ਭਾਜਪਾ ਦੇ ਨਵੇਂ ਪ੍ਰਧਾਨ ਦੀ ਭਾਲ

ਨਵੀਂ ਦਿੱਲੀ- ਭਾਜਪਾ ਹਾਈ ਕਮਾਂਡ 2 ਅਹਿਮ ਨਿਯੁਕਤੀਆਂ ਲਈ ਯੋਗ ਉਮੀਦਵਾਰਾਂ ਦੀ ਭਾਲ ਕਰ ਰਹੀ ਹੈ। ਇਕ ਜੇ. ਪੀ. ਨੱਢਾ ਦੀ ਥਾਂ ਨਵਾਂ ਪਾਰਟੀ ਪ੍ਰਧਾਨ ਤੇ ਦੂਜਾ ਲੋਕ ਸਭਾ ਲਈ ਚੁਣੇ ਗਏ ਪਿਊਸ਼ ਗੋਇਲ ਦੀ ਥਾਂ ਰਾਜ ਸਭਾ ਦਾ ਨਵਾਂ ਆਗੂ।

ਨੱਢਾ ਨੂੰ ਸਿਹਤ, ਰਸਾਇਣ ਤੇ ਖਾਦ ਮੰਤਰੀ ਨਿਯੁਕਤ ਕੀਤਾ ਗਿਆ ਹੈ, ਇਸ ਲਈ ਹਾਈ ਕਮਾਂਡ ਨੂੰ ਤੁਰੰਤ ਨਵੇਂ 'ਵਰਕਿੰਗ ਪ੍ਰਧਾਨ' ਦੀ ਚੋਣ ਕਰਨੀ ਪਏਗੀ। ਭਾਜਪਾ ਦੇ ਇਕ ਉੱਚ ਪੱਧਰੀ ਸੂਤਰ ਨੇ ਕਿਹਾ ਕਿ ਪਾਰਟੀ ਦੀ ਪਹੁੰਚ ਨੂੰ ਮਜ਼ਬੂਤ ​​ਕਰਨ ਲਈ ਭਾਜਪਾ ਕਿਸੇ ਵੀ ਦਲਿਤ ਜਾਂ ਓ. ਬੀ. ਸੀ. ਨੇਤਾ ’ਤੇ ਸੱਟਾ ਲਾ ਸਕਦੀ ਹੈ। 24 ਸਾਲ ਪਹਿਲਾਂ ਬੰਗਾਰੂ ਲਕਸ਼ਮਣ ਤੋਂ ਬਾਅਦ ਭਾਜਪਾ ਨੇ ਕਿਸੇ ਵੀ ਦਲਿਤ ਨੂੰ ਪ੍ਰਧਾਨ ਨਹੀਂ ਬਣਾਇਆ।

ਪਹਿਲਾਂ ਇਹ ਖ਼ਬਰਾਂ ਸਨ ਕਿ ਸ਼ਿਵਰਾਜ ਸਿੰਘ ਚੌਹਾਨ ਨੂੰ ਇਹ ਵੱਕਾਰੀ ਅਹੁਦਾ ਮਿਲ ਸਕਦਾ ਹੈ ਪਰ ਉਨ੍ਹਾਂ ਨੂੰ ਮੰਤਰੀ ਮੰਡਲ ’ਚ ਸ਼ਾਮਲ ਕਰ ਲਿਆ ਗਿਆ ਹੈ। ਓ. ਬੀ. ਸੀ. ਦੇ 2 ਸੀਨੀਅਰ ਆਗੂਆਂ ਦੇ ਨਾਂ ਚਰਚਾ ’ਚ ਹਨ। ਇਨ੍ਹਾਂ ਵਿਚ ਮਹਾਰਾਸ਼ਟਰ ਤੋਂ ਪਾਰਟੀ ਦੇ ਜਨਰਲ ਸਕੱਤਰ ਵਿੰਦੋ ਤਾਵੜੇ ਵੀ ਸ਼ਾਮਲ ਹਨ। ਪਾਰਟੀ ਪ੍ਰਧਾਨ ਵਜੋਂ ਉਨ੍ਹਾਂ ਦੀ ਤਰੱਕੀ ਭਾਜਪਾ ਦੇ ਓ. ਬੀ. ਸੀ. ਵਿਰੋਧੀ ਅਕਸ ਨੂੰ ਕੁਝ ਖੁੰਡਾ ਕਰ ਸਕਦੀ ਹੈ। ਉਹ ਅਮਿਤ ਸ਼ਾਹ ਦੇ ਭਰੋਸੇਯੋਗ ਵਜੋਂ ਜਾਣੇ ਜਾਂਦੇ ਹਨ । ਲੋਕ ਸਭਾ ਦੀਆਂ ਚੋਣਾਂ ਤੋਂ ਪਹਿਲਾਂ ਵਿਰੋਧੀ ਆਗੂਆਂ ਨੂੰ ਪਾਰਟੀ ’ਚ ਸ਼ਾਮਲ ਕਰਨ ਲਈ ਜ਼ਿੰਮੇਵਾਰੀ ਵਾਲੀ ਟੀਮ ਦੀ ਉਨ੍ਹਾਂ ਅਗਵਾਈ ਕੀਤੀ ਸੀ। ਉਹ ਆਰ. ਐੱਸ. ਐੱਸ. ਲੀਡਰਸ਼ਿਪ ਦੇ ਵੀ ਨੇੜੇ ਹਨ।

ਦੂਜਾ ਨਾਂ ਰਾਜ ਸਭਾ ਦੇ ਮੈਂਬਰ ਕੇ. ਲਕਸ਼ਮਣ ਦਾ ਹੈ ਜੋ ਪਾਰਟੀ ਦੇ ਓ. ਬੀ. ਸੀ. ਫਰੰਟ ਦੇ ਮੁਖੀ ਹਨ। ਉਹ ਤੇਲੰਗਾਨਾ ਤੋਂ ਹਨ । ਪਾਰਟੀ ਦੀਆਂ ਨਜ਼ਰਾਂ ਦੱਖਣ ’ਚ ਵਿਸਥਾਰ ’ਤੇ ਹੋਣ ਕਾਰਨ ਉਨ੍ਹਾਂ ਨੂੰ ਮਜ਼ਬੂਤ ​​ਦਾਅਵੇਦਾਰ ਵਜੋਂ ਵੇਖਿਆ ਜਾ ਰਿਹਾ ਹੈ। ਇਹ ਯਕੀਨੀ ਨਹੀਂ ਕਿ ਉਨ੍ਹਾਂ ਨੂੰ ਆਰ. ਐੱਸ. ਐੱਸ. ਦਾ ਭਰੋਸਾ ਮਿਲਿਆ ਹੈ ਜਾਂ ਨਹੀਂ।

ਰਾਜ ਸਭਾ ’ਚ ਨੱਢਾ ਹਾਊਸ ​​ਦੇ ਨੇਤਾ ਦੇ ਅਹੁਦੇ ਲਈ ਮਜ਼ਬੂਤ ​​ਦਾਅਵੇਦਾਰ ਹਨ। ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਅਤੇ ਰੇਲਵੇ, ਆਈ. ਟੀ. ਤੇ ਸੂਚਨਾ ਤੇ ਪ੍ਰਸਾਰਣ ਮੰਤਰੀ ਅਸ਼ਵਿਨੀ ਵੈਸ਼ਨਵ ਵੀ ਇਸ ਅਹੁਦੇ ਦੀ ਦੌੜ ’ਚ ਸ਼ਾਮਲ ਹਨ।