ਮਿਡਲ ਈਸਟ ''ਚ ਸ਼ਾਂਤੀ ਲਈ ਦਿੱਲੀ ਤੋਂ ਨਿਕਲਿਆ ਸ਼ਾਂਤੀ ਦਾ ਰਾਹ, ਈਰਾਨ ਦੇ ਪੱਖ ''ਚ ਆਏ 5 ਵੱਡੇ ਐਲਾਨ!

ਨਵੀਂ ਦਿੱਲੀ : ਨਵੀਂ ਦਿੱਲੀ ਦੇ ਭਾਰਤ ਮੰਡਪਮ ਵਿਖੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪ੍ਰਧਾਨਗੀ ਹੇਠ ਹੋਏ 18ਵੇਂ ਬ੍ਰਿਕਸ (BRICS) ਸੰਮੇਲਨ ਵਿੱਚ ਸਰਬਸੰਮਤੀ ਨਾਲ 'ਨਿਊ ਦਿੱਲੀ ਡਿਕਲੇਅਰੇਸ਼ਨ 2026' ਨੂੰ ਮਨਜ਼ੂਰੀ ਦੇ ਦਿੱਤੀ ਗਈ ਹੈ। ਇਸ ਐਲਾਨਨਾਮੇ ਵਿੱਚ ਪੱਛਮੀ ਏਸ਼ੀਆ (ਮੱਧ ਪੂਰਬ) ਦੇ ਸੰਕਟ ਬਾਰੇ ਇੱਕ ਸਾਂਝਾ ਰੁਖ਼ ਅਪਣਾਇਆ ਗਿਆ ਹੈ, ਜਿਸ ਵਿੱਚ 5 ਅਹਿਮ ਬਿੰਦੂ ਸਿੱਧੇ ਤੌਰ 'ਤੇ ਈਰਾਨ ਦੇ ਪੱਖ ਵਿੱਚ ਜਾਂਦੇ ਦਿਖਾਈ ਦੇ ਰਹੇ ਹਨ:

