋ ਅਕਸਰ ਧੜੇਬੰਦੀਆਂ ਨਾਲ ਜੂਝਦੀ ਰਹਿੰਦੀ ਹੈ।

ਹਾਲਾਂਕਿ, ਕਾਂਗਰਸ ਦੇ ਅੰਦਰੂਨੀ ਸੂਤਰਾਂ ਦਾ ਕਹਿਣਾ ਹੈ ਕਿ ਇਹ ਤਬਦੀਲੀ ਬਹੁਤ ਪਹਿਲਾਂ ਸ਼ੁਰੂ ਹੋਈ ਸੀ। ਸਾਲਾਂ ਤੋਂ ਰਾਹੁਲ ਗਾਂਧੀ ਨੂੰ ਇਕ ਅਜਿਹੇ ਨੇਤਾ ਵਜੋਂ ਵੇਖਿਆ ਜਾਂਦਾ ਸੀ ਜੋ ਠਰ੍ਹੰਮੇ ਨਾਲ ਸੀਨੀਅਰ ਸਾਥੀਆਂ ਤੇ ਸੋਨੀਆ ਗਾਂਧੀ ਦੀ ਗੱਲ ਸੁਣਦੇ ਸਨ ਤੇ ਅਕਸਰ ਸਿਆਸੀ ਬੋਝ ਚੁੱਕਦੇ ਹੋਏ ਸਾਂਝੇ ਫੈਸਲਿਆਂ ਦੀ ਪਾਲਣਾ ਕਰਦੇ ਸਨ।

ਫਿਰ ਵੀ, ਉਨ੍ਹਾਂ 6 ਮਈ ਨੂੰ ਇਕ ਲਕੀਰ ਖਿੱਚਣ ਦਾ ਫੈਸਲਾ ਕੀਤਾ ਜਦੋਂ ਉਨ੍ਹਾਂ ਅਚਾਨਕ ਡੀ. ਐੱਮ. ਕੇ. ਨਾਲੋਂ ਸੰਬੰਧ ਤੋੜ ਲਏ ਤੇ ਤਾਮਿਲਨਾਡੂ ’ਚ ਵਿਜੇ ਦੀ ਟੀ. ਵੀ. ਕੇ. ਨਾਲ ਕਾਂਗਰਸ ਦਾ ਗੱਠਜੋੜ ਕਰ ​​ਲਿਆ। ਇਸ ਕਦਮ ਨੇ ਸਿਆਸੀ ਹਲਕਿਆਂ ’ਚ ਹਲਚਲ ਮਚਾ ਦਿੱਤੀ। ਆਲੋਚਕਾਂ ਨੇ ਉਨ੍ਹਾਂ ’ਤੇ ਆਪਣੇ ਇਕ ਪੁਰਾਣੇ ਸਹਿਯੋਗੀ ਨਾਲ ਧੋਖਾ ਕਰਨ ਦਾ ਦੋਸ਼ ਲਾਇਆ ਪਰ ਅੰਦਰੂਨੀ ਸੂਤਰਾਂ ਦਾ ਕਹਿਣਾ ਹੈ ਕਿ ਰਾਹੁਲ ਵਿਧਾਨ ਸਭਾ ਚੋਣਾਂ ਤੋਂ ਬਹੁਤ ਪਹਿਲਾਂ ਹੀ ਡੀ. ਐੱਮ. ਕੇ. ਤੋਂ ਵੱਖ ਹੋਣ ਦੀ ਵਕਾਲਤ ਕਰ ਰਹੇ ਸਨ।

ਪੁਰਾਣੇ ਸੰਬੰਧਾਂ ਤੇ ਡੀ. ਐੱਮ. ਕੇ. ਲੀਡਰਸ਼ਿਪ ਨਾਲ ਜ਼ੋਰਦਾਰ ਲਾਬਿੰਗ ਤੋਂ ਬਾਅਦ ਸੋਨੀਆ ਗਾਂਧੀ ਨੇ ਉਨ੍ਹਾਂ ਦੀ ਸਲਾਹ ਨੂੰ ਨਜ਼ਰਅੰਦਾਜ਼ ਕਰ ਦਿੱਤਾ। ਨਤੀਜਿਆਂ ਦੇ ਐਲਾਨ ਤੋਂ ਬਾਅਦ ਰਾਹੁਲ ਨੇ ਤੇਜ਼ੀ ਨਾਲ ਕੰਮ ਕੀਤਾ। ਕੇਰਲਮ ਤੇ ਕਰਨਾਟਕ ’ਚ ਲਏ ਗਏ ਫੈਸਲਿਆਂ ਨੇ ਹੋਰ ਪੁਸ਼ਟੀ ਕੀਤੀ ਕਿ ਉਹ ਹੁਣ ਵਧੇਰੇ ਤਾਕਤ ਨਾਲ ਅਧਿਕਾਰ ਵਰਤ ਰਹੇ ਹਨ।

ਰਾਜਸਥਾਨ ਤੇ ਛੱਤੀਸਗੜ੍ਹ ’ਚ ਪਹਿਲਾਂ ਲੀਡਰਸ਼ਿਪ ’ਚ ਤਬਦੀਲੀ ਨੂੰ ਲੈ ਕੇ ਮਿਲੀ ਨਾਕਾਮੀ ਤੋਂ ਬਾਅਦ ਰਾਹੁਲ ਗਾਂਧੀ ਹੁਣ ਪਿਛਲੀਆਂ ਗਲਤੀਆਂ ਨੂੰ ਨਾ ਦੁਹਰਾਉਣ ਲਈ ਦ੍ਰਿੜ੍ਹ ਸੰਕਲਪ ਵਿਖਾਈ ਦਿੰਦੇ ਹਨ।