ਦੁਖ਼ਦ ਘਟਨਾ: 5 ਸਾਲ ਦੇ ਬੱਚੇ ਨੂੰ ਆਵਾਰਾ ਕੁੱਤਿਆਂ ਨੇ ਨੋਚ-ਨੋਚ ਖਾਧਾ
Sunday, May 23, 2021 - 04:31 PM (IST)
ਪਾਨੀਪਤ— ਹਰਿਆਣਾ ਦੇ ਪਾਨੀਪਤ ਵਿਚ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਇਆ ਹੈ। ਇੱਥੇ ਇਕ 5 ਸਾਲ ਦੇ ਬੱਚੇ ਨੂੰ ਆਵਾਰਾ ਕੁੱਤਿਆਂ ਨੇ ਨੋਚ-ਨੋਚ ਕੇ ਖਾਧਾ, ਜਿਸ ਨਾਲ ਬੱਚੇ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਉੱਥੇ ਹੀ ਸੂਚਨਾ ਮਿਲਣ ’ਤੇ ਪੁੱਜੀ ਪੁਲਸ ਨੇ ਬੱਚੇ ਦੀ ਲਾਸ਼ ਦਾ ਪੋਸਟਮਾਰਟਮ ਕਰਵਾਉਣ ਲਈ ਉਸ ਨੂੰ ਹਸਪਤਾਲ ਭਿਜਵਾ ਦਿੱਤਾ। ਪੁਲਸ ਦਾ ਕਹਿਣਾ ਹੈ ਕਿ ਮਾਂ-ਬਾਪ ਨੂੰ ਆਪਣੇ ਬੱਚਿਆਂ ਦੀ ਦੇਖਭਾਲ ਖ਼ੁਦ ਕਰਨੀ ਚਾਹੀਦੀ ਹੈ।
ਜਾਣਕਾਰੀ ਮੁਤਾਬਕ ਪਾਨੀਪਤ ਦੇ ਰਿਸਾਲੂ ਰੋਡ ’ਤੇ ਇਹ ਘਟਨਾ ਵਾਪਰੀ, ਜਿੱਥੇ ਮਜ਼ਦੂਰ ਪਰਿਵਾਰ ਦਾ ਇਕ 5 ਸਾਲ ਦਾ ਬੱਚਾ ਯੋਗੀ ਘਰ ਵਿਚੋਂ ਖੇਡਦੇ-ਖੇਡਦੇ ਬਾਹਰ ਅਜਿਹੀ ਥਾਂ ’ਤੇ ਜਾ ਪੁੱਜਾ, ਜਿੱਥੇ ਆਵਾਰਾ ਕੱਤਿਆਂ ਦਾ ਆਤੰਕ ਹੁੰਦਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਬੱਚੇ ਦੇ ਮਾਪੇ ਕੰਮ ’ਚ ਲੱਗੇ ਹੋਏ ਸਨ, ਇਸ ਲਈ ਉਹ ਉਸ ’ਤੇ ਨਜ਼ਰ ਨਹੀਂ ਰੱਖ ਸਕੇ। ਓਧਰ ਮਾਸੂਮ ਯੋਗੀ ਨੂੰ ਆਵਾਰਾ ਕੁੱਤਿਆਂ ਨੇ ਆਪਣਾ ਸ਼ਿਕਾਰ ਬਣਾ ਲਿਆ।
ਪੁਲਸ ਅਧਿਕਾਰੀ ਨੇ ਦੱਸਿਆ ਕਿ ਬੱਚੇ ਦੀ ਲਾਸ਼ ਖੇਤਾਂ ’ਚੋਂ ਬਰਾਮਦ ਕੀਤੀ ਗਈ ਸੀ, ਜਿਸ ਦੀ ਸ਼ਨਾਖ਼ਤ ਕਰਨ ’ਤੇ ਉਸ ਦੀ ਪਹਿਚਾਣ ਯੋਗੀ ਪੁੱਤਰ ਸਤਪਾਲ ਪ੍ਰਜਾਪਤੀ ਦੇ ਰੂਪ ਵਿਚ ਹੋਈ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਯੋਗੀ ਖੇਡਦੇ ਹੋਏ ਕਾਲੋਨੀ ਤੋਂ ਕਾਫੀ ਦੂਰ ਚਲਾ ਗਿਆ ਸੀ, ਜਿੱਥੇ ਕੁੱਤਿਆਂ ਨੇ ਉਸ ’ਤੇ ਹਮਲਾ ਕਰ ਦਿੱਤਾ।
