ਬੈਂਕ ਧੋਖਾਦੇਹੀ ਮਾਮਲਾ : ਈ. ਡੀ. ਨੇ ਕੁਰਕ ਕੀਤੀ 67.79 ਕਰੋੜ ਰੁਪਏ ਦੀ ਜਾਇਦਾਦ

ਨੈਸ਼ਨਲ ਡੈਸਕ -ਮਹਾਰਾਸ਼ਟਰ ਦੇ ਨਾਗਪੁਰ ’ਚ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ. ਡੀ.) ਦੇ ਉਪ-ਖੇਤਰੀ ਦਫ਼ਤਰ ਨੇ ਸ਼ੁੱਕਰਵਾਰ ਨੂੰ ਮਨੀ ਲਾਂਡਰਿੰਗ ਰੋਕਥਾਮ ਕਾਨੂੰਨ (ਪੀ. ਐੱਮ. ਐੱਲ. ਏ.) ਦੇ ਤਹਿਤ 67.79 ਕਰੋੜ ਰੁਪਏ ਦੀ ਚੱਲ ਅਤੇ ਅਚੱਲ ਜਾਇਦਾਦ ਦੀ ਕੁਰਕੀ ਦਾ ਐਲਾਨ ਕੀਤਾ। ਇਹ ਕਾਰਵਾਈ ਕਾਰਪੋਰੇਟ ਪਾਵਰ ਲਿਮਟਿਡ ਅਤੇ ਉਸ ਦੇ ਪ੍ਰਮੋਟਰਾਂ ਅਤੇ ਨਿਰਦੇਸ਼ਕਾਂ ਮਨੋਜ ਜੈਸਵਾਲ, ਅਭਿਜੀਤ ਜੈਸਵਾਲ, ਅਭਿਸ਼ੇਕ ਜੈਸਵਾਲ ਅਤੇ ਹੋਰਾਂ ਦੇ ਵਿਰੁੱਧ ਕੀਤੀ ਗਈ ਹੈ।

ਇਨ੍ਹਾਂ ਜਾਇਦਾਦਾਂ ’ਚ ਮਹਾਰਾਸ਼ਟਰ, ਕੋਲਕਾਤਾ, ਦਿੱਲੀ ਅਤੇ ਆਂਧਰਾ ਪ੍ਰਦੇਸ਼ ’ਚ ਬੈਂਕ ਬੈਲੇਂਸ, ਜ਼ਮੀਨਾਂ, ਇਮਾਰਤਾਂ, ਫਲੈਟ ਅਤੇ ਕਾਰੋਬਾਰੀ ਟਿਕਾਣੇ ਸ਼ਾਮਲ ਹਨ। ਮੁਲਜ਼ਮ ਕੰਪਨੀ ਨੇ ਪ੍ਰਾਜੈਕਟ ਲਾਗਤ ਵੇਰਵਿਆਂ ’ਚ ਹੇਰਾਫੇਰੀ ਕਰ ਕੇ ਕਈ ਕਰਜ਼ਾ ਸਹੂਲਤਾਂ ਪ੍ਰਾਪਤ ਕੀਤੀਆਂ ਅਤੇ ਬਾਅਦ ’ਚ ਕਰਜ਼ੇ ਦੀ ਰਾਸ਼ੀ ਦੀ ਦੁਰਵਰਤੋਂ ਕੀਤੀ। ਇਸ ਦੇ ਕਾਰਨ ਸਾਲ 2013-14 ’ਚ ਕਰਜ਼ਾ ਖਾਤੇ ਐੱਨ. ਪੀ. ਏ. (ਨਾਨ-ਪ੍ਰਫਾਰਮਿੰਗ ਐਸੈੱਟ) ਬਣ ਗਏ, ਜਿਸ ਨਾਲ ਯੂਨੀਅਨ ਬੈਂਕ ਆਫ ਇੰਡੀਆ ਨੂੰ 4037 ਕਰੋੜ ਰੁਪਏ ਦੇ ਵਿਆਜ ਸਮੇਤ 11,379 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ।