ਤਾਮਿਲਨਾਡੂ ਸਿਆਸਤ ''ਚ ਹਲਚਲ, ਚਾਰ ਵਿਧਾਇਕਾਂ ਮਗਰੋਂ ਹੁਣ ਇਸ ਸੀਨੀਅਰ ਨੇਤਾ ਨੇ ਦਿੱਤਾ ਅਸਤੀਫਾ

ਨੈਸ਼ਨਲ ਡੈਸਕ- ਅੰਨਾਦ੍ਰਮੁਕ ਦੇ ਸਾਬਕਾ ਮੰਤਰੀ ਅਤੇ ਬਾਕੀ ਨੇਤਾ ਸੀ. ਵਿਜੈਭਾਸਕਰ ਨੇ ਮੰਗਲਵਾਰ ਨੂੰ ਤਾਮਿਲਨਾਡੂ ਵਿਧਾਨ ਸਭਾ ਦੇ ਪ੍ਰਧਾਨ ਜੇ.ਸੀ.ਡੀ. ਪ੍ਰਭਾਕਰ ਨੂੰ ਸਦਨ ਦੀ ਮੈਂਬਰਸ਼ਿਪ ਤੋਂ ਆਪਣਾ ਅਸਤੀਫਾ ਸੌਂਪ ਦਿੱਤਾ।

ਪ੍ਰਭਾਕਰ ਨੇ ਇਕ ਅਧਿਕਾਰਤ ਬਿਆਨ 'ਚ ਕਿਹਾ ਕਿ ਤਿਆਗਪੱਤਰ ਵਿਜੈਭਾਸਕਰ ਨੇ ਖੁਦ ਹੱਥ ਨਾਲ ਲਿਖਿਆ ਸੀ ਅਤੇ ਇਹ ਵਿਧਾਨ ਸਭਾ ਦੇ ਨਿਯਮਾਂ ਦੇ ਮੁਤਾਬਕ ਸੀ, ਇਸ ਲਈ ਇਸਨੂੰ ਮਨਜ਼ੂਰ ਕਰ ਲਿਆ ਗਿਆ। ਵਿਜੈਭਾਸਕਰ ਪੁਡੂਕੋਟੱਈ ਜ਼ਿਲ੍ਹੇ ਦੀ ਵਿਰਾਲਿਮਲਾਈ ਵਿਧਾਨ ਸਭਾ ਸੀਟ ਦੀ ਅਗਵਾਈ ਕਰ ਰਹੇ ਸਨ। ਉਹ ਪਿਛਲੀ ਅੰਨਾਦ੍ਰਮੁਕ ਸਰਕਾਰ 'ਚ ਸਿਹਤ ਮੰਤਰੀ ਰਹੇ। ਵਿਜੈਭਾਸਕਰ ਉਨ੍ਹਾਂ ਬਾਗੀ ਅੰਨਾਦ੍ਰਮੁਕ ਨੇਤਾਵਾਂ 'ਚ ਸਨ ਜਿਨ੍ਹਾਂ ਨੇ 13 ਮਈ ਨੂੰ ਵਿਧਾਨ ਸਭਾ 'ਚ ਵਿਸ਼ਵਾਸ ਵੋਟ 'ਤੇ ਵੰਡ ਦੌਰਾਨ ਟੀਵੀਕੇ ਸਰਕਾਰ ਦੇ ਪੱਖ 'ਚ ਵੋਟ ਪਾਈ ਸੀ। 

ਇਸਤੋਂ ਪਹਿਲਾਂ, ਅੰਨਾਦ੍ਰਮੁਕ ਦੇ ਚਾਰ ਹੋਰ ਵਿਧਾਇਕਾਂ ਨੇ ਵਿਧਾਨ ਸਭਾ ਤੋਂ ਅਸਤੀਫਾ ਦੇ ਦਿੱਤਾ ਸੀ ਅਤੇ ਬਾਅਦ 'ਚ ਉਹ ਸੱਤਾਧਾਰੀ ਟੀਵੀਕੇ 'ਚ ਸ਼ਾਮਲ ਹੋ ਗਏ ਸਨ। ਵਿਧਾਇਕ ਅਹੁਦੇ ਤੋਂ ਅਸਤੀਫਾ ਦੇਣ ਤੋਂ ਪਹਿਲਾਂ, ਵਿਜੈਭਾਸਕਰ ਨੇ ਅੰਨਾਦ੍ਰਮੁਕ ਮੁਖੀ ਐਡਪਾਡੀ ਕੇ. ਪਲਾਨੀਸਵਾਮੀ ਦਾ ਨਾਂ ਲਏ ਬਿਨਾਂ ਉਨ੍ਹਾਂ 'ਤੇ ਨਿਸ਼ਾਨਾ ਵਿੰਨ੍ਹਿਆ। ਉਨ੍ਹਾਂ ਕਿਹਾ ਕਿ ਅਗਵਾਈ ਦਾ ਮਤਲਬ ਸੱਤਾ ਜਾਂ ਹੰਕਾਰ ਨਹੀਂ ਹੈ, ਸਗੋਂ ਸਾਰਿਆਂ ਨੂੰ ਨਾਲ ਲੈ ਕੇ ਚੱਲਣ ਅਤੇ ਪੂਰੀ ਲਗਨ ਨਾਲ ਕੰਮ ਕਰਨ ਤੋਂ ਹੈ। ਉਨ੍ਹਾਂ ਕਿਹਾ ਕਿ ਕੋਈ ਅਗਵਾਈ ਲੋਕਾਂ ਦਾ ਦਿਲ ਕਿਵੇਂ ਜਿੱਤ ਸਕਦੀ ਹੈ, ਜਦੋਂ ਉਹ ਪਾਰਟੀ ਲਈ ਸਖਤ ਮਿਹਨਤ ਕਰਨ ਵਾਲੇ ਆਪਣੇ ਹੀ ਵਰਕਰਾਂ ਦਾ ਦਿਲ ਨਹੀਂ ਜਿੱਤ ਸਕਦੀ।