ਕੇਰਲ ’ਚ ਜਨਮੇ ਅਬਰਾਹਿਮ ਦੀ ਫਰਮ ਅਮਰੀਕੀ ਫ਼ੌਜ ਲਈ ਬਣਾਏਗੀ ‘ਜ਼ੀਰੋ ਪ੍ਰੈਸ਼ਰ ਟਾਇਰ’

ਨੈਸ਼ਨਲ ਡੈਸਕ- ਕੇਰਲ ਵਿਚ ਜਨਮੇ ਅਬਰਾਹਿਮ ਪੰਨੀਕੋਟੂ ਦੇ ਅਮਰੀਕਨ ਇੰਜੀਨੀਅਰਿੰਗ ਗਰੁੱਪ (ਏ. ਈ. ਜੀ.) ਨੂੰ ਅਮਰੀਕੀ ਫੌਜ ਦੇ ਵਾਹਨਾਂ ਲਈ ਜ਼ੀਰੋ ਪ੍ਰੈਸ਼ਰ ਟਾਇਰ ਵਿਕਸਿਤ ਕਰਨ ਅਤੇ ਬਣਾਉਣ ਲਈ ਅਮਰੀਕੀ ਰੱਖਿਆ ਵਿਭਾਗ ਤੋਂ ਫੰਡਿੰਗ ਪ੍ਰਾਪਤ ਹੋਈ ਹੈ। ਓਹੀਓ ਸਥਿਤ ਫਰਮ ਕਾਰਬਨ ਫਾਈਬਰ ਜ਼ੀਰੋ ਪ੍ਰੈਸ਼ਰ ਟਾਇਰ ਤਕਨਾਲੋਜੀ ’ਚ ਮੁਹਾਰਤ ਰੱਖਦੀ ਹੈ, ਜੋ ਇਹ ਯਕੀਨੀ ਬਣਾਉਂਦੀ ਹੈ ਕਿ ਸੜਕ ਕਿਨਾਰੇ ਬੰਬਾਂ ਜਾਂ ਗੋਲੀਆਂ ਨਾਲ ਛਲਣੀ ਹੋਣ ਦੇ ਬਾਵਜੂਦ ਵੀ ਟਾਇਰ ਚੱਲਦੇ ਰਹਿਣਗੇ। ਫਰਮ ਦੇ ਸੀ. ਈ. ਓ. ਪੰਨੀਕੋਟੂ ਨੇ ਕਿਹਾ ਕਿ ਪਹਿਲਾ ਜ਼ੀਰੋ ਪ੍ਰੈਸ਼ਰ ਟਾਇਰ 2023 ’ਚ ਡਲਿਵਰ ਕੀਤਾ ਜਾਵੇਗਾ। ਇਸ ਫੌਜੀ ਟਾਇਰ ਨੂੰ ਸੰਕਲਪ ਤੋਂ ਅਸਲੀਅਤ ’ਚ ਲਿਆਉਣਾ ਏ. ਈ. ਜੀ. ਲਈ ਇੱਕ ਲੰਬਾ, ਦੋ ਦਹਾਕਿਆਂ ਦਾ ਸਫ਼ਰ ਰਿਹਾ ਹੈ।

ਰੱਖਿਆ ਖਰਚ ’ਤੇ ਹੋਵੇਗਾ 782 ਬਿਲੀਅਨ ਡਾਲਰ ਦਾ ਖਰਚਾ

ਕੰਪਨੀ ਦੇ ਇਕ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਇਸ ਨਿਰਮਾਣ ਤਕਨਾਲੋਜੀ ਦਾ ਵਿਕਾਸ ਮਨੁੱਖੀ ਅਤੇ ਮਨੁੱਖ ਰਹਿਤ ਆਟੋਨੋਮਸ ਵਾਹਨਾਂ, ਦੋਵਾਂ ਲਈ ਮਿਲਟਰੀ ਟਾਇਰਾਂ ਦੇ ਅੰਦਰ ਮੌਜੂਦਾ ਰਨ-ਫਲੈਟ ਦੀ ਜਗ੍ਹਾ ਲਵੇਗਾ। 2022 ਸਰਵ-ਵਿਆਪਕ ਨਿਯੋਜਨ ਬਿੱਲ ਰਾਸ਼ਟਰੀ ਰੱਖਿਆ ਖਰਚਿਆਂ ’ਤੇ 782 ਬਿਲੀਅਨ ਡਾਲਰ ਖਰਚ ਕਰੇਗਾ, ਜਿਸ ’ਚ ਕਾਰਬਨ ਫਾਈਬਰ ਪ੍ਰੈਸ਼ਰ ਜ਼ੀਰੋ ਟਾਇਰ ਤਕਨਾਲੋਜੀ ਵਰਗੀਆਂ ਅਗਲੀ ਪੀੜ੍ਹੀ ਦੀਆਂ ਤਕਨਾਲੋਜੀਆਂ ਨੂੰ ਵਿਕਸਿਤ ਕਰਨ ਲਈ 5 ਮਿਲੀਅਨ ਡਾਲਰ ਸ਼ਾਮਲ ਹਨ। ਅਮਰੀਕੀ ਫੌਜੀ ਵਾਹਨ ਟਾਇਰ ਹੁਣ ਰਨ-ਫਲੈਟ ਇਨਸਰਟਸ ਨਾਲ ਲੈਸ ਹਨ ਪਰ ਰੱਖਿਆ ਵਿਭਾਗ ਉਨ੍ਹਾਂ ਨੂੰ ਅਪਗ੍ਰੇਡ ਕਰਨਾ ਚਾਹੁੰਦਾ ਹੈ, ਜੋ ਭਾਰੀ ਭਾਰ ਲਿਜਾਣ ’ਚ ਸਮਰੱਥ ਹੋਣ ਅਤੇ ਜਵਾਨਾਂ ਦਾ ਬਚਾਅ ਕਰ ਸਕਣ।

