ਬੈਂਕ ਖਾਤਾ ਬਣਿਆ ਠੱਗੀ ਦਾ ਹਥਿਆਰ! ਟੈਲੀਗ੍ਰਾਮ 'ਤੇ ਹਜ਼ਾਰਾਂ ਮੈਂਬਰ ਸਰਗਰਮ, ਕਾਰਪੋਰੇਟ ਖਾਤਿਆਂ ਦੀ ਲੱਗੀ ਬੋਲੀ

ਇੰਦੌਰ- ਦੇਸ਼ 'ਚ ਸਾਈਬਰ ਠੱਗੀ ਦਾ ਨੈੱਟਵਰਕ ਹੁਣ ਕਾਲ ਸੈਂਟਰਾਂ ਤੋਂ ਨਿਕਲ ਕੇ ਸਿੱਧਾ ਸੋਸ਼ਲ ਮੀਡੀਆ ਐਪ 'ਟੈਲੀਗ੍ਰਾਮ' ਦੀਆਂ ਡਿਜੀਟਲ ਮੰਡੀਆਂ ਤੱਕ ਪਹੁੰਚ ਗਿਆ ਹੈ। ਇੱਥੇ ਖੁੱਲ੍ਹੇਆਮ ਫਰਜ਼ੀ ਅਤੇ ਕਿਰਾਏ ਦੇ ਬੈਂਕ ਖਾਤਿਆਂ (Mule Accounts) ਦੀ ਖਰੀਦੋ-ਫਰੋਖਤ ਹੋ ਰਹੀ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਨ੍ਹਾਂ ਗਰੁੱਪਾਂ 'ਚ ਇੰਦੌਰ ਦੇ ਬੈਂਕ ਖਾਤਿਆਂ ਦੀ ਸਭ ਤੋਂ ਵੱਧ ਮੰਗ ਕੀਤੀ ਜਾ ਰਹੀ ਹੈ।

ਵਿਦੇਸ਼ੀ ਕਰੰਸੀ ਦਾ ਲਾਲਚ ਦੇ ਕੇ ਖਰੀਦੇ ਜਾ ਰਹੇ ਖਾਤੇ

ਟੈਲੀਗ੍ਰਾਮ ਦੇ ਸੈਂਕੜੇ ਗਰੁੱਪਾਂ 'ਚ ਹਜ਼ਾਰਾਂ ਮੈਂਬਰ ਸਰਗਰਮ ਹਨ। ਵਿਦੇਸ਼ਾਂ 'ਚ ਬੈਠੇ ਆਪਰੇਟਰ ਭਾਰਤੀਆਂ ਨੂੰ USDT (ਕ੍ਰਿਪਟੋ ਕਰੰਸੀ) ਅਤੇ ਹੋਰ ਵਿਦੇਸ਼ੀ ਮੁਦਰਾਵਾਂ ਦਾ ਲਾਲਚ ਦੇ ਕੇ ਉਨ੍ਹਾਂ ਦੇ ਬੈਂਕ ਖਾਤੇ ਹਾਸਲ ਕਰ ਰਹੇ ਹਨ। ਖਾਸ ਕਰਕੇ ਕਾਰਪੋਰੇਟ ਅਕਾਊਂਟਸ ਦੀ ਮੰਗ ਸਭ ਤੋਂ ਜ਼ਿਆਦਾ ਹੈ।

