ਕੀਟਨਾਸ਼ਕ ਰਹਿੰਦ-ਖੂੰਹਦ ਰਹਿਤ ਫਲਾਂ, ਸਬਜ਼ੀਆਂ ਦਾ ਉਤਪਾਦਨ ਨਿਰਯਾਤ ਲਈ ਮਹੱਤਵਪੂਰਨ: ਖੇਤੀਬਾੜੀ ਰਾਜ ਮੰਤਰੀ

ਨਵੀਂ ਦਿੱਲੀ- ਕੇਂਦਰੀ ਖੇਤੀਬਾੜੀ ਰਾਜ ਮੰਤਰੀ ਸ਼ੋਭਾ ਕਰੰਦਲਾਜੇ ਨੇ ਸੋਮਵਾਰ ਨੂੰ ਨਿਰਯਾਤ ਦੇ ਨਾਲ-ਨਾਲ ਕਿਸਾਨਾਂ ਦੀ ਆਮਦਨ ਵਧਾਉਣ ਲਈ ਕੀਟਨਾਸ਼ਕ ਰਹਿੰਦ-ਖੂੰਹਦ ਰਹਿਤ ਫਲਾਂ ਅਤੇ ਸਬਜ਼ੀਆਂ ਦੀ ਕਾਸ਼ਤ 'ਤੇ ਜ਼ੋਰ ਦਿੱਤਾ। ਮੰਤਰੀ ਨੇ 19 ਤੋਂ 23 ਜੂਨ ਦੌਰਾਨ ਮੁੰਬਈ 'ਚ ਆਯੋਜਿਤ ਅੰਬ 'ਤੇ ਲੱਗਣ ਵਾਲੀਆਂ ਮੱਖੀਆਂ ਦੇ ਪ੍ਰਬੰਧਨ ਲਈ ਇਕ ਵਰਕਸ਼ਾਪ ਦਾ ਉਦਘਾਟਨ ਕਰਨ ਤੋਂ ਬਾਅਦ ਇਹ ਗੱਲ ਆਖੀ।

ਖੇਤੀਬਾੜੀ ਮੰਤਰਾਲਾ ਨੇ ਇਕ ਬਿਆਨ ਵਿਚ ਕਿਹਾ ਕਿ ਏਸ਼ੀਆ ਅਤੇ ਪ੍ਰਸ਼ਾਂਤ ਪਲਾਂਟ ਪ੍ਰੋਟੈਕਸ਼ਨ ਕਮਿਸ਼ਨ (ਏ.ਪੀ.ਪੀ.ਪੀ.ਸੀ.) ਨੇ ਸਰਬਸੰਮਤੀ ਨਾਲ ਭਾਰਤ ਨੂੰ ਨਵੰਬਰ, 2022 ਦੇ ਦੌਰਾਨ 2023-24 ਦੇ ਦੋ ਸਾਲਾਂ ਲਈ ਏਕੀਕ੍ਰਿਤ ਕੀਟ ਪ੍ਰਬੰਧਨ (ਆਈ.ਪੀ.ਐੱਮ.) ਦੀ ਸਥਾਈ ਕਮੇਟੀ ਦੇ ਚੇਅਰਮੈਨ ਵਜੋਂ ਚੁਣਿਆ ਹੈ। 

ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਕਰੰਦਲਾਜੇ ਨੇ "ਦੁਨੀਆ ਭਰ ਵਿਚ ਮੰਡੀਆਂ ਲੱਭਣ ਲਈ ਕੀਟ-ਮੁਕਤ ਅਤੇ ਰਹਿੰਦ-ਖੂੰਹਦ-ਮੁਕਤ ਫਲਾਂ ਅਤੇ ਸਬਜ਼ੀਆਂ ਦੇ ਉਤਪਾਦਨ 'ਤੇ ਜ਼ੋਰ ਦਿੱਤਾ ਤਾਂ ਜੋ ਕਿਸਾਨਾਂ ਦੀ ਆਮਦਨ ਨੂੰ ਵਧਾਇਆ ਜਾ ਸਕੇ।''

