ਤਮਿਲਨਾਡੂ ਸਿਆਸਤ ''ਚ ਵੱਡਾ ਭੂਚਾਲ ! AIADMK ਦੇ 3 ਬਾਗੀ ਵਿਧਾਇਕਾਂ ਨੇ ਦਿੱਤੇ ਅਸਤੀਫ਼ੇ

ਨੈਸ਼ਨਲ ਡੈਸਕ : ਤਮਿਲਨਾਡੂ ਦੀ ਸਿਆਸਤ ਵਿੱਚ ਅੱਜ ਉਸ ਵੇਲੇ ਵੱਡਾ ਉਲਟਫੇਰ ਦੇਖਣ ਨੂੰ ਮਿਲਿਆ, ਜਦੋਂ ਅੰਨਾਦ੍ਰਮੁਕ (AIADMK) ਦੇ ਸੀ.ਵੀ. ਸ਼ਣਮੁਗਮ ਅਤੇ ਐਸ.ਪੀ. ਵੇਲੁਮਣੀ ਦੀ ਅਗਵਾਈ ਵਾਲੇ ਬਾਗੀ ਗੁੱਟ ਦੇ ਤਿੰਨ ਵਿਧਾਇਕਾਂ ਨੇ ਵਿਧਾਨ ਸਭਾ ਸਪੀਕਰ ਜੇ.ਸੀ.ਡੀ. ਪ੍ਰਭਾਕਰ ਨੂੰ ਆਪਣੇ ਅਸਤੀਫ਼ੇ ਸੌਂਪ ਦਿੱਤੇ। ਅਸਤੀਫ਼ਾ ਦੇਣ ਵਾਲੇ ਵਿਧਾਇਕਾਂ ਵਿੱਚ ਐਮ. ਕੁਮਾਰਵੇਲ (ਮਦੁਰੰਤਕਮ), ਸਤਿਆਭਾਮਾ (ਧਾਰਾਪੁਰਮ) ਅਤੇ ਜੈਕੁਮਾਰ (ਪੇਰੂਨਦੁਰਈ) ਸ਼ਾਮਲ ਹਨ।

ਟੀਵੀਕੇ ਸਰਕਾਰ ਵਿੱਚ ਸ਼ਾਮਲ ਹੋਣ ਦੀਆਂ ਅਟਕਲਾਂ
 ਵਿਧਾਨ ਸਭਾ ਸਪੀਕਰ ਨਾਲ ਮੁਲਾਕਾਤ ਤੋਂ ਤੁਰੰਤ ਬਾਅਦ, ਇਨ੍ਹਾਂ ਤਿੰਨਾਂ ਵਿਧਾਇਕਾਂ ਨੇ ਤਮਿਲਗਾ ਵੇਤਰੀ ਕੜਗਮ (TVK) ਸਰਕਾਰ ਦੇ ਮੰਤਰੀ ਆਧਵ ਅਰਜੁਨ ਨਾਲ ਉਨ੍ਹਾਂ ਦੇ ਦਫ਼ਤਰ ਵਿੱਚ ਮੁਲਾਕਾਤ ਕੀਤੀ। ਮੰਨਿਆ ਜਾ ਰਿਹਾ ਹੈ ਕਿ ਇਹ ਤਿੰਨੋਂ ਆਗੂ ਜਲਦ ਹੀ ਟੀਵੀਕੇ ਵਿੱਚ ਸ਼ਾਮਲ ਹੋ ਸਕਦੇ ਹਨ। ਜ਼ਿਕਰਯੋਗ ਹੈ ਕਿ ਇਹ ਵਿਧਾਇਕ ਉਨ੍ਹਾਂ 25 ਮੈਂਬਰਾਂ ਵਿੱਚ ਸ਼ਾਮਲ ਸਨ ਜਿਨ੍ਹਾਂ ਨੇ ਪਾਰਟੀ ਹੁਕਮਾਂ ਦੀ ਉਲੰਘਣਾ ਕਰਦਿਆਂ ਮੁੱਖ ਮੰਤਰੀ ਵਿਜੇ ਦੇ ਭਰੋਸੇ ਦੇ ਵੋਟ ਦੌਰਾਨ ਟੀਵੀਕੇ ਸਰਕਾਰ ਦਾ ਸਮਰਥਨ ਕੀਤਾ ਸੀ। ਅਸਤੀਫ਼ਾ ਦੇਣ ਵਾਲੇ ਵਿਧਾਇਕਾਂ ਦੇ ਖੇਤਰ ਧਾਰਾਪੁਰਮ ਅਤੇ ਪੇਰੂਨਦੁਰਈ ਅੰਨਾਦ੍ਰਮੁਕ ਦੇ ਰਵਾਇਤੀ ਗੜ੍ਹ ਮੰਨੇ ਜਾਂਦੇ ਹਨ।