ਇੰਝ ਚੱਲਦਾ ਹੈ ਠੱਗੀ ਦਾ ਪੂਰਾ ਖੇਡ

ਠੱਗ ਗਰੁੱਪ 'ਚ ਬੈਂਕ ਦਾ ਨਾਮ ਲਿਖ ਕੇ ਮੰਗ ਪਾਉਂਦੇ ਹਨ। ਇਛੁੱਕ ਵਿਅਕਤੀ ਤੋਂ ਪਾਸਬੁੱਕ ਅਤੇ ਕਾਰਡ ਦੀ ਫੋਟੋ ਮੰਗੀ ਜਾਂਦੀ ਹੈ। ਸੌਦਾ ਹੋਣ ਤੋਂ ਬਾਅਦ ਇਕ APK ਫਾਈਲ ਡਾਊਨਲੋਡ ਕਰਵਾਈ ਜਾਂਦੀ ਹੈ, ਜਿਸ ਨਾਲ ਠੱਗ ਖਾਤੇ ਦੀ ਐਪ 'ਤੇ ਪੂਰਾ ਕੰਟਰੋਲ ਹਾਸਲ ਕਰ ਲੈਂਦੇ ਹਨ। ਠੱਗ ਆਪਣੇ ਬੈਨੀਫਿਸ਼ਰੀ ਜੋੜਦੇ ਹਨ ਅਤੇ ਠੱਗੀ ਦੀ ਰਕਮ 'ਚ 50-50 ਫੀਸਦੀ ਤੱਕ ਦਾ ਕਮਿਸ਼ਨ ਤੈਅ ਹੁੰਦਾ ਹੈ। 24 ਘੰਟੇ ਦੇ ਅੰਦਰ ਏਜੰਟ ਭੇਜ ਕੇ ਕਿੱਟ (ਪਾਸਬੁੱਕ, ਡੈਬਿਟ ਕਾਰਡ) ਕਲੈਕਟ ਕਰ ਲਈ ਜਾਂਦੀ ਹੈ।

ਕਾਰਪੋਰੇਟ ਖਾਤਿਆਂ ਦੀ ਭਾਰੀ ਮੰਗ

ਗਰੁੱਪਾਂ 'ਚ 'ਕਲੀਨ ਫੰਡ' ਅਤੇ 'ਗੇਮਿੰਗ ਫੰਡ' ਦੇ ਨਾਂ 'ਤੇ HDFC, ICICI, BOB ਅਤੇ ਸੈਂਟਰਲ ਬੈਂਕ ਵਰਗੇ ਵੱਡੇ ਬੈਂਕਾਂ ਦੇ ਕਾਰਪੋਰੇਟ ਖਾਤੇ ਲੱਭੇ ਜਾ ਰਹੇ ਹਨ। ਸਾਈਬਰ ਠੱਗਾਂ ਦਾ ਕਹਿਣਾ ਹੈ ਕਿ ਜਿੰਨੀ ਵੀ ਰਕਮ ਆਵੇਗੀ, ਉਸ ਦਾ ਅੱਧਾ ਹਿੱਸਾ ਖਾਤਾਧਾਰਕ ਜਾਂ ਮੈਂਬਰ ਨੂੰ ਦਿੱਤਾ ਜਾਵੇਗਾ।

ਡਿਜੀਟਲ ਅਰੈਸਟ ਕਰਕੇ 40 ਲੱਖ ਦੀ ਠੱਗੀ ਮਾਰਨ ਵਾਲਾ ਗ੍ਰਿਫਤਾਰ

ਇਕ ਹੋਰ ਮਾਮਲੇ 'ਚ, ਇੰਦੌਰ ਕ੍ਰਾਈਮ ਬ੍ਰਾਂਚ ਨੇ ਇਕ 71 ਸਾਲਾ ਬਜ਼ੁਰਗ ਨੂੰ 'ਡਿਜੀਟਲ ਅਰੈਸਟ' ਕਰਕੇ 40 ਲੱਖ ਰੁਪਏ ਠੱਗਣ ਵਾਲੇ ਗੈਂਗ ਦੇ ਮੈਂਬਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਗੁਜਰਾਤ ਦੇ ਰਹਿਣ ਵਾਲੇ ਪੀਯੂਸ਼ ਪਰਮਾਰ ਨੇ ਕਬੂਲਿਆ ਹੈ ਕਿ ਉਹ ਅੰਤਰਰਾਜੀ ਗੈਂਗ ਨੂੰ ਬੈਂਕ ਖਾਤੇ ਮੁਹੱਈਆ ਕਰਵਾਉਂਦਾ ਸੀ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e