ਬਰਸਾਤ ਦੇ ਮੌਸਮ 'ਚ ਕਾਰ ਖ਼ਰੀਦੋ ਅਤੇ ਹਜ਼ਾਰਾਂ ਰੁਪਏ ਬਚਾਓ! ਕੰਪਨੀਆਂ ਦੇ ਰਹੀਆਂ ਹਨ ਭਾਰੀ ਛੋਟਾਂ

ਨਵੀਂ ਦਿੱਲੀ - ਗਰਮੀ ਕਾਰਨ ਲੋਕ ਸ਼ੋਅਰੂਮ 'ਤੇ ਘੱਟ ਆ ਰਹੇ ਹਨ, ਜਿਸ ਕਾਰਨ ਕਾਰਾਂ ਦੀ ਵਿਕਰੀ ਪ੍ਰਭਾਵਿਤ ਹੋਈ ਹੈ। ਇਸ ਦੇ ਨਾਲ ਹੀ, ਆਉਣ ਵਾਲੇ ਮਾਨਸੂਨ ਵਿੱਚ ਵਾਹਨਾਂ ਦੀ ਵਿਕਰੀ ਘੱਟ ਰਹਿਣ ਦੀ ਉਮੀਦ ਹੈ। ਇਨ੍ਹਾਂ ਚੁਣੌਤੀਆਂ ਨਾਲ ਨਜਿੱਠਣ ਲਈ, ਕਾਰ ਕੰਪਨੀਆਂ ਅਤੇ ਡੀਲਰ ਰਾਤ ਨੂੰ ਸ਼ੋਅਰੂਮ ਖੋਲ੍ਹਣ ਅਤੇ ਖਾਸ ਤੌਰ 'ਤੇ ਸ਼ੁਰੂਆਤੀ ਮਾਡਲ ਵਾਲੇ ਵਾਹਨਾਂ 'ਤੇ ਭਾਰੀ ਛੋਟ ਦੇਣ ਵਰਗੇ ਉਪਾਅ ਕਰ ਰਹੇ ਹਨ।

ਫੈਡਰੇਸ਼ਨ ਆਫ ਆਟੋਮੋਬਾਈਲ ਡੀਲਰਜ਼ ਐਸੋਸੀਏਸ਼ਨ (ਫਾਡਾ) ਦੇ ਸਰਵੇ ਮੁਤਾਬਕ ਗਰਮੀ ਕਾਰਨ ਸ਼ੋਅਰੂਮਾਂ 'ਤੇ ਆਉਣ ਵਾਲੇ ਲੋਕਾਂ ਦੀ ਗਿਣਤੀ 'ਚ ਘੱਟੋ-ਘੱਟ 18 ਫੀਸਦੀ ਦੀ ਕਮੀ ਆਈ ਹੈ। ਹਾਲਾਂਕਿ ਕਈ ਸ਼ਹਿਰਾਂ 'ਚ ਗਰਮੀ ਘੱਟ ਰਹੀ ਹੈ ਪਰ ਮਾਰੂਤੀ ਸੁਜ਼ੂਕੀ ਵਰਗੀਆਂ ਕੰਪਨੀਆਂ ਰਾਤ ਨੂੰ ਵੀ ਆਪਣੇ ਸ਼ੋਅਰੂਮ ਖੋਲ੍ਹ ਰਹੀਆਂ ਹਨ।

ਬਰਸਾਤ ਦਾ ਮੌਸਮ ਸ਼ੁਰੂ ਹੁੰਦੇ ਹੀ ਕਾਰ ਕੰਪਨੀਆਂ ਅਤੇ ਡੀਲਰ ਵਾਹਨਾਂ ਦੀ ਵਿਕਰੀ ਵਧਾਉਣ ਲਈ ਕਈ ਤਰ੍ਹਾਂ ਦੇ ਆਫਰ ਪੇਸ਼ ਕਰ ਰਹੇ ਹਨ, ਜਿਸ ਵਿੱਚ ਡਿਸਕਾਊਂਟ, ਐਕਸਚੇਂਜ ਬੋਨਸ ਅਤੇ ਮੁਫਤ ਤੋਹਫੇ ਸ਼ਾਮਲ ਹਨ। ਆਮ ਤੌਰ 'ਤੇ ਮਾਨਸੂਨ ਦੌਰਾਨ ਸ਼ੁਭ ਦਿਨ ਘੱਟ ਹੁੰਦੇ ਹਨ ਅਤੇ ਮੌਸਮ ਵੀ ਖਰਾਬ ਹੁੰਦਾ ਹੈ, ਜਿਸ ਕਾਰਨ ਵਾਹਨਾਂ ਦੀ ਵਿਕਰੀ ਘੱਟ ਜਾਂਦੀ ਹੈ। ਇਸ ਲਈ ਕੰਪਨੀਆਂ ਸੇਲ ਵਧਾਉਣ ਲਈ ਗਾਹਕਾਂ ਨੂੰ ਆਕਰਸ਼ਕ ਆਫਰ ਦਿੰਦੀਆਂ ਹਨ।

ਉਪਲਬਧ ਹਨ ਵੱਡੀਆਂ ਛੋਟਾਂ

ਇਸ ਵਾਰ ਮਾਨਸੂਨ ਦੇ ਆਉਣ ਤੋਂ ਪਹਿਲਾਂ ਦੇਸ਼ ਭਰ ਦੇ ਸ਼ੋਅਰੂਮਾਂ 'ਤੇ ਵੱਖ-ਵੱਖ ਵਾਹਨਾਂ 'ਤੇ 20,000 ਰੁਪਏ ਤੋਂ ਲੈ ਕੇ 4 ਲੱਖ ਰੁਪਏ ਤੱਕ ਦਾ ਡਿਸਕਾਊਂਟ ਦਿੱਤਾ ਜਾ ਰਿਹਾ ਹੈ। ਇਹ ਛੋਟਾਂ ਪਿਛਲੇ ਸਾਲ ਦੇ ਮਾਨਸੂਨ ਨਾਲੋਂ ਜ਼ਿਆਦਾ ਹਨ, ਕਿਉਂਕਿ ਕੰਪਨੀਆਂ ਕੋਲ ਪਹਿਲਾਂ ਨਾਲੋਂ ਜ਼ਿਆਦਾ ਵਾਹਨ ਸਟਾਕ ਵਿਚ ਹਨ ਅਤੇ ਗਰਮੀ ਕਾਰਨ ਲੋਕ ਘੱਟ ਸ਼ੋਅਰੂਮਾਂ 'ਤੇ ਜਾ ਰਹੇ ਹਨ।

FADA ਦੇ ਪ੍ਰਧਾਨ ਮਨੀਸ਼ ਰਾਜ ਸਿੰਘਾਨੀਆ ਦਾ ਕਹਿਣਾ ਹੈ, “ਇਸ ਸਾਲ ਪਿਛਲੇ ਸਾਲ ਨਾਲੋਂ ਜ਼ਿਆਦਾ ਛੋਟ ਦਿੱਤੀ ਜਾ ਰਹੀ ਹੈ ਕਿਉਂਕਿ ਕੰਪਨੀਆਂ ਨੇ ਜ਼ਿਆਦਾ ਵਾਹਨ ਇਕੱਠੇ ਕੀਤੇ ਹਨ। ਇਸ ਦਾ ਮਤਲਬ ਹੈ ਕਿ ਨਾ ਸਿਰਫ ਵਾਹਨ ਨਿਰਮਾਤਾ ਕੰਪਨੀਆਂ (OEMs) ਸਗੋਂ ਡੀਲਰ ਵੀ ਆਪਣੇ ਸਟਾਕ ਨੂੰ ਕਲੀਅਰ ਕਰਨ ਦੀ ਪੇਸ਼ਕਸ਼ ਕਰ ਰਹੇ ਹਨ। ਪਿਛਲੇ ਸਾਲ ਵਾਹਨਾਂ ਦੀ ਘਾਟ ਸੀ ਅਤੇ ਲੋਕਾਂ ਨੂੰ ਵਾਹਨ ਲੈਣ ਲਈ ਇੰਤਜ਼ਾਰ ਕਰਨਾ ਪੈਂਦਾ ਸੀ, ਪਰ ਹੁਣ ਜ਼ਿਆਦਾਤਰ ਮਾਡਲ ਅਤੇ ਵੇਰੀਐਂਟ ਆਸਾਨੀ ਨਾਲ ਉਪਲਬਧ ਹਨ। ਇਸ ਕਾਰਨ ਗਾਹਕਾਂ ਨੂੰ ਭਾਰੀ ਛੋਟ ਮਿਲ ਰਹੀ ਹੈ।”

