ਨੌਕਰਾਣੀ ਦੀ ਦਰਿੰਦਗੀ! ਲਿਫਟ ''ਚ ਬੇਰਹਿਮੀ ਨਾਲ ਮਾਰਿਆ ਪਾਲਤੂ ਕੁੱਤਾ, CCTV ਫੁਟੇਜ ਆਈ ਸਾਹਮਣੇ

ਬੈਂਗਲੁਰੂ (PTI) : ਬੈਂਗਲੁਰੂ ਵਿੱਚ ਇੱਕ ਹੈਰਾਨ ਕਰਨ ਵਾਲੀ ਅਤੇ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਇੱਕ ਔਰਤ ਨੂੰ ਇੱਕ ਅਪਾਰਟਮੈਂਟ ਦੀ ਲਿਫਟ ਵਿੱਚ ਆਪਣੇ ਮਾਲਕ ਦੇ ਪਾਲਤੂ ਕੁੱਤੇ ਨੂੰ ਮਾਰਨ ਦੇ ਦੋਸ਼ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਸ ਨੇ ਸੋਮਵਾਰ ਨੂੰ ਦੱਸਿਆ ਕਿ ਇਹ ਘਟਨਾ 1 ਨਵੰਬਰ ਨੂੰ ਵਾਪਰੀ ਸੀ ਅਤੇ ਲਿਫਟ ਵਿੱਚ ਲੱਗੇ ਸੀਸੀਟੀਵੀ ਕੈਮਰੇ 'ਚ ਪੂਰੀ ਤਰ੍ਹਾਂ ਕੈਦ ਹੋ ਗਈ।

ਪੁਲਸ ਅਨੁਸਾਰ, ਮੁਲਜ਼ਮ ਔਰਤ ਦੀ ਪਛਾਣ ਪੁਸ਼ਪਲਤਾ ਵਜੋਂ ਹੋਈ ਹੈ। ਸੀਸੀਟੀਵੀ ਫੁਟੇਜ ਵਿੱਚ, ਪੁਸ਼ਪਲਤਾ ਕੁੱਤੇ ਨਾਲ ਲਿਫਟ ਵਿੱਚ ਦਾਖਲ ਹੁੰਦੀ ਦਿਖਾਈ ਦਿੰਦੀ ਹੈ। ਜਿਉਂ ਹੀ ਲਿਫਟ ਦੇ ਦਰਵਾਜ਼ੇ ਬੰਦ ਹੋਏ, ਉਸਨੇ ਕਥਿਤ ਤੌਰ 'ਤੇ ਜਾਨਵਰ ਨੂੰ ਚੁੱਕਿਆ ਅਤੇ ਜ਼ੋਰ ਨਾਲ ਫਰਸ਼ 'ਤੇ ਪਟਕਿਆ, ਜਿਸ ਕਾਰਨ ਕੁੱਤੇ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।

ਸ਼ਿਕਾਇਤ ਦੇ ਅਨੁਸਾਰ, ਸ਼ਿਕਾਇਤਕਰਤਾ (23 ਸਾਲਾ ਔਰਤ) ਨੇ ਪੁਸ਼ਪਲਤਾ ਨੂੰ 11 ਸਤੰਬਰ ਤੋਂ ਆਪਣੇ ਚਾਰ ਸਾਲਾ ਕੁੱਤੇ 'ਗੂਫੀ' ਦੀ ਦੇਖਭਾਲ ਲਈ 23,000 ਰੁਪਏ ਮਹੀਨਾਵਾਰ ਤਨਖਾਹ 'ਤੇ ਰੱਖਿਆ ਸੀ।

ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਜਦੋਂ ਕੁੱਤਾ 1 ਨਵੰਬਰ ਨੂੰ ਮਰ ਗਿਆ ਤਾਂ ਪੁਸ਼ਪਲਤਾ ਨੇ ਕਿਹਾ ਕਿ ਉਸਨੂੰ ਨਹੀਂ ਪਤਾ ਕਿ ਕੁੱਤਾ ਕਿਵੇਂ ਮਰਿਆ। ਹਾਲਾਂਕਿ, ਬਾਅਦ ਵਿੱਚ ਸੀਸੀਟੀਵੀ ਫੁਟੇਜ ਚੈੱਕ ਕਰਨ 'ਤੇ ਸਾਹਮਣੇ ਆਇਆ ਕਿ ਉਸਨੇ ਹੀ ਕੁੱਤੇ ਨੂੰ ਜ਼ਮੀਨ 'ਤੇ ਸੁੱਟ ਕੇ ਮਾਰਿਆ ਹੈ।

ਇੱਕ ਸੀਨੀਅਰ ਪੁਲਸ ਅਧਿਕਾਰੀ ਨੇ ਦੱਸਿਆ ਕਿ ਪੁਸ਼ਪਲਤਾ ਨੂੰ ਇਸ ਘਟਨਾ ਦੇ ਸਬੰਧ ਵਿੱਚ ਐਤਵਾਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਉਸ ਵਿਰੁੱਧ ਬਾਗਲੁਰ ਪੁਲਸ ਸਟੇਸ਼ਨ ਵਿਖੇ ਜਾਨਵਰਾਂ ਪ੍ਰਤੀ ਜ਼ੁਲਮ ਦੀ ਰੋਕਥਾਮ ਐਕਟ (Prevention of Cruelty to Animals Act) ਤੇ ਭਾਰਤੀ ਨਿਆ ਸੰਹਿਤਾ (Bharatiya Nyaya Sanhita) ਦੀ ਧਾਰਾ 325 (ਕਿਸੇ ਜਾਨਵਰ ਨੂੰ ਮਾਰ ਕੇ ਜਾਂ ਅਪਾਹਜ ਕਰਨ) ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ।