200 ਦੇ ਨੋਟ ਪਿੱਛੇ ਟੁੱਟ ਗਿਆ ਵਿਆਹ ! ਐਨ ਮੌਕੇ ''ਤੇ ਮੁੱਕਰ ਗਈ ਲਾੜੀ, ਬੇਰੰਗ ਮੋੜੀ ਬਰਾਤ

ਨੈਸ਼ਨਲ ਡੈਸਕ : ਬਿਹਾਰ ਦੇ ਮੁਜ਼ੱਫਰਪੁਰ ਜ਼ਿਲ੍ਹੇ ਦੇ ਬਰਿਆਰਪੁਰ ਥਾਣਾ ਖੇਤਰ ਵਿੱਚ ਇੱਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਇੱਥੇ ਇੱਕ ਵਿਆਹ ਦੌਰਾਨ ਹੋਈ ਵੱਡੀ ਧੋਖਾਧੜੀ ਦਾ ਖੁਲਾਸਾ ਸਿਰਫ਼ ਇੱਕ 200 ਰੁਪਏ ਦੇ ਨੋਟ ਕਾਰਨ ਹੋਇਆ, ਜਿਸ ਤੋਂ ਬਾਅਦ ਲਾੜੀ ਪੱਖ ਨੇ ਵਿਦਾਈ ਰੋਕ ਦਿੱਤੀ ਅਤੇ ਬਾਰਾਤ ਨੂੰ ਬਿਨਾਂ ਲਾੜੀ ਦੇ ਹੀ ਵਾਪਸ ਮੁੜਨਾ ਪਿਆ। ਮਿਲੀ ਜਾਣਕਾਰੀ ਅਨੁਸਾਰ ਮਨੀਆਰੀ ਇਲਾਕੇ ਤੋਂ ਸ਼ੁੱਕਰਵਾਰ ਰਾਤ ਨੂੰ ਇੱਕ ਬਰਾਤ ਆਈ ਸੀ। ਦੋਸ਼ ਹੈ ਕਿ ਲੜਕੀ ਦਾ ਰਿਸ਼ਤਾ ਕਿਸੇ ਹੋਰ ਨੌਜਵਾਨ ਨਾਲ ਹੋਇਆ ਸੀ, ਪਰ ਵਿਆਹ ਵਾਲੀ ਰਾਤ ਮੰਡਪ ਵਿੱਚ ਕਿਸੇ ਦੂਜੇ ਨੌਜਵਾਨ ਨੂੰ ਬਿਠਾ ਦਿੱਤਾ ਗਿਆ। ਰਾਤ ਭਰ ਵਿਆਹ ਦੀਆਂ ਰਸਮਾਂ ਚੱਲਦੀਆਂ ਰਹੀਆਂ ਅਤੇ ਕਿਸੇ ਨੂੰ ਵੀ ਇਸ ਧੋਖਾਧੜੀ ਦੀ ਭਿਣਕ ਤੱਕ ਨਹੀਂ ਲੱਗੀ।

200 ਦੇ ਨੋਟ ਨੇ ਉਡਾਏ ਹੋਸ਼ 
ਅਸਲ ਹੰਗਾਮਾ ਸ਼ਨੀਵਾਰ ਸਵੇਰੇ ਵਿਦਾਈ ਦੇ ਸਮੇਂ ਹੋਇਆ। ਵਿਦਾਈ ਦੀਆਂ ਰਸਮਾਂ ਦੌਰਾਨ ਇੱਕ ਮਹਿਲਾ ਨੇ ਲਾੜੇ ਦੀ ਸੂਝ-ਬੂਝ ਪਰਖਣ ਲਈ ਉਸਦੇ ਸਾਹਮਣੇ 200 ਰੁਪਏ ਦਾ ਨੋਟ ਰੱਖਿਆ ਅਤੇ ਪੁੱਛਿਆ ਕਿ ਇਹ ਕਿੰਨੇ ਦਾ ਨੋਟ ਹੈ। ਲਾੜੇ ਨੇ ਉਸ ਨੂੰ 2000 ਰੁਪਏ ਦਾ ਨੋਟ ਦੱਸ ਦਿੱਤਾ। ਜਿਵੇਂ ਹੀ ਲਾੜਾ 200 ਅਤੇ 2000 ਦੇ ਨੋਟ ਵਿਚਕਾਰ ਫਰਕ ਕਰਨ ਵਿੱਚ ਅਸਫਲ ਰਿਹਾ, ਔਰਤਾਂ ਨੇ ਰੋਲ਼ਾ ਪਾਉਣਾ ਸ਼ੁਰੂ ਕਰ ਦਿੱਤਾ, ਜਿਸ ਨਾਲ ਲਾੜੇ ਦੀ ਪੋਲ ਖੁੱਲ੍ਹ ਗਈ।

ਪੁਲਸ ਦੀ ਦਖ਼ਲਅੰਦਾਜ਼ੀ ਅਤੇ ਕਾਰਵਾਈ
 ਜਦੋਂ ਲਾੜੀ ਪੱਖ ਨੂੰ ਪਤਾ ਲੱਗਾ ਕਿ ਲਾੜਾ ਬਦਲਿਆ ਗਿਆ ਹੈ ਅਤੇ ਉਹ ਮਾਨਸਿਕ ਤੌਰ 'ਤੇ ਵੀ ਸਹੀ ਨਹੀਂ ਲੱਗ ਰਿਹਾ, ਤਾਂ ਉਨ੍ਹਾਂ ਨੇ ਲੜਕੀ ਨੂੰ ਭੇਜਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ। ਹੰਗਾਮੇ ਦੀ ਸੂਚਨਾ ਮਿਲਦੇ ਹੀ ਬਰਿਆਰਪੁਰ ਥਾਣੇ ਦੀ ਪੁਲਸ ਮੌਕੇ 'ਤੇ ਪਹੁੰਚੀ। ਪੁਲਸ ਨੇ ਦੋਵਾਂ ਧਿਰਾਂ ਨੂੰ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਲਾੜੀ ਪੱਖ ਧੋਖਾਧੜੀ ਕਾਰਨ ਵਿਆਹ ਤੋੜਨ 'ਤੇ ਅੜਿਆ ਰਿਹਾ। ਆਖਰਕਾਰ ਬਰਾਤ ਨੂੰ ਖਾਲੀ ਹੱਥ ਪਰਤਣਾ ਪਿਆ ਅਤੇ ਪੁਲਸ ਨੇ ਲਾੜੇ ਪੱਖ ਦੇ ਇੱਕ ਨੌਜਵਾਨ ਨੂੰ ਹਿਰਾਸਤ ਵਿੱਚ ਲੈ ਕੇ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e