ਪਲਾਨੀਸਵਾਮੀ ਖੇਮੇ ਦੀ ਵਾਪਸੀ ਅਤੇ ਬਾਗੀ ਗੁੱਟ ਨੂੰ ਝਟਕਾ 
ਇੱਕ ਪਾਸੇ ਜਿੱਥੇ ਤਿੰਨ ਵਿਧਾਇਕਾਂ ਨੇ ਅਸਤੀਫ਼ੇ ਦਿੱਤੇ, ਉੱਥੇ ਹੀ ਦੂਜੇ ਪਾਸੇ ਸ਼ਣਮੁਗਮ-ਵੇਲੁਮਣੀ ਗੁੱਟ ਦੇ ਪੰਜ ਹੋਰ ਵਿਧਾਇਕ ਮੁੜ ਪਾਰਟੀ ਮੁਖੀ ਈ.ਕੇ. ਪਲਾਨੀਸਵਾਮੀ (EPS) ਦੇ ਖੇਮੇ ਵਿੱਚ ਵਾਪਸ ਪਰਤ ਆਏ ਹਨ। ਇਨ੍ਹਾਂ ਵਿਧਾਇਕਾਂ ਵਿੱਚ ਐਸ.ਐਮ. ਸੁਕੁਮਾਰ, ਪੀ. ਹਰੀਬਾਸਕਰ, ਦਿਲੀਪਨ ਜੈਸ਼ੰਕਰ, ਐਨ.ਐਸ.ਐਨ. ਨਟਰਾਜਨ ਅਤੇ ਕੇ. ਮੋਹਨ ਸ਼ਾਮਲ ਹਨ। ਇਸ ਵਾਪਸੀ ਨਾਲ ਵਿਧਾਨ ਸਭਾ ਵਿੱਚ ਪਲਾਨੀਸਵਾਮੀ ਦੇ ਸਮਰਥਕਾਂ ਦੀ ਗਿਣਤੀ ਵਧ ਕੇ 27 ਹੋ ਗਈ ਹੈ, ਜਦਕਿ ਬਾਗੀ ਗੁੱਟ ਦੀ ਗਿਣਤੀ 25 ਤੋਂ ਘਟ ਕੇ 17 ਰਹਿ ਗਈ ਹੈ।

ਉਪ-ਚੋਣਾਂ ਦੀ ਬਣੀ ਸੰਭਾਵਨਾ
 ਸਪੀਕਰ ਪ੍ਰਭਾਕਰ ਨੇ ਤਿੰਨਾਂ ਵਿਧਾਇਕਾਂ ਦੇ ਅਸਤੀਫ਼ੇ ਸਵੀਕਾਰ ਕਰ ਲਏ ਹਨ, ਜਿਸ ਤੋਂ ਬਾਅਦ ਹੁਣ ਸੂਬੇ ਵਿੱਚ ਚਾਰ ਵਿਧਾਨ ਸਭਾ ਸੀਟਾਂ 'ਤੇ ਉਪ-ਚੋਣਾਂ ਹੋਣ ਦੀ ਸੰਭਾਵਨਾ ਹੈ। ਇਨ੍ਹਾਂ ਵਿੱਚ ਮੁੱਖ ਮੰਤਰੀ ਸੀ. ਜੋਸੇਫ ਵਿਜੇ ਵੱਲੋਂ ਖਾਲੀ ਕੀਤੀ ਗਈ ਤਿਰੂਚਿਰਾਪੱਲੀ ਈਸਟ ਸੀਟ ਵੀ ਸ਼ਾਮਲ ਹੈ। ਸਪੀਕਰ ਨੇ ਦੱਸਿਆ ਕਿ ਅਸਤੀਫ਼ੇ ਸਹੀ ਪ੍ਰਕਿਰਿਆ ਰਾਹੀਂ ਦਿੱਤੇ ਗਏ ਸਨ ਅਤੇ ਅਸਤੀਫ਼ੇ ਲਈ ਕਾਰਨ ਦੱਸਣਾ ਜ਼ਰੂਰੀ ਨਹੀਂ ਹੁੰਦਾ।

ਵਿਰੋਧੀ ਧਿਰਾਂ ਵੱਲੋਂ ਤਿੱਖੀ ਆਲੋਚਨਾ 
ਅੰਨਾਦ੍ਰਮੁਕ ਦੇ ਆਗੂ ਆਈ.ਐਸ. ਇਨਬਾਦੁਰਈ ਨੇ ਇਸ ਕਦਮ ਨੂੰ "ਵਿਧਾਇਕਾਂ ਦੀ ਖਰੀਦੋ-ਫਰੋਖਤ" ਕਰਾਰ ਦਿੱਤਾ ਹੈ। ਇਸੇ ਤਰ੍ਹਾਂ ਡੀਐਮਕੇ (DMK) ਦੇ ਨੇਤਾ ਪੀ. ਵਿਲਸਨ ਨੇ ਟੀਵੀਕੇ 'ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਚੋਣ ਨਤੀਜਿਆਂ ਦੇ ਮਹਿਜ਼ 21 ਦਿਨਾਂ ਦੇ ਅੰਦਰ ਅਸਤੀਫ਼ਾ ਦੇ ਕੇ ਦੂਜੀ ਪਾਰਟੀ 'ਚ ਜਾਣਾ 'ਦਲ-ਬਦਲ ਕਾਨੂੰਨ' ਤੋਂ ਬਚਣ ਦੀ ਨਿੰਦਣਯੋਗ ਕੋਸ਼ਿਸ਼ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e