ਚੀਨ ਦੀ ਭਾਰਤੀਆਂ ਨੂੰ ਵੱਡੀ ਰਾਹਤ! ਸ਼ੁਰੂ ਹੋਣ ਜਾ ਰਿਹਾ Online Visa Application System

ਨਵੀਂ ਦਿੱਲੀ (ANI): ਭਾਰਤ 'ਚ ਚੀਨੀ ਦੂਤਾਵਾਸ 22 ਦਸੰਬਰ 2025 ਨੂੰ ਆਨਲਾਈਨ ਵੀਜ਼ਾ ਅਰਜ਼ੀ ਪ੍ਰਣਾਲੀ ਦੀ ਅਧਿਕਾਰਤ ਤੌਰ 'ਤੇ ਸ਼ੁਰੂਆਤ ਕਰਨ ਜਾ ਰਿਹਾ ਹੈ। ਚੀਨੀ ਰਾਜਦੂਤ (Ambassador) ਜ਼ੂ ਫੇਈਹੋਂਗ (Xu Feihong) ਨੇ ਸੋਮਵਾਰ ਨੂੰ 'X' (ਪਹਿਲਾਂ ਟਵਿੱਟਰ) 'ਤੇ ਇੱਕ ਪੋਸਟ ਵਿੱਚ ਇਸ ਸਬੰਧੀ ਵੇਰਵੇ ਸਾਂਝੇ ਕੀਤੇ।

ਰਾਜਦੂਤ ਜ਼ੂ ਫੇਈਹੋਂਗ ਨੇ ਦੱਸਿਆ ਕਿ ਬਿਨੈਕਾਰ (applicants) https://visaforchina.cn/DEL3_EN/qianzhengyewu 'ਤੇ ਜਾ ਕੇ ਆਨਲਾਈਨ ਫਾਰਮ ਭਰਨ ਅਤੇ ਅਰਜ਼ੀ ਦੀਆਂ ਸਮੱਗਰੀਆਂ (Materials) ਅਪਲੋਡ ਕਰਨ ਦੀ ਸਹੂਲਤ ਦਾ ਲਾਭ ਲੈ ਸਕਣਗੇ। ਇਹ ਕਦਮ ਅਜਿਹੇ ਸਮੇਂ ਵਿੱਚ ਆਇਆ ਹੈ ਜਦੋਂ ਭਾਰਤ ਨੇ ਹਾਲ ਹੀ ਵਿੱਚ ਚੀਨੀ ਨਾਗਰਿਕਾਂ ਲਈ ਸੈਰ-ਸਪਾਟਾ (Tourism) ਵੀਜ਼ੇ ਮੁੜ ਜਾਰੀ ਕਰਨੇ ਸ਼ੁਰੂ ਕੀਤੇ ਹਨ। ਵਿਦੇਸ਼ ਮੰਤਰਾਲੇ (Ministry of External Affairs) ਨੇ ਪੁਸ਼ਟੀ ਕੀਤੀ ਸੀ ਕਿ ਚੀਨੀ ਨਾਗਰਿਕਾਂ ਲਈ ਸੈਰ-ਸਪਾਟਾ ਅਤੇ ਕਾਰੋਬਾਰ (Business) ਲਈ ਵੀਜ਼ਾ ਪ੍ਰਣਾਲੀ ਹੁਣ "ਪੂਰੀ ਤਰ੍ਹਾਂ ਕਾਰਜਸ਼ੀਲ" ਹੈ।

ਦੱਸਣਯੋਗ ਹੈ ਕਿ 2020 ਦੀਆਂ ਸਰਹੱਦੀ ਝੜਪਾਂ ਤੋਂ ਬਾਅਦ ਲਗਾਈ ਗਈ ਪੰਜ ਸਾਲਾਂ ਦੀ ਮੁਅੱਤਲੀ (Suspension) ਨੂੰ ਖਤਮ ਕਰਦੇ ਹੋਏ, ਭਾਰਤ ਨੇ ਅਧਿਕਾਰਤ ਤੌਰ 'ਤੇ ਨਵੰਬਰ 2025 ਵਿੱਚ ਚੀਨੀ ਨਾਗਰਿਕਾਂ ਲਈ ਦੁਨੀਆ ਭਰ ਵਿੱਚ ਸੈਲਾਨੀ ਵੀਜ਼ੇ ਜਾਰੀ ਕਰਨੇ ਮੁੜ ਸ਼ੁਰੂ ਕਰ ਦਿੱਤੇ ਸਨ। ਵੀਜ਼ਿਆਂ ਨੂੰ ਮੁੜ ਸ਼ੁਰੂ ਕਰਨਾ 2025 ਵਿੱਚ ਦੋਵਾਂ ਦੇਸ਼ਾਂ ਦੁਆਰਾ ਸਹਿਮਤ ਹੋਏ "ਲੋਕ-ਕੇਂਦਰਿਤ" (People-Centric) ਭਰੋਸਾ ਬਹਾਲੀ ਦੇ ਉਪਾਵਾਂ (Confidence-Building Measures) ਦੀ ਲੜੀ ਦਾ ਹਿੱਸਾ ਹੈ।

ਇਸ ਫੈਸਲੇ ਨਾਲ ਵਿਸ਼ਵ ਦੇ ਦੋ ਸਭ ਤੋਂ ਵੱਧ ਆਬਾਦੀ ਵਾਲੇ ਦੇਸ਼ਾਂ ਦਰਮਿਆਨ ਸੈਰ-ਸਪਾਟੇ ਅਤੇ ਵਪਾਰ ਨੂੰ ਹੁਲਾਰਾ ਮਿਲਣ ਅਤੇ ਲੋਕਾਂ ਤੋਂ ਲੋਕਾਂ ਦੇ ਆਦਾਨ-ਪ੍ਰਦਾਨ (People To People Exchanges) 'ਚ ਵਾਧਾ ਹੋਣ ਦੀ ਉਮੀਦ ਹੈ।

ਚੀਨੀ ਵੀਜ਼ਾ ਅਰਜ਼ੀ ਸੇਵਾ ਕੇਂਦਰ, ਨਵੀਂ ਦਿੱਲੀ ਦਾ ਕਾਰੋਬਾਰੀ ਸਮਾਂ: ਸੋਮਵਾਰ ਤੋਂ ਸ਼ੁੱਕਰਵਾਰ 9:00-15:00. ਪਤਾ: Concourse floor, Shivaji Stadium Metro Station, Baba Kharak Singh Marg, Connaught Place, New Delhi 110001.