ਦਰੱਖਤ ਨਾਲ ਟਕਰਾ ਕੇ ਚਕਨਾਚੂਰ ਹੋਈ Ferrari, ਸਫ਼ਾਈ ਕਰਮਚਾਰੀ ਸਣੇ ਚਾਰ ਜ਼ਖਮੀ

ਕੋਲਕਾਤਾ : ਪੱਛਮੀ ਬੰਗਾਲ ਦੀ ਰਾਜਧਾਨੀ ਕੋਲਕਾਤਾ 'ਚ ਬੁੱਧਵਾਰ ਦੇਰ ਰਾਤ ਹਸਪਤਾਲ ਰੋਡ (Hospital Road) 'ਤੇ ਇੱਕ ਲਗਜ਼ਰੀ ਫਰਾਰੀ ਕਾਰ ਦੇ ਬੇਕਾਬੂ ਹੋਣ ਕਾਰਨ ਵੱਡਾ ਹਾਦਸਾ ਵਾਪਰਿਆ। ਵਿਕਟੋਰੀਆ ਮੈਮੋਰੀਅਲ ਦੇ ਪਿੱਛੇ ਹੋਏ ਇਸ ਭਿਆਨਕ ਹਾਦਸੇ 'ਚ ਤੇਜ਼ ਰਫ਼ਤਾਰ ਕਾਰ ਪਹਿਲਾਂ ਇੱਕ ਲੈਂਪ ਪੋਸਟ ਨਾਲ ਟਕਰਾਈ ਅਤੇ ਫਿਰ ਸੜਕ ਕਿਨਾਰੇ ਮੌਜੂਦ ਇੱਕ ਦਰੱਖਤ ਨਾਲ ਜਾ ਟਕਰਾਈ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਕਾਰ ਵਿਚਾਲੋਂ ਦੋ ਹਿੱਸਿਆਂ ਵਿੱਚ ਟੁੱਟ ਗਈ। ਇਸ ਹਾਦਸੇ 'ਚ ਕੁੱਲ ਚਾਰ ਲੋਕ ਜ਼ਖਮੀ ਹੋਏ, ਜਿਨ੍ਹਾਂ ਵਿੱਚੋਂ ਦੋ ਦੀ ਹਾਲਤ ਬੇਹੱਦ ਗੰਭੀਰ ਦੱਸੀ ਜਾ ਰਹੀ ਹੈ।

ਕਾਰ ਚਾਲਕ ਤੇ ਸਫਾਈ ਕਰਮਚਾਰੀ ਜ਼ਖਮੀ
ਜਾਣਕਾਰੀ ਅਨੁਸਾਰ ਨਿਊ ਅਲੀਪੁਰ ਦੇ ਰਹਿਣ ਵਾਲੇ 48 ਸਾਲਾ ਅੰਮ੍ਰਿਤ ਸਿੰਘ ਸੈਣੀ ਨੂੰ ਕਥਿਤ ਤੌਰ 'ਤੇ ਕਾਰ ਚਲਾਉਣ ਵਾਲਾ ਦੱਸਿਆ ਜਾ ਰਿਹਾ ਹੈ, ਜਿਨ੍ਹਾਂ ਨੂੰ ਅਲੀਪੁਰ ਦੇ ਇੱਕ ਨਿੱਜੀ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਹੈ। ਉਨ੍ਹਾਂ ਦਾ ਪਰਿਵਾਰ ਕਾਰ ਸ਼ੋਰੂਮ ਦੇ ਕਾਰੋਬਾਰ ਨਾਲ ਜੁੜਿਆ ਹੋਇਆ ਹੈ। ਪੁਲਸ ਨੇ ਹਾਲਾਂਕਿ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਕਿ ਕਾਰ 'ਚ ਸੈਣੀ ਦਾ ਬੇਟਾ ਵੀ ਮੌਜੂਦ ਸੀ, ਜਿਵੇਂ ਕਿ ਸਥਾਨਕ ਲੋਕਾਂ ਨੇ ਦਾਅਵਾ ਕੀਤਾ ਸੀ।

