ਵਿਆਹ ''ਤੇ ਲਾੜੀ ਲਈ ਨਕਲੀ ਗਹਿਣੇ ਲੈ ਆਇਆ ਮੁੰਡਾ, ਕੁੜੀ ਨੇ ਬੇਰੰਗ ਮੋੜੀ ਬਰਾਤ, ਫਿਰ...

ਨੈਸ਼ਨਲ ਡੈਸਕ : ਉੱਤਰ ਪ੍ਰਦੇਸ਼ ਦੇ ਕਾਨਪੁਰ ਵਿੱਚ ਇੱਕ ਪੜ੍ਹੇ-ਲਿਖੇ MBA ਪਾਸ ਲਾੜੇ ਨੂੰ ਆਪਣੀ ਝੂਠੀ ਸ਼ਾਨ ਦਿਖਾਉਣਾ ਉਸ ਵੇਲੇ ਮਹਿੰਗਾ ਪੈ ਗਿਆ, ਜਦੋਂ ਲਾੜੀ ਨੇ ਉਸ ਦੇ ਦਿੱਤੇ ਨਕਲੀ ਗਹਿਣਿਆਂ ਦੀ ਹਕੀਕਤ ਜਾਣ ਕੇ ਵਿਆਹ ਕਰਨ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ। ਜੈਮਾਲਾ ਦੀ ਰਸਮ ਹੋ ਚੁੱਕੀ ਸੀ ਅਤੇ ਬਰਾਤੀਆਂ ਨੇ ਖਾਣੇ ਦਾ ਆਨੰਦ ਵੀ ਮਾਣ ਲਿਆ ਸੀ, ਪਰ ਫੇਰਿਆਂ ਤੋਂ ਠੀਕ ਪਹਿਲਾਂ ਹੋਏ ਇਸ ਖੁਲਾਸੇ ਨੇ ਖੁਸ਼ੀਆਂ ਦੇ ਮਾਹੌਲ ਨੂੰ ਹੰਗਾਮੇ ਵਿੱਚ ਬਦਲ ਦਿੱਤਾ। ਜਾਣਕਾਰੀ ਅਨੁਸਾਰ, ਬਰਰਾ-8 ਸਥਿਤ ਇੱਕ ਧਰਮਸ਼ਾਲਾ ਵਿੱਚ ਪਨਕੀ ਦੇ ਰਤਨਪੁਰ ਨਿਵਾਸੀ ਸੰਚਿਤ ਦੀ ਬਰਾਤ 21 ਅਪ੍ਰੈਲ ਨੂੰ ਪਹੁੰਚੀ ਸੀ। ਜਦੋਂ ਫੇਰਿਆਂ ਦੀਆਂ ਰਸਮਾਂ ਸ਼ੁਰੂ ਹੋਣ ਵਾਲੀਆਂ ਸਨ, ਤਾਂ ਲਾੜੇ ਪੱਖ ਵੱਲੋਂ ਗਹਿਣੇ ਲਾੜੀ ਪੱਖ ਨੂੰ ਸੌਂਪੇ ਗਏ।

ਗਹਿਣਿਆਂ ਦੀ ਚਮਕ ਦੇਖ ਕੇ ਲਾੜੀ ਪੱਖ ਨੂੰ ਸ਼ੱਕ ਹੋਇਆ ਕਿ ਇਹ ਅਸਲੀ ਸੋਨਾ ਨਹੀਂ ਹੈ। ਸ਼ੱਕ ਹੋਣ 'ਤੇ ਵਿਆਹ ਵਿੱਚ ਆਏ ਇੱਕ ਸੁਨਿਆਰੇ ਨੂੰ ਬੁਲਾ ਕੇ ਗਹਿਣਿਆਂ ਦੀ ਜਾਂਚ ਕਰਵਾਈ ਗਈ। ਜਾਂਚ ਤੋਂ ਬਾਅਦ ਸੁਨਿਆਰੇ ਨੇ ਸਾਫ਼ ਕਰ ਦਿੱਤਾ ਕਿ ਸਿਰਫ਼ ਮੰਗਲਸੂਤਰ ਹੀ ਸੋਨੇ ਦਾ ਹੈ, ਜਦਕਿ ਬਾਕੀ ਸਾਰੇ ਗਹਿਣੇ ਨਕਲੀ ਹਨ। ਇਹ ਸੁਣਦਿਆਂ ਹੀ ਲਾੜੀ ਤੇ ਉਸ ਦੇ ਪਰਿਵਾਰ ਦਾ ਗੁੱਸਾ ਸੱਤਵੇਂ ਅਸਮਾਨ 'ਤੇ ਪਹੁੰਚ ਗਿਆ। ਲਾੜੀ ਨੇ ਤੁਰੰਤ ਵਿਆਹ ਤੋੜਨ ਦਾ ਫੈਸਲਾ ਸੁਣਾ ਦਿੱਤਾ।