ਸੰਯੁਕਤ ਸਕੱਤਰ (ਪੀ.ਪੀ.) ਆਸ਼ੀਸ਼ ਕੁਮਾਰ ਸ਼੍ਰੀਵਾਸਤਵ ਨੇ ਅੰਤਰਰਾਸ਼ਟਰੀ ਪਲਾਂਟ ਪ੍ਰੋਟੈਕਸ਼ਨ ਸੰਮੇਲਨ (ਆਈ.ਪੀ.ਪੀ.ਸੀ.), ਏ.ਪੀ.ਪੀ.ਸੀ. ਅਤੇ ਵਸਤੂਆਂ ਦੀ ਸੁਰੱਖਿਅਤ ਪਾਰਦਰਸ਼ੀ ਆਵਾਜਾਈ ਲਈ ਫਾਈਟੋਸੈਨਿਟਰੀ ਮਿਟੇਸ਼ਨ ਵਿਚ ਉਨ੍ਹਾਂ ਦੀ ਭੂਮਿਕਾ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਨੇ ਭਾਰਤ ਵਿਚ ਅੰਬ ਲਈ ਪ੍ਰਣਾਲੀ ਲਾਗੂ ਕਰਨ ਬਾਰੇ ਆਪਣੇ ਤਜ਼ਰਬੇ ਸਾਂਝੇ ਕੀਤੇ। 

ਇਸ ਸਬੰਧ ਵਿਚ, ਉਨ੍ਹਾਂ ਸੂਬੇ ਦੇ ਖੇਤੀਬਾੜੀ ਵਿਭਾਗ ਨਾਲ ਖੇਤੀਬਾੜੀ ਰਜਿਸਟ੍ਰੇਸ਼ਨ/ਬਗੀਚਿਆਂ ਦੀ ਰਜਿਸਟ੍ਰੇਸ਼ਨ, ਕਿਸਾਨ ਪੱਧਰ 'ਤੇ ਏਕੀਕ੍ਰਿਤ ਕੀਟ ਪ੍ਰਬੰਧਨ ਦੀ ਵਰਤੋਂ, ਕੀੜਿਆਂ ਦੀ ਨਿਯਮਤ ਨਿਗਰਾਨੀ ਅਤੇ ਸਮੇਂ ਸਿਰ ਪ੍ਰਬੰਧਨ ਦੁਆਰਾ ਸਾਰੀਆਂ ਮਹੱਤਵਪੂਰਨ ਖੇਤੀ ਜਿਣਸਾਂ ਲਈ ਸਿਸਟਮ ਪਹੁੰਚ ਦੇ ਵਿਕਾਸ 'ਤੇ ਜ਼ੋਰ ਦਿੱਤਾ ਤਾਂ ਜੋ ਸਾਰੇ ਕਿਸਾਨ, ਇੱਥੋਂ ਤੱਕ ਕਿ ਛੋਟੇ ਅਤੇ ਸੀਮਾਂਤ ਕਿਸਾਨ ਵੀ, ਨਿਰਯਾਤ ਗੁਣਵੱਤਾ ਉਤਪਾਦ ਪੈਦਾ ਕਰ ਸਕਣ। ਡਾਇਰੈਕਟਰ, ਆਈ.ਸੀ.ਏ.ਆਰ.-ਐੱਨ.ਬੀ.ਏ.ਆਈ.ਆਰ., ਡਾ: ਐੱਸ.ਐੱਨ. ਸੁਸ਼ੀਲ ਨੇ ਫਾਈਟੋਸੈਨੇਟਰੀ ਉਪਾਵਾਂ ਲਈ ਅੰਤਰਰਾਸ਼ਟਰੀ ਮਿਆਰ ਦੇ ਅਨੁਸਾਰ ਭਾਰਤ ਵਿੱਚ ਸਿਸਟਮ ਪਹੁੰਚ ਦੇ ਸਫਲ ਲਾਗੂ ਹੋਣ ਬਾਰੇ ਜਾਣਕਾਰੀ ਦਿੱਤੀ ਅਤੇ ਵਿਸ਼ੇਸ਼ ਤੌਰ 'ਤੇ ਗ੍ਰੇਪੇਨੇਟ ਦੀ ਅੰਤਰਰਾਸ਼ਟਰੀ ਤੌਰ 'ਤੇ ਮਾਨਤਾ ਪ੍ਰਾਪਤ ਪ੍ਰਣਾਲੀਆਂ ਦੀ ਪਹੁੰਚ ਨੂੰ ਯਾਦ ਕੀਤਾ।