ਪੁਲਸ ਦੀ ਗੱਡੀ ''ਤੇ ਫਾਈਰਿੰਗ, ਡਰਾਇਵਰ ਨੂੰ ਮਾਰੀਆਂ ਗੋਲੀਆਂ

ਅਜਮੇਰ : ਰਾਜਸਥਾਨ ਦੇ ਅਜਮੇਰ ਜ਼ਿਲ੍ਹੇ ਦੇ ਬਿਆਵਰ ਇਲਾਕੇ ਵਿੱਚ ਇੱਕ ਦਹਿਸ਼ਤ ਭਰੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਪੁਲਸ ਦੀ ਗੱਡੀ ਲੈ ਕੇ ਜਾ ਰਹੇ ਡਰਾਈਵਰ 'ਤੇ ਬਦਮਾਸ਼ਾਂ ਨੇ ਸਾਹਮਣਿਓਂ ਗੋਲੀਬਾਰੀ ਕਰ ਦਿੱਤੀ। ਡਰਾਈਵਰ ਨੂੰ ਗੰਭੀਰ ਹਾਲਤ ਵਿੱਚ ਅਜਮੇਰ ਦੇ ਜੇ.ਐਲ.ਐਨ. ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ, ਜਿੱਥੇ ਉਸ ਦੇ ਪੇਟ ਵਿੱਚ ਫਸੀ ਗੋਲੀ ਨੂੰ ਕੱਢਣ ਲਈ ਡਾਕਟਰ ਸਰਜਰੀ ਦੀ ਤਿਆਰੀ ਕਰ ਰਹੇ ਹਨ।

ਇਹ ਘਟਨਾ ਬਿਆਵਰ ਦੇ ਬਿਜੈਨਗਰ ਥਾਣੇ ਤੋਂ ਸਿਰਫ਼ 2 ਕਿਲੋਮੀਟਰ ਦੂਰ ਵਾਪਰੀ। ਬਿਜੈਨਗਰ ਥਾਣੇ ਦੇ ਡਰਾਈਵਰ ਸੀਤਾਰਾਮ ਗੁਰਜਰ (31) ਨੇ ਦੱਸਿਆ ਕਿ ਉਹ ਮੰਗਲਵਾਰ ਸਵੇਰੇ 3:45 ਵਜੇ ਥਾਣੇ ਦੇ ਡੀ.ਓ. ਗੋਪੀ ਰਾਮ ਨੂੰ ਉਨ੍ਹਾਂ ਦੇ ਕਮਰੇ ਵਿੱਚ ਛੱਡ ਕੇ ਵਾਪਸ ਥਾਣੇ ਜਾ ਰਿਹਾ ਸੀ। ਬਰਲ ਰੋਡ 'ਤੇ ਉਸ ਨੇ ਦੋ ਵਿਅਕਤੀਆਂ ਨੂੰ ਬੈਠੇ ਦੇਖਿਆ, ਜਿਨ੍ਹਾਂ 'ਤੇ ਸ਼ੱਕ ਹੋਣ 'ਤੇ ਉਸ ਨੇ ਗੱਡੀ ਰੋਕੀ ਅਤੇ ਉਨ੍ਹਾਂ ਤੋਂ ਦਸਤਾਵੇਜ਼ ਮੰਗੇ। ਸੀਤਾਰਾਮ ਅਨੁਸਾਰ, ਉਨ੍ਹਾਂ ਦੋਹਾਂ ਦੇ ਆਸ-ਪਾਸ ਨਸ਼ੀਲਾ ਪਦਾਰਥ ਪਿਆ ਹੋਇਆ ਸੀ। ਉਸ ਨੇ ਤੁਰੰਤ ਡੀ.ਓ. ਨੂੰ ਫ਼ੋਨ ਕਰਕੇ ਇਸ ਦੀ ਜਾਣਕਾਰੀ ਦਿੱਤੀ। ਜਿਵੇਂ ਹੀ ਸੀਤਾਰਾਮ ਨੇ ਫ਼ੋਨ ਕੱਟ ਕੇ ਪਿੱਛੇ ਮੁੜਿਆ, ਦੋਹਾਂ ਨੌਜਵਾਨਾਂ ਨੇ ਉਸ ਦੇ ਸਿਰ 'ਤੇ ਹਮਲਾ ਕਰ ਦਿੱਤਾ, ਜਿਸ ਕਾਰਨ ਉਹ ਲਹੂ-ਲੁਹਾਣ ਹੋ ਗਿਆ। ਇਸ ਤੋਂ ਬਾਅਦ, ਇੱਕ ਬਦਮਾਸ਼ ਨੇ ਜੇਬ 'ਚੋਂ ਬੰਦੂਕ ਕੱਢੀ ਅਤੇ ਸਾਹਮਣਿਓਂ ਉਸ 'ਤੇ ਗੋਲੀ ਚਲਾ ਦਿੱਤੀ। ਗੋਲੀ ਡਰਾਈਵਰ ਦੀ ਛਾਤੀ ਵਿੱਚ ਲੱਗੀ ਅਤੇ ਅੰਦਰ ਜਾ ਕੇ ਪੇਟ ਵਿੱਚ ਫਸ ਗਈ।

