"ਹੁਣ ਹੋਰ ਕੁੱਟਮਾਰ ਨਹੀਂ ਸਹਿ ਸਕਦੀ", ਵਿਆਹੁਤਾ ਦੇ ਪੈਰ ''ਤੇ ਲਿਖਿਆ ਮਿਲਿਆ ਦਰਦਨਾਕ ਸੁਸਾਈਡ ਨੋਟ

ਵਡੋਦਰਾ : ਗੁਜਰਾਤ ਦੇ ਵਡੋਦਰਾ ਤੋਂ ਖੁਦਕੁਸ਼ੀ ਦਾ ਇੱਕ ਬੇਹੱਦ ਹੈਰਾਨ ਕਰਨ ਵਾਲਾ ਅਤੇ ਦਰਦਨਾਕ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਰਿਲਾਇੰਸ ਟਾਊਨਸ਼ਿਪ ਵਿੱਚ ਰਹਿਣ ਵਾਲੀ ਇੱਕ ਵਿਆਹੁਤਾ ਮਹਿਲਾ ਨੇ ਫਾਹਾ ਲੈ ਕੇ ਆਪਣੀ ਜੀਵਨ ਲੀਲਾ ਸਮਾਪਤ ਕਰ ਲਈ। ਸਭ ਤੋਂ ਹੈਰਾਨੀਜਨਕ ਗੱਲ ਇਹ ਰਹੀ ਕਿ ਮਹਿਲਾ ਨੇ ਆਪਣੀ ਆਖਰੀ ਗੱਲ ਕਿਸੇ ਕਾਗਜ਼ 'ਤੇ ਨਹੀਂ, ਬਲਕਿ ਆਪਣੇ ਖੱਬੇ ਪੈਰ 'ਤੇ ਪੈੱਨ ਨਾਲ ਲਿਖੀ ਸੀ। ਪੋਸਟਮਾਰਟਮ ਦੌਰਾਨ ਡਾਕਟਰਾਂ ਨੂੰ ਮਹਿਲਾ ਦੇ ਪੈਰ 'ਤੇ ਲਿਖਿਆ ਸੁਸਾਈਡ ਨੋਟ ਮਿਲਿਆ, ਜਿਸ ਦੀਆਂ ਚਾਰ ਲਾਈਨਾਂ ਵਿੱਚ ਲਿਖਿਆ ਸੀ, "ਮੈਂ ਦੁਨੀਆ ਤੋਂ ਜਾ ਰਹੀ ਹਾਂ, ਪਤੀ ਆਪਣੇ ਘਰਦਿਆਂ ਨੂੰ ਖੁਸ਼ ਰੱਖੇ, ਮੈਂ ਹੁਣ ਹੋਰ ਕੁੱਟਮਾਰ ਬਰਦਾਸ਼ਤ ਨਹੀਂ ਕਰ ਸਕਦੀ।"

ਮ੍ਰਿਤਕਾ ਦੀ ਪਛਾਣ ਸੀਮਾਬੇਨ ਵਜੋਂ ਹੋਈ ਹੈ, ਜੋ ਮੂਲ ਰੂਪ ਵਿੱਚ ਉੱਤਰ ਪ੍ਰਦੇਸ਼ ਦੇ ਕਾਸਗੰਜ ਦੀ ਰਹਿਣ ਵਾਲੀ ਸੀ ਅਤੇ ਵਡੋਦਰਾ ਵਿਖੇ ਆਪਣੇ ਪਤੀ ਸੁਧੀਰਕੁਮਾਰ ਨਾਲ ਰਹਿ ਰਹੀ ਸੀ। 9 ਅਗਸਤ ਦੀ ਸਵੇਰ ਨੂੰ ਜਦੋਂ ਉਸ ਦਾ ਪਤੀ ਮੋਬਾਈਲ ਠੀਕ ਕਰਵਾਉਣ ਬਾਹਰ ਗਿਆ ਸੀ, ਤਾਂ ਸੀਮਾਬੇਨ ਨੇ ਆਪਣੀ 8 ਮਹੀਨਿਆਂ ਦੀ ਬੱਚੀ ਨੂੰ ਉੱਪਰਲੀ ਮੰਜ਼ਿਲ 'ਤੇ ਰਹਿਣ ਵਾਲੀ ਗੁਆਂਢੀ ਔਰਤ ਨੂੰ ਸੌਂਪ ਦਿੱਤਾ ਅਤੇ ਕਿਹਾ ਕਿ ਉਹ ਰਸੋਈ ਵਿੱਚ ਖਾਣਾ ਬਣਾ ਰਹੀ ਹੈ। ਕਰੀਬ ਅੱਧੇ ਘੰਟੇ ਬਾਅਦ ਜਦੋਂ ਬੱਚੀ ਰੋਣ ਲੱਗੀ, ਤਾਂ ਗੁਆਂਢੀ ਉਸ ਨੂੰ ਲੈ ਕੇ ਹੇਠਾਂ ਆਈ, ਜਿੱਥੇ ਉਸ ਨੇ ਸੀਮਾਬੇਨ ਨੂੰ ਦੁਪੱਟੇ ਨਾਲ ਫਾਹੇ 'ਤੇ ਲਟਕਦਿਆਂ ਦੇਖਿਆ।

