ISI ਏਜੰਟ ਖ਼ਿਲਾਫ਼ NIA ਅਦਾਲਤ ਦਾ ਵੱਡਾ ਐਕਸ਼ਨ, ਜਾਇਦਾਦ ਕੁਰਕ ਕਰਨ ਦੇ ਹੁਕਮ

ਨੈਸ਼ਨਲ ਡੈਸਕ- ਜੰਮੂ-ਕਸ਼ਮੀਰ ਦੀ ਇੱਕ ਵਿਸ਼ੇਸ਼ NIA (ਰਾਸ਼ਟਰੀ ਜਾਂਚ ਏਜੰਸੀ) ਅਦਾਲਤ ਨੇ ਅਮਰੀਕਾ ਸਥਿਤ ਕਸ਼ਮੀਰੀ ‘ਲੌਬਿਸਟ’ ਅਤੇ ਦੋਸ਼ੀ ਕਰਾਰ ਦਿੱਤੇ ਜਾ ਚੁੱਕੇ ਪਾਕਿਸਤਾਨੀ ਖੁਫੀਆ ਏਜੰਸੀ ISIਦੇ  ਏਜੰਟ ਗੁਲਾਮ ਨਬੀ ਫਈ ਵਿਰੁੱਧ ਸਖ਼ਤ ਕਾਰਵਾਈ ਕਰਦਿਆਂ ਉਸ ਦੀ ਜਾਇਦਾਦ ਨੂੰ ਤੁਰੰਤ ਕੁਰਕ ਕਰਨ ਦਾ ਹੁਕਮ ਦਿੱਤਾ ਹੈ। ਬਡਗਾਮ ਦੇ ਵਿਸ਼ੇਸ਼ ਜੱਜ ਯਾਹਿਆ ਫਿਰਦੌਸ ਨੇ ਜ਼ਿਲ੍ਹੇ ਦੇ ਵਡਵਾਨ ਅਤੇ ਚੱਟਾਬੁਘ ਨਾਮੀ 2 ਪਿੰਡਾਂ 'ਚ ਸਥਿਤ 1.5 ਕਨਾਲ (ਲਗਭਗ 8,100 ਵਰਗ ਫੁੱਟ) ਤੋਂ ਵੱਧ ਜ਼ਮੀਨ ਨੂੰ ਜ਼ਬਤ ਕਰਨ ਦੀ ਪ੍ਰਵਾਨਗੀ ਦਿੱਤੀ ਹੈ। 

ਤੁਰੰਤ ਕਬਜ਼ਾ ਲੈਣ ਦੇ ਨਿਰਦੇਸ਼ 

ਅਦਾਲਤ ਨੇ ਬਡਗਾਮ ਦੇ ਜ਼ਿਲ੍ਹਾ ਮੈਜਿਸਟ੍ਰੇਟ ਨੂੰ ਨਿਰਦੇਸ਼ ਦਿੱਤਾ ਹੈ ਕਿ ਉਹ ਮਾਲ ਵਿਭਾਗ ਅਤੇ ਪੁਲਸ ਦੀ ਮਦਦ ਨਾਲ ਇਸ ਜਾਇਦਾਦ ਦਾ ਤੁਰੰਤ ਕਬਜ਼ਾ ਲੈਣ। ਇਹ ਹੁਕਮ ਅਪਰਾਧਿਕ ਦੰਡ ਪ੍ਰਕਿਰਿਆ ਸੰਹਿਤਾ ਦੀ ਧਾਰਾ 83 (ਹੁਣ ਭਾਰਤੀ ਨਾਗਰਿਕ ਸੁਰੱਖਿਆ ਸੰਹਿਤਾ ਦੀ ਧਾਰਾ 85) ਤਹਿਤ ਜਾਰੀ ਕੀਤੇ ਗਏ ਹਨ। ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਮੁਲਜ਼ਮ ਨੇ ਜਾਣਬੁੱਝ ਕੇ ਖੁਦ ਨੂੰ ਕਾਨੂੰਨ ਤੋਂ ਲੁਕਾਇਆ ਹੋਇਆ ਹੈ ਅਤੇ ਜਾਇਦਾਦ ਕੁਰਕ ਕਰਨੀ ਇਸ ਲਈ ਜ਼ਰੂਰੀ ਹੈ ਕਿਉਂਕਿ ਉਸ ਦੇ ਰਿਸ਼ਤੇਦਾਰ ਇਸ ਨੂੰ ਵੇਚ ਕੇ ਕਾਨੂੰਨੀ ਪ੍ਰਕਿਰਿਆ ਨੂੰ ਅਸਫਲ ਕਰ ਸਕਦੇ ਸਨ।

ਕੌਣ ਹੈ ਗੁਲਾਮ ਨਬੀ ਫਈ? 