'ਝੂਠ ਦੀ ਬੁਨਿਆਦ 'ਤੇ ਨਹੀਂ ਵਸਾਵਾਂਗੇ ਘਰ' 
ਲਾੜੀ ਦੀ ਮਾਂ, ਜੋ ਕਿ ਨਾਸ਼ਤੇ ਦਾ ਹੋਟਲ ਚਲਾ ਕੇ ਆਪਣੀ ਬੇਟੀ ਦਾ ਪਾਲਣ-ਪੋਸ਼ਣ ਕਰ ਰਹੀ ਹੈ, ਨੇ ਕਿਹਾ ਕਿ ਉਨ੍ਹਾਂ ਨੇ ਆਪਣੀ ਪੜ੍ਹੀ-ਲਿਖੀ ਬੇਟੀ ਲਈ ਇੱਕ MBA ਪਾਸ ਲਾੜਾ ਚੁਣਿਆ ਸੀ, ਪਰ ਉਨ੍ਹਾਂ ਨੇ ਧੋਖਾ ਦਿੱਤਾ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਜੋ ਲੋਕ ਅੱਜ ਗਹਿਣਿਆਂ ਦੇ ਨਾਮ 'ਤੇ ਧੋਖਾ ਦੇ ਸਕਦੇ ਹਨ, ਉਹ ਵਿਆਹ ਤੋਂ ਬਾਅਦ ਉਨ੍ਹਾਂ ਦੀ ਬੇਟੀ ਨੂੰ ਹੋਰ ਵੀ ਪ੍ਰੇਸ਼ਾਨ ਕਰਨਗੇ। ਉਨ੍ਹਾਂ ਕਿਹਾ ਕਿ ਉਹ ਅਜਿਹੇ ਘਰ ਵਿੱਚ ਬੇਟੀ ਨਹੀਂ ਭੇਜਣਗੇ ਜਿਸ ਦੀ ਬੁਨਿਆਦ ਹੀ ਝੂਠ 'ਤੇ ਟਿੱਕੀ ਹੋਵੇ।

ਪੁਲਸ ਦੀ ਮੌਜੂਦਗੀ 'ਚ ਹੋਇਆ ਲਿਖਤੀ ਸਮਝੌਤਾ
 ਮਾਮਲਾ ਵਧਦਾ ਦੇਖ ਪੁਲਸ ਨੂੰ ਸੂਚਿਤ ਕੀਤਾ ਗਿਆ। ਗੁਜੈਨੀ ਚੌਕੀ ਇੰਚਾਰਜ ਪੁਲਸ ਟੀਮ ਨਾਲ ਮੌਕੇ 'ਤੇ ਪਹੁੰਚੇ ਅਤੇ ਦੋਵਾਂ ਪੱਖਾਂ ਵਿਚਾਲੇ ਲੰਬੀ ਪੰਚਾਇਤ ਚੱਲੀ। ਲਾੜੇ ਪੱਖ ਨੇ ਆਪਣੀ ਗਲਤੀ ਮੰਨਦਿਆਂ ਮਾਫ਼ੀ ਵੀ ਮੰਗੀ, ਪਰ ਲਾੜੀ ਆਪਣੇ ਫੈਸਲੇ 'ਤੇ ਅਟੱਲ ਰਹੀ। ਆਖਰਕਾਰ, ਪੁਲਸ ਦੀ ਮੌਜੂਦਗੀ ਵਿੱਚ ਦੋਵਾਂ ਪੱਖਾਂ ਵਿਚਾਲੇ ਵਿਆਹ ਨਾ ਕਰਨ ਦਾ ਲਿਖਤੀ ਸਮਝੌਤਾ ਹੋਇਆ ਅਤੇ ਧੋਖੇਬਾਜ਼ ਲਾੜਾ ਬਿਨਾਂ ਲਾੜੀ ਲਏ ਹੀ ਬੇਆਬਰੂ ਹੋ ਕੇ ਵਾਪਸ ਪਰਤ ਗਿਆ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e