ਰਾਮਵਿਲਾਸ ਪਾਸਵਾਨ ਦੇ ਦਿਹਾਂਤ ਤੋਂ ਬਾਅਦ ਪੀਊਸ਼ ਗੋਇਲ ਬਣੇ ਉਪਭੋਗਤਾ ਮਾਮਲਿਆਂ ਦੇ ਮੰਤਰੀ

ਨਵੀਂ ਦਿੱਲੀ- ਰੇਲ ਮੰਤਰੀ ਪੀਊਸ਼ ਗੋਇਲ ਨੂੰ ਸ਼੍ਰੀ ਰਾਮ ਵਿਲਾਸ ਪਾਸਵਾਨ ਦੇ ਦਿਹਾਂਤ ਤੋਂ ਬਾਅਦ ਉਨ੍ਹਾਂ ਦੇ ਮੰਤਰਾਲੇ ਦਾ ਕੰਮ ਸੌਂਪਿਆ ਗਿਆ ਹੈ। ਅਧਿਕਾਰਤ ਸੂਤਰਾਂ ਨੇ ਸ਼ੁੱਕਰਵਾਰ ਨੂੰ ਦੱਸਿਆ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਸਲਾਹ 'ਤੇ ਸ਼੍ਰੀ ਗੋਇਲ ਨੂੰ ਫੂਡ, ਸਪਲਾਈ ਅਤੇ ਉਪਭੋਗਤਾ ਮਾਮਲਿਆਂ ਦਾ ਕੰਮ ਦਿੱਤਾ ਗਿਆ ਹੈ। ਰਾਮ ਵਿਲਾਸ ਪਾਸਵਾਨ ਦਾ 74 ਸਾਲ ਦੀ ਉਮਰ 'ਚ ਵੀਰਵਾਰ ਰਾਤ ਦਿਹਾਂਤ ਹੋ ਗਿਆ ਸੀ। ਕੇਂਦਰੀ ਮੰਤਰੀ ਕੁਝ ਦਿਨਾਂ ਤੋਂ ਰਾਜਧਾਨੀ ਦੇ ਐਸਕਾਟਰ ਹਸਪਤਾਲ 'ਚ ਦਾਖ਼ਲ ਸਨ। ਸ਼੍ਰੀ ਪਾਸਵਾਨ ਦਾ ਹਾਲ ਹੀ 'ਚ ਦਿਨ ਦਾ ਆਪਰੇਸ਼ਨ ਹੋਇਆ ਸੀ। ਇਸ ਤੋਂ ਪਹਿਲਾਂ ਉਨ੍ਹਾਂ ਦਾ ਕਈ ਬੀਮਾਰੀਆਂ ਦਾ ਵਿਦੇਸ਼ਾਂ ਤੋਂ ਇਲਾਜ ਚੱਲ ਰਿਹਾ ਸੀ।

ਸ਼੍ਰੀ ਪਾਸਵਾਨ 1969 'ਚ ਜਵਾਨੀ ਵੇਲੇ ਹੀ ਬਿਹਾਰ ਵਿਧਾਨ ਸਭਾ ਲਈ ਚੁਣ ਲਏ ਗਏ ਸਨ। ਰਾਜਨੀਤੀ 'ਚ ਆਉਣ ਤੋਂ ਪਹਿਲਾਂ ਉਨ੍ਹਾਂ ਦੀ ਬਿਹਾਰ ਪੁਲਸ ਸੇਵਾ 'ਚ ਡਿਪਟੀ ਸੁਪਰਡੈਂਟ ਅਹੁਦੇ 'ਤੇ ਚੋਣ ਵੀ ਹੋ ਗਈ ਸੀ ਪਰ ਪੁਲਸ ਦੀ ਨੌਕਰੀ ਦੀ ਬਜਾਏ ਜਨਤਾ ਦੀ ਸੇਵਾ ਲਈ ਰਾਜਨੀਤੀ ਨੂੰ ਹੀ ਚੁਣਿਆ। ਸ਼੍ਰੀ ਪਾਸਵਾਨ ਨੇ ਕੇਂਦਰ 'ਚ ਰੇਲ, ਇਸਪਾਤ, ਕੋਲਾ, ਦੂਰਸੰਚਾਰ, ਫੂਡ ਅਤੇ ਉਪਭੋਗਤਾ ਮਾਮਲਿਆਂ ਦੇ ਮੰਤਰਾਲਿਆਂ ਦੀ ਜ਼ਿੰਮੇਵਾਰੀ ਸੰਭਾਲੀ ਸੀ। ਸਾਲ 2014 'ਚ ਉਹ ਕੇਂਦਰ 'ਚ ਨਰਿੰਦਰ ਮੋਦੀ ਸਰਕਾਰ 'ਚ ਫੂਡ ਅਤੇ ਉਪਭੋਗਤਾ ਮਾਮਲਿਆਂ ਦੇ ਮੰਤਰੀ ਬਣਾਏ ਗਏ ਸਨ ਅਤੇ ਉਦੋਂ ਤੋਂ ਉਹ ਲਗਾਤਾਰ ਇਸ ਮੰਤਰਾਲੇ ਦੀ ਜ਼ਿੰਮੇਵਾਰੀ ਸੰਭਾਲ ਰਹੇ ਸਨ।