ਇਸ ਲਈ ਲੋੜ ਪਈ ਜ਼ੀਰੋ ਪ੍ਰੈਸ਼ਰ ਟਾਇਰ ਦੀ

ਰੱਖਿਆ ਵਾਹਨ ਵਜ਼ਨ ਜ਼ਰੂਰਤਾਂ ਨੂੰ ਇੰਨਾ ਵਧਾ ਦਿੱਤਾ ਗਿਆ ਹੈ ਕਿ ਮੌਜੂਦਾ ਟਾਇਰ ਲੋਡ ਦਾ ਸਮਰਥਨ ਨਹੀਂ ਕਰ ਸਕਦੇ ਹਨ ਅਤੇ ਡੀ. ਓ. ਡੀ. (ਰੱਖਿਆ ਵਿਭਾਗ) ਇਕ ਅਜਿਹਾ ਟਾਇਰ ਬਣਾਉਣਾ ਚਾਹੁੰਦਾ ਹੈ ਜੋ ਵਾਹਨ ਦੀ ਗਤੀਸ਼ੀਲਤਾ ਦੇ ਨਾਲ-ਨਾਲ ਬਚਾਅ ਅਤੇ ਰੱਖ-ਰਖਾਅ ਨੂੰ ਵਧਾਉਂਦਾ ਹੈ। ਪੜਾਅ 1 ਦੇ ਨਤੀਜਿਆਂ ਦੇ ਆਧਾਰ ’ਤੇ, ਨਵੇਂ ਏ. ਈ. ਜੀ. ਜ਼ੀਰੋ ਪ੍ਰੈਸ਼ਰ ਟਾਇਰ ਨੇ ਕਈ ਵਾਰ ਹਾਈ-ਵਿਲੋਸਿਟੀ ਰਾਈਫਲ ਨਾਲ ਟਕਰਾਉਣ ਤੋਂ ਬਾਅਦ 300 ਮੀਲ ਤੱਕ ਘੱਟੋ-ਘੱਟ 50 ਮੀਲ ਪ੍ਰਤੀ ਘੰਟਾ ਦੀ ਰਫਤਾਰ ਦਾ ਸਾਹਮਣਾ ਕੀਤਾ। ਕੰਪਨੀ ਦੇ ਇੰਜੀਨੀਅਰਾਂ ਅਨੁਸਾਰ, ਰੱਖਿਆ ਵਿਭਾਗ ਦੇ ਚਾਰ ਵੱਖ-ਵੱਖ ਸਪੈਸ਼ਲ ਆਪ੍ਰੇਸ਼ਨਸ ਵਾਹਨਾਂ ਲਈ ਚਾਰ ਵੱਖ-ਵੱਖ ਟਾਇਰ ਸਾਈਜ਼ ’ਤੇ ਪੜਾਅ 2 ’ਚ ਇਸ ਡਿਜ਼ਾਈਨ ਦੀਆਂ ਟਿਕਾਊ ਵਿਸ਼ੇਸ਼ਤਾਵਾਂ ਦਾ ਅਧਿਐਨ ਕੀਤਾ ਜਾਵੇਗਾ।

ਕੌਣ ਹੈ ਪੰਨੀਕੋਟੂ

ਪੰਨੀਕੋਟੂ, ਕੇਰਲ ਦੇ ਪਠਾਨਮਥਿੱਟਾ ਜ਼ਿਲ੍ਹੇ ਦੇ ਪੁਰਮੱਟਮ ਜਨਮੇ ਇਕ ਪੋਲੀਮਰ ਖੋਜਕਰਤਾ, ਕਾਰੋਬਾਰੀ ਅਤੇ ਏ. ਈ. ਜੀ ਦੇ ਸੀ. ਈ. ਓ ਹਨ। ਉਨ੍ਹਾਂ ਨੇ ਸਰਦਾਰ ਵੱਲਭਭਾਈ ਨੈਸ਼ਨਲ ਇੰਸਟੀਚਿਊਟ ਆਫ ਟੈਕਨਾਲੋਜੀ (ਸੂਰਤ, ਗੁਜਰਾਤ) ਤੋਂ ਮਕੈਨੀਕਲ ਇੰਜੀਨੀਅਰਿੰਗ ਦੀ ਡਿਗਰੀ ਪ੍ਰਾਪਤ ਕੀਤੀ ਹੈ। ਬਾਅਦ ਵਿਚ ਉਨ੍ਹਾਂ ਨੇ ਅਕਰੋਨ ਯੂਨੀਵਰਸਿਟੀ ’ਚ ਪੋਲੀਮਰ ਸਾਇੰਸ ’ਚ ਗ੍ਰੈਜੂਏਟ ਦੀ ਪੜ੍ਹਾਈ ਪੂਰੀ ਕੀਤੀ। ਉਨ੍ਹਾਂ ਨੇ ਰਬੜ ਦੇ ਇੰਜੀਨੀਅਰਿੰਗ ਐਪਲੀਕੇਸ਼ਨਾਂ 'ਤੇ ਕਈ ਖੋਜ ਲੇਖ ਲਿਖੇ ਹਨ।