ਇਸ ਹਾਦਸੇ 'ਚ ਸੜਕ ਕਿਨਾਰੇ ਮੌਜੂਦ ਦੋ ਮਹਿਲਾ ਕਰਮਚਾਰੀ ਵੀ ਜ਼ਖਮੀ ਹੋਈਆਂ। ਇਨ੍ਹਾਂ 'ਚ ਸਾਊਥ 24 ਪਰਗਨਾ ਦੀ 55 ਸਾਲਾ ਰਸ਼ੀਦਾ ਬੀਬੀ ਸ਼ਾਮਲ ਹੈ, ਜੋ PWD 'ਚ ਸਫ਼ਾਈ ਕਰਮਚਾਰੀ ਵਜੋਂ ਤਾਇਨਾਤ ਹੈ। ਚਸ਼ਮਦੀਦਾਂ ਅਨੁਸਾਰ ਤੇਜ਼ ਰਫ਼ਤਾਰ ਫਰਾਰੀ ਉਨ੍ਹਾਂ ਦੇ ਪੈਰਾਂ ਉੱਪਰੋਂ ਲੰਘ ਗਈ, ਜਿਸ ਕਾਰਨ ਉਨ੍ਹਾਂ ਨੂੰ ਗੰਭੀਰ ਸੱਟਾਂ ਲੱਗੀਆਂ। ਰਸ਼ੀਦਾ ਬੀਬੀ ਨੂੰ ਐੱਸ.ਐੱਸ.ਕੇ.ਐੱਮ. ਹਸਪਤਾਲ ਦੇ ਆਰਥੋਪੀਡਿਕ ਵਿਭਾਗ 'ਚ ਭਰਤੀ ਕਰਵਾਇਆ ਗਿਆ ਹੈ, ਜਿੱਥੇ ਉਨ੍ਹਾਂ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ।

ਪੁਲਸ ਜਾਂਚ ਜਾਰੀ
ਪੁਲਸ ਸੂਤਰਾਂ ਨੇ ਦੱਸਿਆ ਕਿ ਦੁਰਘਟਨਾ ਤੋਂ ਪਹਿਲਾਂ ਫਰਾਰੀ ਕਾਰ ਨੂੰ ਅਲੀਪੁਰ ਚਿੜੀਆਘਰ (Alipur Zoo) ਅਤੇ ਜ਼ੀਰੂਤ ਬ੍ਰਿਜ (Zirrut Bridge) ਨੇੜੇ ਬਹੁਤ ਤੇਜ਼ ਰਫ਼ਤਾਰ ਨਾਲ ਵੇਖਿਆ ਗਿਆ ਸੀ। ਕਾਰ ਏ.ਜੇ.ਸੀ. ਬੋਸ ਰੋਡ ਤੋਂ ਮੁੜ ਕੇ ਹਸਪਤਾਲ ਰੋਡ ਵੱਲ ਵਧੀ, ਜਿੱਥੇ ਚਾਲਕ ਨੇ ਅਚਾਨਕ ਕੰਟਰੋਲ ਗੁਆ ਦਿੱਤਾ।

ਹਾਦਸੇ ਤੋਂ ਬਾਅਦ ਪੁਲਸ ਨੇ ਕਾਰ ਜ਼ਬਤ ਕਰ ਲਈ ਹੈ ਅਤੇ ਹੇਸਟਿੰਗਜ਼ ਪੁਲਸ ਸਟੇਸ਼ਨ ਭੇਜ ਦਿੱਤਾ ਹੈ। ਪੁਲਸ ਇਸ ਗੱਲ ਦੀ ਗਹਿਨ ਜਾਂਚ ਕਰ ਰਹੀ ਹੈ ਕਿ ਹਾਦਸੇ ਸਮੇਂ ਕਾਰ ਕੌਣ ਚਲਾ ਰਿਹਾ ਸੀ। ਅਧਿਕਾਰੀਆਂ ਨੇ ਇਹ ਸੰਭਾਵਨਾ ਵੀ ਜਤਾਈ ਹੈ ਕਿ ਕਾਰ ਚਾਲਕ ਸ਼ਾਇਦ ਕਾਰ 'ਚ ਮੌਜੂਦ ਦੂਜੇ ਵਿਅਕਤੀ ਨੂੰ ਡਰਾਈਵਿੰਗ ਸਿਖਾ ਰਿਹਾ ਸੀ। ਕਿਉਂਕਿ ਘਟਨਾ ਵਾਲੀ ਥਾਂ 'ਤੇ ਸੀ.ਸੀ.ਟੀ.ਵੀ. ਫੁਟੇਜ ਮੌਜੂਦ ਨਹੀਂ ਹੈ, ਇਸ ਲਈ ਪੁਲਸ ਜਾਂਚ ਲਈ ਮੁੱਖ ਤੌਰ 'ਤੇ ਅੰਮ੍ਰਿਤ ਸਿੰਘ ਸੈਣੀ ਦੇ ਬਿਆਨ 'ਤੇ ਨਿਰਭਰ ਕਰ ਰਹੀ ਹੈ।