76 ਸਾਲਾ ਫਈ ਮੂਲ ਰੂਪ 'ਚ ਬਡਗਾਮ ਦਾ ਰਹਿਣ ਵਾਲਾ ਹੈ ਅਤੇ ਉਸ ਨੂੰ ਅਪ੍ਰੈਲ 2024 'ਚ ਅਦਾਲਤ ਵੱਲੋਂ "ਭਗੌੜਾ" ਐਲਾਨਿਆ ਗਿਆ ਸੀ। ਉਸ ਵਿਰੁੱਧ 2020 'ਚ UAPA (ਗੈਰ-ਕਾਨੂੰਨੀ ਗਤੀਵਿਧੀਆਂ ਰੋਕਥਾਮ ਐਕਟ) ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਸੀ। ਉਹ ਪਾਬੰਦੀਸ਼ੁਦਾ ਸੰਗਠਨ ਜਮਾਤ-ਏ-ਇਸਲਾਮੀ ਦਾ ਸਮਰਥਕ ਅਤੇ ਹਿਜ਼ਬੁਲ ਮੁਜਾਹਿਦੀਨ ਦੇ ਸਰਗਨਾ ਸੈਯਦ ਸਲਾਹੁਦੀਨ ਦਾ ਕਰੀਬੀ ਸਹਿਯੋਗੀ ਦੱਸਿਆ ਜਾਂਦਾ ਹੈ।

ISI ਨਾਲ ਸਬੰਧ ਅਤੇ ਅਮਰੀਕਾ ਵਿੱਚ ਸਜ਼ਾ ਫਈ ਦਾ ਵਿਵਾਦਾਂ ਨਾਲ ਲੰਬਾ ਇਤਿਹਾਸ ਰਿਹਾ ਹੈ:

ਉਸਨੇ ਵਾਸ਼ਿੰਗਟਨ ਵਿੱਚ ਕਸ਼ਮੀਰੀ ਅਮਰੀਕਨ ਕੌਂਸਲ (KAC) ਦੇ ਨਿਰਦੇਸ਼ਕ ਵਜੋਂ ਕੰਮ ਕੀਤਾ, ਜੋ ਬਾਅਦ ਵਿੱਚ ISI ਦਾ ਇੱਕ ਮੋਹਰਾ ਸਾਬਤ ਹੋਇਆ। FBI ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਉਸਨੇ ਕਸ਼ਮੀਰ ਬਾਰੇ ਅਮਰੀਕੀ ਨੀਤੀ ਨੂੰ ਪ੍ਰਭਾਵਿਤ ਕਰਨ ਲਈ ISI ਕੋਲੋਂ 35 ਲੱਖ ਅਮਰੀਕੀ ਡਾਲਰ ਲਏ ਸਨ। ਸਾਲ 2012 'ਚ, ਵਰਜੀਨੀਆ ਦੀ ਇਕ ਅਦਾਲਤ ਨੇ ਉਸ ਨੂੰ ਸਾਜ਼ਿਸ਼ ਅਤੇ ਟੈਕਸ ਚੋਰੀ ਦੇ ਦੋਸ਼ 'ਚ ਦੋ ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਸੀ। ਅਦਾਲਤ ਨੇ ਹੁਣ ਸੀਨੀਅਰ ਪੁਲਸ ਕਪਤਾਨ (SSP) ਨੂੰ ਇਸ ਕੁਰਕੀ ਦੀ ਮੁਹਿੰਮ ਦੌਰਾਨ ਲੋੜੀਂਦੀ ਸੁਰੱਖਿਆ ਪ੍ਰਦਾਨ ਕਰਨ ਦੇ ਹੁਕਮ ਦਿੱਤੇ ਹਨ ਤਾਂ ਜੋ ਜਾਇਦਾਦ ਦੀ ਨਿਸ਼ਾਨਦੇਹੀ ਅਤੇ ਕਬਜ਼ੇ ਦੀ ਪ੍ਰਕਿਰਿਆ ਬਿਨਾਂ ਕਿਸੇ ਰੁਕਾਵਟ ਦੇ ਪੂਰੀ ਕੀਤੀ ਜਾ ਸਕੇ।