ਮ੍ਰਿਤਕਾ ਦੇ ਪਰਿਵਾਰ ਵਾਲਿਆਂ ਨੇ ਦੋਸ਼ ਲਗਾਇਆ ਹੈ ਕਿ ਵਿਆਹ ਦੇ ਬਾਅਦ ਤੋਂ ਹੀ ਸੀਮਾਬੇਨ ਨੂੰ ਪੈਸਿਆਂ ਲਈ ਤੰਗ-ਪ੍ਰੇਸ਼ਾਨ ਕੀਤਾ ਜਾ ਰਿਹਾ ਸੀ। ਪਤੀ ਸੁਧੀਰ ਨੇ ਪਲਾਟ ਖਰੀਦਣ ਲਈ ਸੀਮਾ ਦੇ ਭਰਾ ਅਨਿਲਕੁਮਾਰ ਤੋਂ 2 ਲੱਖ ਰੁਪਏ ਦੀ ਮੰਗ ਕੀਤੀ ਸੀ ਅਤੇ ਇਸ ਤੋਂ ਪਹਿਲਾਂ ਵੀ 50 ਹਜ਼ਾਰ ਰੁਪਏ ਮੰਗੇ ਗਏ ਸਨ। ਦਾਜ ਦੀ ਮੰਗ ਨੂੰ ਲੈ ਕੇ ਉਸ ਨੂੰ ਸਰੀਰਕ ਤੇ ਮਾਨਸਿਕ ਤੌਰ 'ਤੇ ਤਸੀਹੇ ਦਿੱਤੇ ਜਾਂਦੇ ਸਨ। ਇੰਨਾ ਹੀ ਨਹੀਂ, ਸੱਸ ਸ਼ੀਲਾਦੇਵੀ ਅਤੇ ਸਹੁਰੇ ਅਨੇਕਸਿੰਘ ਦੇ ਉਕਸਾਉਣ 'ਤੇ ਪਤੀ ਨੇ ਸੀਮਾ ਦੇ ਫ਼ੋਨ ਵਿੱਚੋਂ ਉਸ ਦੇ ਮਾਪਿਆਂ ਦੇ ਨੰਬਰ ਵੀ ਬਲਾਕ ਕਰ ਦਿੱਤੇ ਸਨ।

ਪੁਲਸ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਘਟਨਾ ਤੋਂ ਇੱਕ ਦਿਨ ਪਹਿਲਾਂ ਪਤੀ-ਪਤਨੀ ਵਿਚਕਾਰ ਮੋਬਾਈਲ ਫ਼ੋਨ ਨੂੰ ਲੈ ਕੇ ਝਗੜਾ ਹੋਇਆ ਸੀ, ਜਿਸ ਵਿੱਚ ਸੀਮਾ ਨੇ ਸੁਧੀਰ ਦਾ ਫ਼ੋਨ ਤੋੜ ਦਿੱਤਾ ਸੀ। ਇਸ ਤੋਂ ਬਾਅਦ ਸੁਧੀਰ ਨੇ ਸੀਮਾ ਦੇ ਵੱਡੇ ਭਰਾ ਸੁਨੀਲ ਨੂੰ ਮੈਸੇਜ ਭੇਜ ਕੇ ਧਮਕੀ ਦਿੱਤੀ ਸੀ ਕਿ ਜੇਕਰ ਮੋਬਾਈਲ ਠੀਕ ਨਾ ਕਰਵਾਇਆ ਗਿਆ, ਤਾਂ ਉਹ ਸੀਮਾ ਨੂੰ ਜਾਨੋਂ ਮਾਰ ਦੇਵੇਗਾ।

ਸੀਮਾਬੇਨ ਦੇ ਭਰਾ ਅਨਿਲਕੁਮਾਰ ਦੀ ਸ਼ਿਕਾਇਤ 'ਤੇ ਜਵਾਹਰਨਗਰ ਪੁਲਸ ਨੇ ਭਾਰਤੀ ਨਿਆਏ ਸੰਹਿਤਾ (BNS) ਦੀਆਂ ਧਾਰਾਵਾਂ 108 (ਖੁਦਕੁਸ਼ੀ ਲਈ ਉਕਸਾਉਣਾ), 85, 54, 351 ਅਤੇ ਦਾਜ ਰੋਕੂ ਕਾਨੂੰਨ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ। ਪੁਲਸ ਨੇ ਤੁਰੰਤ ਕਾਰਵਾਈ ਕਰਦੇ ਹੋਏ ਪਤੀ ਸੁਧੀਰਕੁਮਾਰ, ਸਹੁਰੇ ਅਨੇਕਸਿੰਘ ਅਤੇ ਸੱਸ ਸ਼ੀਲਾਦੇਵੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਮਾਮਲੇ ਦੀ ਅਗਲੇਰੀ ਜਾਂਚ ਏਸੀਪੀ ਆਰ.ਡੀ. ਕਾਵਾ ਦੀ ਅਗਵਾਈ ਵਿੱਚ ਪੀਐਸਆਈ ਪਠਾਨ ਵੱਲੋਂ ਕੀਤੀ ਜਾ ਰਹੀ ਹੈ।