ਮਾਰੂਤੀ ਸੁਜ਼ੂਕੀ ਦੀਆਂ ਗੱਡੀਆਂ 'ਤੇ ਵੀ ਚੰਗਾ ਡਿਸਕਾਊਂਟ ਮਿਲ ਰਿਹਾ ਹੈ, ਉਦਾਹਰਨ ਲਈ, ਆਲਟੋ ਕੇ10 'ਤੇ 40,000 ਰੁਪਏ, ਐੱਸ-ਪ੍ਰੇਸੋ ਅਤੇ ਵੈਗਨਆਰ 'ਤੇ 25,000 ਤੋਂ 30,000 ਰੁਪਏ ਅਤੇ ਸਵਿਫਟ 'ਤੇ 15,000 ਤੋਂ 20,000 ਰੁਪਏ ਦੀ ਛੋਟ ਮਿਲ ਰਹੀ ਹੈ। MSIL ਦੇ ਸੀਨੀਅਰ ਕਾਰਜਕਾਰੀ ਅਧਿਕਾਰੀ (ਮਾਰਕੀਟਿੰਗ ਅਤੇ ਸੇਲਜ਼) ਪਾਰਥੋ ਬੈਨਰਜੀ ਦਾ ਕਹਿਣਾ ਹੈ ਕਿ ਸ਼ਾਮ ਨੂੰ ਜ਼ਿਆਦਾ ਗਾਹਕ ਸ਼ੋਅਰੂਮ 'ਤੇ ਆਉਂਦੇ ਹਨ, ਇਸ ਲਈ ਉਹ ਰਾਤ ਨੂੰ ਵੀ ਸ਼ੋਅਰੂਮ ਖੋਲ੍ਹ ਰਹੇ ਹਨ। ਕੰਪਨੀ ਨੂੰ ਉਮੀਦ ਹੈ ਕਿ ਮਾਨਸੂਨ ਤੋਂ ਬਾਅਦ ਚੰਗੀ ਫ਼ਸਲ ਹੋਣ ਕਾਰਨ ਵਾਹਨਾਂ ਦੀ ਵਿਕਰੀ ਵਧੇਗੀ।

Honda ਨੇ "Honda Magical Monsoon" ਨਾਂ ਦੀ ਇੱਕ ਵਿਸ਼ੇਸ਼ ਪੇਸ਼ਕਸ਼ ਵੀ ਸ਼ੁਰੂ ਕੀਤੀ ਹੈ, ਜਿਸ ਵਿੱਚ ਉਹਨਾਂ ਦੇ ਸਾਰੇ ਵਾਹਨਾਂ (Amaze, City, Elevate ਅਤੇ City e:HEV) 'ਤੇ ਲਾਭ ਅਤੇ ਮੁਫ਼ਤ ਤੋਹਫ਼ੇ ਦਿੱਤੇ ਜਾ ਰਹੇ ਹਨ। ਜੁਲਾਈ 2024 ਵਿੱਚ ਕਾਰ ਖਰੀਦਣ ਵਾਲੇ ਗਾਹਕਾਂ ਨੂੰ ਸਵਿਟਜ਼ਰਲੈਂਡ ਜਾਣ ਦਾ ਮੌਕਾ ਮਿਲ ਸਕਦਾ ਹੈ ਜਾਂ 75,000 ਰੁਪਏ ਤੱਕ ਦਾ ਇਨਾਮ ਮਿਲ ਸਕਦਾ ਹੈ। ਟੈਸਟ ਡਰਾਈਵਿੰਗ ਤੋਂ ਬਾਅਦ ਵੀ ਸਰਪ੍ਰਾਈਜ਼ ਤੋਹਫ਼ੇ ਮਿਲ ਰਹੇ ਹਨ। ਇਹ ਪੇਸ਼ਕਸ਼ਾਂ 1 ਜੁਲਾਈ ਤੋਂ 31 ਜੁਲਾਈ ਤੱਕ ਵੈਧ ਹਨ।

ਟਾਟਾ ਦੇ Tiago, Altroz, Nexon, Punch, Harrier ਅਤੇ Safari ਵਾਹਨਾਂ 'ਤੇ ਵੀ 15,000 ਰੁਪਏ ਤੋਂ ਲੈ ਕੇ 65,000 ਰੁਪਏ ਤੱਕ ਦੀ ਛੋਟ ਹੈ। ਇਸ ਦੇ ਨਾਲ ਹੀ Hyundai ਦੇ Grand i10 Nios, Aura, Creta ਅਤੇ Alcazar 'ਤੇ ਵੀ ਡਿਸਕਾਊਂਟ ਮਿਲ ਰਿਹਾ ਹੈ।