ਗੋਲੀ ਲੱਗਣ ਤੋਂ ਬਾਅਦ ਸੀਤਾਰਾਮ ਮੌਕੇ 'ਤੇ ਹੀ ਡਿੱਗ ਪਿਆ। ਕੁਝ ਹੀ ਦੇਰ ਵਿੱਚ ਥਾਣੇ ਦੇ ਡੀ.ਓ. ਮੌਕੇ 'ਤੇ ਪਹੁੰਚੇ ਅਤੇ ਉਸ ਨੂੰ ਸਥਾਨਕ ਹਸਪਤਾਲ ਲੈ ਗਏ। ਗੰਭੀਰ ਹਾਲਤ ਨੂੰ ਦੇਖਦੇ ਹੋਏ ਡਾਕਟਰਾਂ ਨੇ ਉਸ ਨੂੰ ਤੁਰੰਤ ਅਜਮੇਰ ਦੇ ਜੇ.ਐਲ.ਐਨ. ਹਸਪਤਾਲ ਰੈਫ਼ਰ ਕਰ ਦਿੱਤਾ, ਜਿੱਥੇ ਉਹ ਜ਼ਿੰਦਗੀ ਅਤੇ ਮੌਤ ਦੀ ਜੰਗ ਲੜ ਰਿਹਾ ਹੈ। ਵਾਰਦਾਤ ਦੀ ਸੂਚਨਾ ਮਿਲਣ 'ਤੇ ਐਡੀਸ਼ਨਲ ਐਸ.ਪੀ. ਨਰੇਂਦਰ ਸਿੰਘ ਵੀ ਹਸਪਤਾਲ ਪਹੁੰਚੇ। ਬਿਜੈਨਗਰ ਥਾਣਾ ਪੁਲਸ ਨੇ ਡਰਾਈਵਰ ਦੇ ਬਿਆਨਾਂ 'ਤੇ ਦੋ ਅਣਪਛਾਤੇ ਬਦਮਾਸ਼ਾਂ ਖ਼ਿਲਾਫ਼ ਮੁਕੱਦਮਾ ਦਰਜ ਕਰ ਲਿਆ ਹੈ। ਪੁਲਸ ਦੀਆਂ ਵੱਖ-ਵੱਖ ਟੀਮਾਂ ਮੁਲਜ਼ਮਾਂ ਦੀ ਭਾਲ ਕਰ ਰਹੀਆਂ ਹਨ। ਥਾਣਾ ਇੰਚਾਰਜ ਕਰਨ ਸਿੰਘ ਨੇ ਦੱਸਿਆ ਕਿ ਇੱਕ ਮੁਲਜ਼ਮ ਦੀ ਪਛਾਣ ਬਰਲ ਦੇ ਰਹਿਣ ਵਾਲੇ ਸੁਰੇਂਦਰ ਵਜੋਂ ਹੋਈ ਹੈ। ਮੌਕੇ ਤੋਂ ਸਬੂਤ ਜੁਟਾਉਣ ਲਈ ਐਫ.ਐਸ.ਐਲ. (FSL) ਟੀਮ ਨੂੰ ਵੀ ਬੁਲਾਇਆ ਗਿਆ।