1. ਪ੍ਰਮਾਣੂ ਠਿਕਾਣਿਆਂ 'ਤੇ ਹਮਲਿਆਂ ਦਾ ਵਿਰੋਧ: ਬ੍ਰਿਕਸ ਦੇਸ਼ਾਂ ਨੇ ਅੰਤਰਰਾਸ਼ਟਰੀ ਪ੍ਰਮਾਣੂ ਊਰਜਾ ਏਜੰਸੀ (IAEA) ਦੀ ਸੁਰੱਖਿਆ ਹੇਠ ਆਉਂਦੇ ਈਰਾਨ ਦੇ ਨਾਗਰਿਕ ਅਤੇ ਸ਼ਾਂਤੀਪੂਰਨ ਪ੍ਰਮਾਣੂ ਠਿਕਾਣਿਆਂ 'ਤੇ ਹੋਏ ਹਮਲਿਆਂ 'ਤੇ ਗੰਭੀਰ ਚਿੰਤਾ ਜਤਾਈ ਅਤੇ ਇਸ ਨੂੰ ਅੰਤਰਰਾਸ਼ਟਰੀ ਕਾਨੂੰਨ ਦੀ ਉਲੰਘਣਾ ਕਰਾਰ ਦਿੱਤਾ।
2. ਲੇਬਨਾਨ ਤੋਂ ਇਜ਼ਰਾਈਲੀ ਫੌਜ ਦੀ ਵਾਪਸੀ ਦੀ ਮੰਗ: ਐਲਾਨਨਾਮੇ ਵਿੱਚ ਇਜ਼ਰਾਈਲ ਤੋਂ ਲੇਬਨਾਨੀ ਖੇਤਰਾਂ ਤੋਂ ਆਪਣੀ ਕਬਜ਼ਾਧਾਰੀ ਫੌਜ ਨੂੰ ਪੂਰੀ ਤਰ੍ਹਾਂ ਹਟਾਉਣ ਅਤੇ ਸੰਯੁਕਤ ਰਾਸ਼ਟਰ ਸੁਰੱਖਿਆ ਪ੍ਰੀਸ਼ਦ ਦੇ ਮਤੇ 1701 ਨੂੰ ਪੂਰੀ ਤਰ੍ਹਾਂ ਲਾਗੂ ਕਰਨ ਦੀ ਮੰਗ ਕੀਤੀ ਗਈ।
3. ਜੇਰੂਸਲੇਮ ਦੀ ਸਥਿਤੀ 'ਚ ਬਦਲਾਅ ਦਾ ਵਿਰੋਧ: ਬ੍ਰਿਕਸ ਦੇਸ਼ਾਂ ਨੇ ਕਬਜ਼ੇ ਵਾਲੇ ਜੇਰੂਸਲੇਮ ਦੀ ਕਾਨੂੰਨੀ ਅਤੇ ਇਤਿਹਾਸਕ ਸਥਿਤੀ ਵਿੱਚ ਕਿਸੇ ਵੀ ਇੱਕਤਰਫ਼ਾ ਬਦਲਾਅ ਨੂੰ ਸਪੱਸ਼ਟ ਤੌਰ 'ਤੇ ਰੱਦ ਕੀਤਾ।
4. ਫਿਲੀਸਤੀਨ ਲਈ 'ਦੋ-ਰਾਸ਼ਟਰ' ਹੱਲ 'ਤੇ ਜ਼ੋਰ: ਇਜ਼ਰਾਈਲ-ਫਿਲੀਸਤੀਨ ਵਿਵਾਦ ਦੇ ਸਥਾਈ ਹੱਲ ਲਈ 'ਦੋ-ਰਾਸ਼ਟਰ' ਸਿਧਾਂਤ ਦਾ ਸਮਰਥਨ ਕੀਤਾ ਗਿਆ ਅਤੇ ਸੰਯੁਕਤ ਰਾਸ਼ਟਰ ਵਿੱਚ ਫਿਲੀਸਤੀਨ ਦੀ ਪੂਰਨ ਮੈਂਬਰਸ਼ਿਪ ਦੀ ਹਮਾਇਤ ਕੀਤੀ ਗਈ।
5. ਈਰਾਨ-ਯੂ.ਏ.ਈ. ਦੇ ਆਗੂਆਂ ਦੀ ਮੁਲਾਕਾਤ: ਸੰਮੇਲਨ ਦੌਰਾਨ ਈਰਾਨ ਦੇ ਰਾਸ਼ਟਰਪਤੀ ਮਸੂਦ ਪੇਜ਼ੇਸ਼ਕੀਆਨ ਅਤੇ ਅਬੂ ਧਾਬੀ ਦੇ ਕ੍ਰਾਊਨ ਪ੍ਰਿੰਸ ਸ਼ੇਖ ਖਾਲਿਦ ਬਿਨ ਮੁਹੰਮਦ ਬਿਨ ਜ਼ਾਇਦ ਅਲ ਨਾਹਯਾਨ ਵਿਚਕਾਰ ਦੁਵੱਲੀ ਮੁਲਾਕਾਤ ਹੋਈ, ਜਿਸ ਨੂੰ ਖੇਤਰ ਵਿੱਚ ਸ਼ਾਂਤੀ ਦੀ ਦਿਸ਼ਾ ਵਿੱਚ ਇੱਕ ਵੱਡੀ ਪਹਿਲ ਮੰਨਿਆ ਜਾ ਰਿਹਾ ਹੈ।

ਵੱਖ-ਵੱਖ ਹਿੱਤਾਂ ਵਾਲੇ ਦੇਸ਼ਾਂ ਨੂੰ ਇੱਕ ਮੰਚ 'ਤੇ ਲਿਆ ਕੇ ਇਸ ਸਾਂਝੇ ਘੋਸ਼ਣਾਪੱਤਰ 'ਤੇ ਸਰਬਸੰਮਤੀ ਬਣਾਉਣ ਨੂੰ ਭਾਰਤ ਦੀ ਇੱਕ ਵੱਡੀ ਕੂਟਨੀਤਕ ਸਫਲਤਾ ਵਜੋਂ ਦੇਖਿਆ ਜਾ ਰਿਹਾ ਹੈ।